YAKOBUS 1 - Allah Wene Fano Wene Hupla Inane

Hai warinafikhe wene

^1-2 At Iblis nen hinendawinggen kagaligeluk yi enggin ti enggin hinoba fugunem hinendawimo hinagaiyek hikhi logoni o.

³ A'nogo hinoba fugunem, Allah nen he: ”Inendawinggen an noba eberogoat himbirik werega? lega,” iluk, hinobabut pali'logo andiba hinendawinggen hambukhogo logouwageluk hilinghinabi'logo andi hinelu o.

⁴ Hinendawinggen lebelekhogo ekhe welagi'lek mondogat higithogo wurik asuageluk he, hinendawimo pugagi'lek hinendawinggen hambukhogo logoni o.

⁵ Menere, at Allah obabut fano nen afuni mondogat endawi logolik wenagisigi'lek wogisikherek andi nen he, hit ekhe hinendawimo kagalek lek mene nen kino yagasumo hinendawinggen kagalek mene wogisagain aro.

⁶ Afuni ekhe nen he, ”Allah nen wo'nesigina? Lega,” iluk, menenei ebeti logolik kino yagatarek mene andi re, sogoi en i ha'abu hesangge-pesangge waterek andi hak yagati lagep andi nen he, wo'nisoageluk halok he, hinendawinggen nineisena Allahba eberogoat himbiret fulugen kino yagati logoino o.

^7-8 Afuni a'nogo kino yagatarek mene andi, inendawinggen pire logolik yi mene ti mene hilingisuogeluk, ”An yi'nogo hilingisigin,” iluk furogo igin lek andi nen, ”Ninoe Enupogoren ekhe wo'nesiginat,” iluk anggagain mondok lego.

”Hit Allah againafuri hinenggi lek mene inom, werek mene inom, hinendawinggen yi'nogo anggogoin,” iluk yagaisasikhe wene

⁹ Hit Allah againafuri hinenggi lek mene ekhe inawe a'ma logolik he, ”An Allah nen kainet nobagaikhemo welagi,” iluk hinendawimo hinagaiyek anggogoin o.

^10-11 Menere, mo aninirogo yati logolik, e engga sawet agik, enggen lologo puluk elokhonggen weak agik, ikherek hak, a'nogoat he, it kaindek inenggi werek mene andi, yi mene ti mene oan hilingitu were'ma inebe lek asugun mene werek andi nen he, hit ekhe hinenggi werek mene hinebe kainat logolik, e enggen lologo pikherek andi hak, ”An nenggi werek yi lek asigin aro. Allah nen nenu sebelogo nobagaikhemo welagi,” iluk, hinendawimo hinagaiyek asugun aro.

”Weak hilingitarek andi, inonggwaregen inendawinggen kagalogo, weak hilingitarek,” iluk yagaisasikhe wene

¹² Hit ekhe Iblis nen hinendawimo kagaligeluk yi enggin ti enggin hinoba fugu kwelek, hinafe morogo logogun halok, hinendawimo hinagaiyekhogo logoguno. A'nogo hinafe morogo logogun halok, Allah nen he, ”An nebe hinendawi mene halok hineluk mondok logogun mene wokhisagain o,” iluk, abok yaganisasikhe a'nogo hit hinobabut palogo nenat wokhisagain o.

¹³ At Allah re weak mene nen endawimo kagalu lek hak. Nen, aren ogo re, afuni ekhe weak hilingisuageluk inendawimo kagalherek legat andi nen he, hit ekhe hinendawimo nen he, ”An weak hilingisuageluk Allah nenat nendawimo kagali'logo,” iluk anggogoin elo'lego.

¹⁴ A'nogo meneat he, ninebe lombok ninonggwarek ninendawimo nen yi mene ti mene ninamolo iluk anggogorek mene andi nenat ninebe wo'ninafik, miminget ninafik, ikhi logolik, ninendawimo kagalherek andi.

¹⁵ Hobuk ninendawimo nen yi mene ti mene ninamolo nek anggogorek mene andi, hemi nen omalik taginafarek andi hak, nina'ma aga halok, eak tagaisogo weak hilingitorek andi. Nen, weak hilingitorek mene andi wurik aga halok he, eak tagaisogo ninebe wa'lagorek andi.

¹⁶ Nerugwi nagaila'lak. Hinebe nendawi e. Hinonggwaregen hinebe lalegep hanogo iluk yagahisigi andi.

¹⁷ Nineisena Allah pogoroba mene a'nogo nenat yi mene ti mene fano mene wo'nisigik, mondok higit mene pela'nisa wagik, ikherek andi. Arenat pogoroba selek welagarek mene andi elalhikhesik he, at ebe hunogoat hilinglagik, obabut munenogo mum agik, selek agik, ikherek lek.

¹⁸ Yi mene ti mene elalhikhe mene mondogat manggusa hangge re, nirat logouwageluk, at onggwarek endawimo anggaluk ane ebe wene andibaat ta'ninafikhemo welago.

”Wene hinesanggo holiluk, higithogo hilingiti logogun,” iluk yagaisasikhe wene

¹⁹ Nerugwi nagaila'lak. Hinebe nendawi e. Wene yi hinendawimo eberek logoni o. Hinebe lombok wene hinesanggo weak-weak holiluk he, hinaneba nen erogat yagaisigik, hina'mage lagai wagunem hinendawinggen sebelogo logombigen erogat igik, ikhi logoino o.

²⁰ Afuni ina'mage weak hilingitarek mene andi, Allah endawimo amolo anggikherek mene hilingitarek lek.

²¹ Andi nenat, yi weak ti weak inenggali lek hilingirik nikhi lagep mene andi herakfisigik, weak hokhorogoat hilingirik nikhi lagep mene andi herakfisigik, ikhi logoino o. Wene fano wene Allah nen hinendawimo awi yagaisogo fikhe mene andiba elok telhinabigin andi nen he, at awe a'ma kuluk, aren wene hinendawinggenma kagali'logo mene andiat wanhi logoino o.

²² Wene Allah ane andi hinesanggo nek holfuluk kamo umo re, hinonggwaregen lalogoin andi nen he, hinesanggo holfuluk higithogo hilingiti logoino o.

^23-24 Afuni ekhe wene Allah ane andi inesanggo nek holfuluk, wene andi higithogo hilingiti'lek halok, afuni inelokhonggen inafumak oba kumuthaluk he, inebe ale'ma laluk, ”Nebe ariginik higi,” iluk, eberek welagi'lek weak-weak inonggot agarek andi hangge aro.

²⁵ Nit afuni ninenggi hele warek hak were'ma, nineisena Allah nen fano weneba komotninaferek andiba fikhalninaferek. Halok, sa nen wene andi esanggo nek holfuluk he, onggot agarek fuk. We, higithogo futfuluk, oba eberek mondok logolik, wene andi higithogo hilingite halok, yi mene ti mene hilingitunem, Allah nen endawinggen agaiyekhogo lebethikhi logogino.

²⁶ Nen, sa nen, ”An Allah awe a'ma logolik higithogo hilingiti lagi,” iluk anggikhi logoligat he, ane elugun ware'lek hesangge-pesangge ikherek halok, onggwaregen lalikhi logolik, Allah endawimo fanorogo hilingiti lagi iluk, we tulemat hilingiri'logo o.

²⁷ Nineisena Allah nen he, ”Afuni nen an nendawinggenma fanorogo higithogo mondok hilingiti logogun he, yi'nogo. Yenggerugwi suarek mene inom, hemi sogwe mene inom, nong a'luk were'ma leberisigik, afuni kweangma weak hilingiri'lagwi mene andi inobabut wanhi'lek inonggwaregen tegeligik, ikhi logogun o,” iluk endawimo anggikherek andi.