YEHEZKIEL 1 - Allah Wene Fano Wene Hupla Inane

YEHEZKIEL ATTAK-ATTAK ABIKANGGOBA ALLAH EBE HASIKHE WENE 1:1–7:27 Allah ebe hurek welagarek oba eilenggen hasikhe wene

^1-3 Nit afuni Yahudi mene nen tahun inom, tugi inom, ninenggi wenatorek higithogo, 30 tahun andiba, nen tugi 4 ogorek andiba mene tanggal 5 ba re, ap enupogot Yoyakhin enggi hele warogo waluk o Babel wagaukwasik oba nen, tahun 4 en welagagusik, tahun ekhe 5 mene were'ma re, an Busi amlogo nenu Yehezkiel Allah eisewerek mene, afuni Yahudi mene ekhe inenggi hele warogo woginarek wagaukwa mene ninom, o Babel i Kebat esanggoma andoma welagagi. A'nogo were'ma, nenggi ekhe sambul nafe morogo were'ma nen aremnogoat pogot healhunem he, nabikanggoba Allah ebe liakhasigi. A'nogo liakhugunemen he, Tuhan ane an noba ugunem holhigi, nen At ebe werek mene a'nogo omame were'ma hasigi.

⁴ A'nogo nunggul legeisogo liakhasigi re, sogoi hokho mene o abel utara fikhiren funha waga laga. A'nogo funha wagunem he, ohena hokho logoumsek meneba nen, eilabut hobugalep yararet hugunem he, o pogot esanggo-esanggo mondogat lia-fiarogo hilinglagunem higi. Nen eilabut yararet hikhi laga mene andi ebe re endu hangge mene re, elonggoma re, elokhonggen tembaga hangge ombak-bak hokho mene were'ma hasigi.

⁵ Ohena logoumsek mene andi anggele'ma re, kerub enggaminogo mene re, it andi ineluk afuni hakhogo were'ma isigi.

⁶ oba nen he it andem inebe lombok inelokhe enggaminogo hilingi'mo re inogolabi pirethigik hilingik welagaikha.

⁷ Ineisok he, morenek hilingi'mo re, no perunggu ba yugulfugunem amulit fikherek andi hak hilingik welagaikha. Nen, ineisok a'lip he sapi eak mene eisok a'lip hangge omame meneba kwelabek welagaikha.

⁸ Inebe lombok inelokhonggen enggaminogo, nen inogolabi enggaminogoat hilingik welagaikha, nen andi werek kwelek meneat he, inogolabi ebe lombok andem a'makwe re, inenggi afuni inenggi hangge welagaikha.

⁹ Inebe lombok inogolabi fenakwe ekhe inom wuthogo hilingik mene a'nogo re langhogo hilingi'mo, at ekhe ogolabi wureben he ekhe ogolabi wurep senetunem he, inebe 4 en andem, onggut 4 en hangge hilingik welagaikha. A'nogo logolik inebe lebesuogeluk halok he, it inebe lombok inafe enden lagi'lek engge re we inelokhe tukum enek halhikhi lagaikha isigi.

¹⁰ Ineluk werek mene inebe 4 en aremnogo inebe lombok, inelokhe agaum-fagaumhogo welagaikha, inelokhe fikhit he afuni inelokhe hangge, inabel ebekwe fikhit he, mene singa elokhe hangge, nen inabel harekwe fikhit he no sapi eak elokhe hangge, nen inambotkwe fikhit he sue rajawali elokhe hangge hilingik were'ma isigi.

¹¹ Nen, inogolabi misik ekhe re alekwe po'lima langse'ma re inogolabi wureben he, it ineluk werek mene fena fikhit mene ogolabi wurep seneti laga, nen ogolabi wut misik ekhe re sirogo re ebe salek were'ma higi.

¹² Nen, it ineluk werek mene andoma inebe lombok inelokhe unggut fena-fena 4 en aremnogo mondogat weregenek hilingi'mo re, andoma nen ekhe fikhit logoin iluk wenggel fuluk halok he inelokhe tukum werek aremnogo higithogo nek laga-lagaikha, ekhe fikhit louwogeluk inafe hebelaga-lagaikha lek, inelokhe tukhum inafe werek aremnogo higithogo nek laga lagaikha.

¹³ It andi inanggele'ma re, endu enggen hangge inom esage ibilik mene hangge inom, aloget figi'lek lak wagenggetu mondok welaga. Endu andi amulok kulung-kalang lagagunem he, enggan-gan palogo eilabut hangge hobugalep ekhe kulung ekhe kulung lagunem higi.

¹⁴ It ineluk werek mene andoma inonggwaregen weak-weakhogo nek eilabut kulunghogo lagarek hakhogo lakwak ikhi lagaikha isigi.

¹⁵ An nen andoma mondogat hilingitunem furati logolik were'ma nen he, no roda ebe enggaminogo mene re, it inebe lombok inera'lu kweangma misiktek were'ma hasigi.

¹⁶ Roda enggaminogo mene andem elokhe re we misik hilingi'mo, helep enggen onggo hokho mene enu permata nen amulit fikherek andi hangge hilingik welaga. Nen roda ekhe re tulem andoma tiagansek welaga.

¹⁷ A'nogo hilingi'mo roda unggut enggaminogo omanogo higithogo lagunem higi.

¹⁸ Roda andoma ebe re enggaminogo nen maserogo kwelabe'ma re it inebe lombok ineilenggen mondok hokhorogo welagaikha.

^19-21 Ineluk werek mene andoma ekhema-ekhema it logoin anggugukwe omanogo lagunem he ineluk werek mene omanogo nen omamerinafunem a'luk he eisok pirim eterek engge andoma lagunem he inombo'ne laga-lagaikha. Nen it ineluk werek mene omanogo ambi lebe-lebe pogot tulemkwe poma lagagunem ogo, nen aloget fugunem ogore eisok pirim etungge omanogo re inombo'ne nek laga-lagaikha isigi.

²² It ineluk werek mene omanogo inunggulmo re, helage no kristal amulit tibelenggeterek hakhogo wesa polanhogo tiagansek welaga.

²³ Huli andi a'makwe re it inebe ineluk werek mene omanogo inogolabi inebe huli'lipsek mene omanogoba lambuneti logolik ekhe nen ekhe ogolabi sen-sen agik, nen inogolabi ekheba re inebe huli'liphogo kwelabek were'ma isigi.

²⁴ It ambi tarogo lagunem inogolabi abolok he, i hut ane tulungum eterek hak, nen, ap tentara esa hokho logalek mene lagunem ineisok abolok folongum-folongum ikherek hak igik, nen Allah Omame Mondok Hokho mene a'nogo ane ugunem hak igik, ugunem nesanggo holhi. Nen, it inebe tarogo lagi'lek alokhogo were'ma re, inogolabi yinggilogo welagaikha isigi.

²⁵ Oba nen he it inunggulmo huli eil ambolkwe po'lima nogo nen he ane ugu mene elok holu hak were'ma higi.

²⁶ Huli palek mene a'nogo ambolkwe re, ap inenupogot inebe hurek welagaikharek oba takhta obalik hangge ekhe were'ma, elokhe helep onggo hokho mene enu nilam andi hangge hilingik welaga, nen takhta a'nogoba re afuni hangge mene hurek welaga higi.

²⁷ Ambolkwe andoma re, no tembaga endu elema nen aik weakhogo wera'lagarek hak ombak-bagen selegeratunem higi. Nen, huli warek a'ma fikhit he, lia fiarogo mondok yararet hikhi laga,

²⁸ a'nogo hilingitunem elokhonggen hunik-hunik uare o meiso nunggunem ohena anggelegelekwe lagaikherek hangge hilingi'mo yethigi. Wene andi re At Tuhan ebe ombak-bak hokho meneba logolik yararet hugunem neilenggen higi menere, andi.