WAHYU 6 - Allah Wene Fano Wene Hupla Inane

Silo fagarek andi hak amusu te'merogo fesukwa mene Domba Eagen fikhalhikhe wene

¹ A'nogo higirik oba nen, hobuk silo fagarek andi hak, suesingga uan mene amusu ebe 7 ba te'merogo fesukwa mene a'nogo, Domba Eak a'nogo nen, ekhe omanggum fikhalhunem he, it Allah nen elalinafikhemo ineluk welagaikharek mene inebe enggaminogo mene ekhe nen omanogo mene ekhe nen he, ”Eme o,” iluk ane unggunggu ane hangge ugunem nesanggo holhi.

² A'nogo ugunem, neilenggen yethigi hak he, ap ekhe sikhe waluk kware-kware ap inenupogot ikfisagarek mene unggul oba ikfagama, wam kuda esi mola kut mene amboroba hurek logolik, o sebeligeluk sebelik nugunem yethigi o.

³ Nen, silo fagarek andi hak, suesingga uan meneba amusu te'merogo fesikhe mene a'nogo mene, at Domba Eak a'nogo nen ekhe attak fikhalhesigen, ombo'ne ekhe fikhalhunem he, it Allah nen elalinafikhemo ineluk welagaikharek mene omanogo ekhe attak ane isikhemo nen ombo'ne ekhe ikhi logolik: ”Eme o,” iluk ugunem holhi.

⁴ A'nogo ugunem he, wam kuda esi mep mene ekhe lagunem yethigi. Nen, ap mene ekhe re wam kuda andi amboroba hurek nugunem mel yagatunem holhi: ”Afuni kweangma mene inoba lioksek fano logogun lek. Athe, afuni ekhe nen ekhe watik, wat-wat ikhi logouwageluk, hat eisewerek hobagogo,” iluk karok hokho mene wogotama wam kuda a'nogo amboroba hurek nugunem yethigi o.

⁵ Nen, silo fagarek andi hak, suesingga uan meneba amusu te'merogo fesikhe mene a'nogo, Domba Eak a'nogo nen pireba fikhalhesigen ekhe fikhalhunem he, it Allah nen elalinafikhemo ineluk welagaikharek mene omanogo, inebe pire arat inane agasi'mo nen, ekheba re, ”Eme o,” iluk ugunem holhirik, yethigi hak he, wam kuda esi muli mene ekhe lagunem yethigi. Nen, ap ekhe enggin walhugungge enggimo waluk wam andi amboroba hurek nugunem yethigi o.

⁶ A'nogo nugunem yethigirik, nesanggo holhi hak he, it Allah nen elalinafikhemo ineluk welagaikharek mene inebe enggaminogo omanogo inendawimo nen afuni inane hangge mene mel ikhe: ”Gandum enggen ilirengge waruk oak misigat enek kwalogo re, onggo yabu inenggi misigam faget hilingitunem inenggi onggo wogisagarek andi hak mondogat fogoin o. Nen, hombak enggen hangge enu jelai andi mene ilirengge waruk henagan meneba kwalogo re, onggo yabu inenggi misigam faget hilingitunem wogisagarek andi hak mondogat fogoin o. A'nogo meneat he, minyak e zaitun amusu inom, anggur amusu inom, andi nek he, weaget fogoin lego,” iluk ugunem holhi.

⁷ Nen, silo fagarek andi hak, suesingga uan meneba amusu te'merogo fesukwa mene a'nogo, Domba Eak a'nogo nen, enggi henagan oba arat fikhalhesigen, ekhe fikhalhunem he, it Allah nen elalinafikhemo ineluk welagaikharek mene omanogo inebe henagan menere inane arat agasi'mo nen, ekheba re, ”Eme o,” iluk ugunem nesanggo holhi.

⁸ Holhirik, yethigi hak he, wam kuda esi afuni wa'lasuogeluk inelokhonggen mola agarek andi hak mene nugunem yethigi o. Nen, inebe wa'lagaikharek andi ero, afuni hangge agasik he, wam andi amboroba oba hurek nikhi laga. A'nogo nugunem, at ombo'ne re, kweang a'ma pagarek andi, afuni hanggeat agasik he, emberek nugunem yerisigi. A'nogo nikhi logolik, afuni kweangma mene mondogat inebe enggaminogo oba nen minggilogo fisaluk, henagan oba inoati'lek herakfisaluk, ekhe nek afuni ekhe nen karok oba inoatunem wa'lagik, sumburu nele nen wa'lagik, ou ero hokho meneba wa'lagik, mene olomene inom, wam maro inom inaigen libilinafunem wa'lagik, ikhi logouwageluk eisewerek fisagama nugunem yerisigi o.

⁹ A'nogo isigiri'mo nen, ombo'ne re, silo fagarek andi hak, suesingga uan meneba amusu te'merogo fesukwa a'nogo mene, Domba Eak a'nogo nen enggi enggaminogo oba arat fikhalhesigen, ekheba fikhalhunem he, afuni Allah ane ninghogo wanhukwasik, it ekhe yagaisikhi lagaukwa andi faget inoatukwa mene inareagun he, Allah anggo warogo endu noletarek oba a'ma andoma were'ma yerisigi o.

¹⁰ It a'nogo logolik, inane hokhorogo mel ugunem holhi: ”Nineisena Allah homame hokho tegelek mondok logolik, higithogo nek hilingitendek mene nineisena. Henggi miren logombigen afuni kweangma mene nen nit ninoatukwa a'nogo ninunggulmo wene inoba fembik inoasigin nogo?” iluk yagati lagaikhama,

¹¹ aren he, ”Hinerugwi hinagaila'lak fenakwe hinom an faget hilingiti lagagip mene, hit hinoatukwa andi hak, inoasugun mene oan werek andi nen he, it faget nenangorogo set walogo eil misik logoino,” iluk yagaisikhesik, inasu kut mene inebe lombok ikfisugunem yerisigi o.

¹² A'nogo yerisigiri'mo nen, ombo'ne yethigi hak he, suesingga uan meneba silo fagarek andi hak, amusu te'merogo fesukwa a'nogo mene Domba Eak a'nogo nen enggi fuap oba arat fikhalhesigen, ekhe fikhalhunem he, lugul hokhorogo lang-fanget higik, o mo elokhonggen mum hal-hali warek hangge hilinglagik, tugi elokhonggen afuni inamep hangge agik,

¹³ hesagal andi, e ara enggen oan mene sogoi aninirogo funha wagunem, kweangma lologo pi wagarek andi hak, a'nogoat pogoroba nen lologo kweangma pi wagik,

¹⁴ pogot andi re, lisu palek yinggilik mene andi hak, yinggilogo legagik, tom unggul inom, i enggen kwe inom, welagarek kwe omanogo lombogen higilogo amumu lagunem yethigik, ugunem yethigi o.

¹⁵ A'nogo hilingitunem he, afuni kweangma mene, ap inenupogot mene inom, kaindek mene inom, inogogwi kaindek mene inom, inenggi werek mene inom, inenuwerek mene inom, afuni inebendek, inamingmingengge inebe mondogat inom he, omoukwe hina'lagik, tom oba helep anggwe folelekwe hina'lagik, ikhi lagaikha isigi o.

^16-17 A'nogo hinago logolik, tom inom, helep inom, inoba re mel yagaisikhi lagaikha: ”Allah anini ninoba fagain a'nogo arat horok asi waga yoma re, sa hagen endawinggen puk asimbik sebelhaluk logogin anggegep? Elo'lego. Andi nen he, hiren, at kain welagarek obuluk oba werek andi nen elokhe age watnisigik, Domba Eak andi a'mage ninoba fuluk ninoatik, ugun yi re, sanokhogo ninebe sebelninabimbik he, hina'ma hinakninobagani o,” iluk kino yagaisugunem nesanggo holhi o.