WAHYU 7 - Allah Wene Fano Wene Hupla Inane

Afuni Israel mene inunggul enu lombok silo inelhaba fisasukwa wene

¹ A'nogo neilenggen isigiri'mo nen, ombo'nere, ap malaikat inebe enggaminogo mene nen pogot erokwe po'likwe-ma'likwe elikwe-yikwe sogoi funha wagarekwe, kwe elugun sebelogo mendek logolik, sogoi enggaminogo mene nenat kweanggwe funha waga logolik engga abologet higik, i laut yenggelek kwe funha wagik, inogo iluk inenggi fisogo were'ma yerisigi.

² It a'nogo werek kwelek, malaikat hunogoat ekhe o mo yegelogo liabi wagare'ma a'lima nen Allah eluk mondok welagarek mene asilo waluk wulibi wagasik, Allah nen it malaikat inebe enggaminogo mene nen kweang inom, i laut yenggelek inom, weagetfouwageluk eisewerek fisasikhe mene omanogo mel yagaisugunem holhi:

³ ”Niren, it nineisena Allah amingmingengge mene ninendawinggen wenggelogo Allah asilo inelhaba oan fisigi'lek welago andi re, kweang inom, e ero inom, i laut yenggelek inom, weaget fagain lego,” iluk yagatikhe.

⁴ A'nogo yagatikhesik he, afuni Israel mene nen tagongge mene inunggulenu lombok mondogat inendawinggen wenggelogo Allah asilo inelhaba fisilik lagaikhasik, ”Inebe huli 144.000 nen silo fisilik lagoma,” iluk ugunem holhi o.

^5-8 It inelhaba silo inobagaga andi inebe re, it afuni inunggulenu Yehuda mene re, 12.000 nen, it afuni inunggulenu Ruben mene re, 12.000 nen, it afuni inunggulenu Gad mene re, 12.000 nen, it afuni inunggulenu Asyer mene re, 12.000 nen, it afuni inunggulenu Naftali mene re, 12.000 nen, it afuni inunggulenu Manasye mene re, 12.000 nen, it afuni inunggulenu Simeon mene re, 12.000 nen, it afuni inunggulenu Lewi mene re, 12.000 nen, it afuni inunggulenu Isakhar mene re, 12.000 nen, it afuni inunggulenu Zebulon mene re, 12.000 nen, it afuni inunggulenu Yusuf mene re, 12.000 nen, it afuni inunggulenu Benyamin mene re, 12.000 nen, Allah asilo inebe lombok a'nogo inelhaba fisagasik he, ”Huli arigithigit warogo fisogoma werego,” iluk ugunem holhi o.

Afuni inebe hokhorogo inenggi wenasu elo'lek andogorek were'ma eilenggen isasikhe wene

⁹ A'nogo higiri'mo nen, ombo'ne neilenggen isigi re, yi afuni ti afuni inunggulenu lombok, inagap lombok, inawi lombok, inane lombok, su kut uandek laberek mene, afuni nen wuni wati logolik, feigengga sombologo inenggim wanharek andi hak, e engga mene inenggim waluk, Allah kain welagarek obuluk oba andoma Domba Eak emberek were'ma ineilhanem andogorek inebe huli yiba iluk, inenggi wenasu mondok elo'lek logolik, inane hokhorogo mel ikhi lagaikha:

¹⁰ ”Nineisena Allah kain obuluk oba welagendek mene, wau waia Domba Eak hemberek, wau waia Telninaferek mene ero hirat welagep,” wau waia ue iluk endawi wati lagaikha isigi.

¹¹ Andi hak he, Allah kain welagarek mene obuluk oba ebe tulem werek kwelek, it ap inaluendek omanogo inom, it Allah nen elalinafikhemo ineluk welagaikharek mene ekhe inebe enggaminogo mene nen omanogo inom, era'lukwe yiling-walinghogo werek kwelek, it malaikat inebe mondogat inabel endakwe yiling-walinghogo logolik, inelokhe sagam Allah awe a'ma kuluk fogerati lagaikha.

¹² A'nogo fogerati logolik, anggup yi'nogo ikhi lagaikha: Wa u wai a ”Ebe asuak u hak, Amin, Nineisena Allah halegat hokho, Yi wene ti wene helu mondok logolik, Hat homameba fetninarek were'ma, Hai wathafik, fogethafik, Agaugwethafik, esinethafik, Ugu mondok logogun andi, Ebe asuak u hak, Amin,” iluk wuni wati lagaikha isigi.

¹³ A'nogo ugu kwelek, it ap inaluendek omanogo mene ekhe nen heinok wo'niikhi logolik: ”It afuni inasu kut uandek mene laberek yoma re, sani. Nen, o koma nen wagaikha,” iluk heinok wo'niikhe.

¹⁴ Heinok a'nogo wo'niugunem, an nen he, ”Noe, an nonggot. Hat enek he, helu welagen o,” iluk yagatunem, aren he, mel yaganete: ”It afuni yoma re, o kweangma were'ma afuni ekhe nen yi enggin ti enggin hokhorogo hilinginafunem, Allah nen telinafikhemo, inasu Domba Eak amep oba arat kut mondok sobalaga mene o.

¹⁵ A'nogo hilingitasik andi nen he, Allah kain welagarek mene obuluk oba ebe were'ma eilhanem mendek logolik, at awi wuri'mo at faget linggene hubanggo hilingitu were'ma, at kain welagarek obuluk oba werek a'nogo nen, afuni nen mo aik inoasinogo iluk, o wutarek andi hak, at ebe nen it sebelogo ferinarek logogin o.

^16-17 A'nogo fisamo were'ma, Domba Eak a'nogo Allah kain welagarek mene obuluk oba ebe tulem logolik, afuni nen wam konharek andi hak, it kwelaginarek mondok logolik, i afuni inebe inelugerinaferek mene noageluk, i elesimo woginarek lagik, Allah nen ineil amusu tetik, ikhi logogun andi nen he, sumburu inom, i inom, nele aga logogun mondok lego. Nen, mo nen inom, endu nen inom, aigen heinet wati logogin mondok legaro,” iluk yaganete.