WAHYU 9 - Allah Wene Fano Wene Hupla Inane

¹ A'nogo malaikat inebe enggaminogo mene inambinggong anet hagasi'mo nen, ekhe ambinggong anet hugunem he, hesagal ekhe nen kweang a'ma ma'lima pagarek mene kwe husuageluk kunci enggen wogetemo pogoroba nen kweangma pi wagunem yethigi.

² Pi wagasik, kweang a'ma ma'lima kwe hutunem he, endu so'le lei fatunem hokhorogo lagaikherek andi hak, kwe hurikwe andi nen, so'le lagakhi logolik he, mo inom, pogot inom, mum hilingisogo fugunem yethigi.

³ So'le andi elonggoma nen he, yi pulue ti pulue ililim aigen libilinaferek andi hak, afuni aigen libilinafi logouwageluk eisewerek fisagama, so'le anggele'ma nen lagai waga lagaikha.

⁴ It pulue andi yagaisikhi logolik he, ”E ebe inom, engga inom, yi mene ti mene awi yago hunogoat mene ekhe inom, mondogat weagetfagain mondok lego. We, afuni Allah enegengge inelhaba lisu pale'lek mene halok weagerinabino,” iluk liakfisa waga lagaikha isigi.

⁵ A'nogo liakfisa waga logolik, ”Afuni inebe mondok pinggi inoasugun lek. We, ililim aigen libilinafunem heinet weak watarek andi hak, tugi fuaben logolik, heinet likwano wati logouwago,” iluk yagaisagama isigi o.

⁶ A'nogo hilinginafunem ouen likwano ikhi logolik, ”Ninebe katokhogo wa'la'lo e,” iluk wa'lasuogeluk inonggwaregen yi walhigik ti walhigik ugun mene re, inebe lebekhogo wa'lasugun lek, iluk isikhemo andi nen he, wa'lagi'lek heinet enek watu mondok logogun o.

⁷ Nen, it pulue andi inebe re, wam kuda, afuni nen amboroba hu'la'luk weim yabi louwogeluk esa fologo fisugunem welagaikharek andi hak welagaikha. It andi inelokhonggen he afuni inelokhonggen hangge. mene inunggul oba re kware-kware hangge emas mene ugu.

⁸ Nen, inesi re, hemi inesi hangge. Nen, inaik he, mene olomene enu singa andi mene aik hangge.

⁹ Nen, inamigenggen oba re, sing itarek andi hak, posiemanggen mene ugu. Nen, inogolabi ane re, ap weim yabi louwogeluk wam kuda esa hokhorogo nen kereta hangge meneba sep hun-hun lisogo woginarek lagunem, eisok ane mimi hokhorogo ikherek andi hangge.

¹⁰ Nen, inagenggum he, ililim agenggum aik werek mene hangge were'ma re, tugi fuaben logolik inaigen afuni libilinafi logouwageluk eisewerek fisagama libilinafi lagaikha isigi.

¹¹ Nen, it andi inoe kain enupogot ferinarek welagarek mene malaikat kweang a'ma welagarek mene a'nogo, at enu re, nit ninaneba, weagerinaferek u hak, it afuni Ibrani mene inaneba re, enu Abadon igik, nen, it afuni Yunani mene inaneba re, Apolion igik, agarek mene a'nogo yethigi.

¹² A'nogo weagerinabigin mene re, ekhe weagerinafesik, hobuk enggi pireba ekhe weagerinabigin mene oan werego.

¹³ Malaikat inebe fuaben mene inambinggong a'nogo anet hagasi'mo nen he, ekhe ambinggong anet hugunem yi mene ti mene Allah faget noletarek mene obuluk, ebe emas meneba unggut fena-fena enggaminogo hilingi'mo wam sapi andimuk hangge nginganok ili'lagoba andoma nen inane ugunem holhi o.

¹⁴ At ane andi nen he, at malaikat ekhe, falfalik mene a'nogo ambinggong anet fikhe mene a'nogo anet hugunem enggimo fisogo were'ma mel yagate: ”Malaikat inebe enggaminogo mene i hokho enu Efrat era'lu hele warek werek omanaga hele fikhalinabi lan o,” iluk yagate.

¹⁵ A'nogo yagate andi re, it malaikat andi nen afuni inebe henagan oba minggilogo fisaluk, pire herakfisikhi logolik, ekhe tahun andiba, tugi andiba, inenggi andiba, jam andiba, inebe mondok inoarik logoin o, iluk fageat Allah nen inayonggo fesikhemo kagalek were'ma, hele fikhalinafunem neilenggen isigi.

¹⁶ A'nogo isigiri'mo nen, hobuk yaganeti logolik he, ”Ap tentara hokhorogo wam inanggo kuda ebe lombok amboroba hurek were'ma isegen andi inebe mondogat he 200 juta nen werek,” iluk yaganetunem nesanggo holhi.

¹⁷ A'nogo holhiri'mo nen, hobuk wam kuda inom, afuni amboroba hurek mene inom, nabikanggoba yethigi. It andi inamik oba su sing itarek andi hak ugu were'ma isigi. A'nogo isigi andi re, it ekhe inasu elokhonggen endu amulok hangge mene ugu, nen, it ekhe, inasu pogot elokhonggen muli hangge mene ugu, nen, it ekhe inasu elokhonggen wei aborok hangge mene ugu, nen, inanggo kuda omanogo ungguloak he, mene olomene enu singa andi mene ungguloak hangge. Nen, inambelema nen he, endu inom, so'le inom, hendali al hangge amben weak mene enu belerang andi mene inom, wulibi waga laga.

¹⁸ A'nogo endu inom, so'le inom, belerang amben weak mene andi inom, ebe henagan weagerinaferek mene andi, inambelema nen wulibi waga logolik he, afuni inebe henagan oba minggilogo fisaluk, pire herakfisikhi logolik, ekhe inebe pinggi mondok inoarik laga lagaikha isigi.

¹⁹ It inambelema nen a'nogo inoatik, nen, inagenggum kisu unggul inom higit mene re, a'nogo inoatik, ikhi lagaikha isigi. It wam kuda andi inomame re, inambe inom, inagenggum inom, andiatma, afuni inebe a'nogo yi enggin ti enggin inoba fuluk inoati lagaikha andi.

²⁰ A'nogo meneat he, it afuni fenakwe inoati'lek mene andi nen, munggwarengge obabut weak mene oba himbirik logolik, inenggi nen tugwi kembu emas mene inom, perak mene inom, tembaga mene inom, helep mene inom, e mene inom, wurogo hilingitarek andi. A'nogo wurogo hilingitarek andi, it tugwi andi nen, ineilenggen isagarek legat, inesanggo holharek legat, kwe lagaikharek legat, meneat he, a'nogo wurogo fesukwasik,

²¹ afuni ekhe inebe anggwe werek inoatik, anggwelek inoatik, pailak fakfisigik, inenggi abisak wanhik, ikhi lagaikha mene herakfisaluk inobabut hebelagi'lek logolik he, weak hundigat mondok hilingiti lagaikha isigi o.