WAHYU 8 - Allah Wene Fano Wene Hupla Inane

Silo fagarek andi hak amusu te'merogo fesukwa mene 6 oba arat fikalhikhesigen, ekhe fikalhikhe wene

¹ A'nogo yaganetesi'mo nen, ombo'ne re, suesingga uan mene silo fagarek andi hak amusu ebe te'merogo fesukwa mene a'nogo, at Domba Eak a'nogo nen enggi 6 oba fikhalhesigen ekhe fikhalhunem he, pogoroba setengah jam o areng tiring-terengsek welaga higi.

² A'nogo welagasigen, hobuk neilenggen yethigi hak he, malaikat inebe 7 nen Allah elokhoma mendek were'ma pinggong ane hokho mene ebe 7 nenat wogisugunem hisigi.

³ A'nogo werek kwelek, malaikat hunogoat mene ekhe nen, lemesak emas meneba hilingik engge waluk he, yi mene ti mene Allah faget noletarek oba wagasik mendek welaga. A'nogo were'ma, Allah nen he, at againafuri mondogaren samban agarek mene inane inom, kemenyan inom, inomat nolesuageluk, kemenyan hokhorogo wogetemo, yi mene ti mene Allah noletarek oba andi, ebe at kain welagarek oba obuluk a'nogo elokhoma were'ma fei lagunem yethigi.

⁴ A'nogo fei lagunem he, Allah againafuri samban agarek mene inane a'nogo kemenyan amben malaikat a'nogo enggimo nen Allah elokhoma lagakhi laga higi.

⁵ A'nogo hilingitesik, hobuk he, at malaikat a'nogo nen endu yi mene ti mene Allah faget noletarek a'nogo mene wanhesik, lemesak a'nogo elonggoma kwalogo re, kweangma woukhogo pelakfisa waga laga. A'nogo pelakfisa wagunem he, eilabut hobugalep yararethikhi logolik, unggunggu ane hokho mene pak ilugen ane lulu lagik, lugul hokho lang-fanget higik, ugunem higi o.

Pinggong anethugunem hilinglagaikhe wene

⁶ A'nogo higiri'mo nen, ombo'ne re, malaikat inebe 7 nen omanogo pinggong hokho mene hangge ebe 7 nen anet houwogeluk hibil-hebelhogo hilingiti lagaikha isigi.

⁷ A'nogo hebelfuluk he, attak malaikat ekhe ambinggong anet hugunem he, meiso sogonggen inom, endu inom, mep inom, inom nanggelek-hanggelek hilingisogo kweangma woukhogo pelabi wagunem he, kweang inom, e hokhondek inom, ebe henagan oba minggilogo fagasik pire herakfikhi logolik, ekhe hali luphogo ninggik, engga helengga ket mene mondogat ninggik, ugunem yethigi.

^8-9 Andi hak, at malaikat attak ambinggong anet hasikhemo nen, hobuk at ekhe ambinggong anet hugunem he, tom hangge hokho mene ekhe endu amulok wulifunem he, hambokhogo i laut yenggele'ma pelabi wagunem, i laut inom, Allah nen elalhikhe mene i laut elonggoma welagarek mene inom, kapal hokhondek mene inom, andoma mene henagan oba minggilogo fuluk, pire herakfikhi logolik, ekhe weagetfugunem he, i elokhonggen mep agik, yi mene ti mene ima mene ekhe wa'lagik, kapal weagerogo figik, ugunem yethigi o.

^10-11 A'nogo it malaikat pire inambinggong anet hagasi'mo nen ekhe ambinggong anet hugunem he, hesagal hokho mene pogoroba nen esage ibilik hak amulok ibilik hangge pi wagasik, i elesikwe inom, i ebe hokho asi wagarek mene inom, henagan oba minggilogo fuluk, pire herakfikhi logolik, ekhe ale weak mene hilingisogo fikhi laga higi. Hesagal andi enu re, Aleweak. Aren a'nogo i ale weak hilingisogo fikhesi'mo andi nen he, afuni i nunggunem inebe hokhorogoat wa'laga lagaikha isigi.

¹² A'nogo malaikat inebe henagan andem inambinggong anet hagasik oba nen, ekhe ambinggong anet hugunem he, mo inom, tugi inom, hesagal inom, afuni yei inoatunem inomame lek agarek andi hak, inamulit henagan oba hakhogo minggilogo fuluk, pire herakfikhi logolik, ekhe mum a'luk yati'lek kamo ikhi logolik, o lingge misigat mene, hokhokwe mo yati la'lugen, endepkwe yati'lek kamo igik, o hup misik mene minggilogo, hokhokwe selek wela'luk, endepkwe mum mondok agik, ikhi laga higi.

¹³ A'nogo ikhesi'mo nen, hobuk yethigi hak he, sue pim hangge mene pogot halianggen oba ogolabi langhogo tarogo nikhi logolik, ane hokhorogo mel ikhi laga: ”Malaikat inebe enggaminogo inambinggong anet hagasi'mo nen, hobuk malaikat inebe henagan mene nen inambinggong anet hugunem, afuni mondogat kweangma welagaikharek mene, mondok weagerinabigin andi re, Eige! Nailo e! Nendawilage!” iluk ilik nugunem nesanggo holhi o.