WAHYU 3 - Allah Wene Fano Wene Hupla Inane

Wene Allah againafuri o Sardis mene faget yagatikhe wene

¹ A'nogo yaganetesik hobuk yaganeti logolik: ”Allah Areagun ebe katoksek mondok iluk, 7 nen a'nogo eise welagik, hesagal ebe 7 nenat a'nogo nenggim fisogo welagik, igirek mene a'nogo nen wene yi yagahesik: At Allah nen malaikat ayonggo fuluk lakfei wesu hak, at againafuri o Sardis andogotarek mene inayonggo fesikhemo werek a'nogo, wene an nen it yagaisagain mene yi, haren lisu palogo inoba lakfeinogen yi'nogo palin: Hit o Sardis mene afuni nen hinabok ikhi logolik, it ineluk werek, iluk, ili'lagwi meneat he, hinebe warek hangge logolik hinobabut hilingiti lagep mene andi an nelu o.

² An nen hit hinobabut palhi lagi re, neisena Allah eilhanem fano katokhogo hilingiti lagep lek. We, horogat wa'lasugun hinendawinggen pasalouk welagep andem obaat, siakhogo menla'luk he, hinenggisok hambuget akhaluk, hinomame a'no o.

³ Hit a'nogo siakhogo menla'luk hinomame agi'lek halok he, afuni yogot wanuogeluk hinagaisogo wagaikharek andi hak, an a'nogoat, hiren, At yi sambul wesigin iluk, hinonggotma wesinogo iluk he, wene omanggum yagahisasukwama hinesanggo holhigip mene hinendawimo ebetfuluk he, weak hilingiti lagep mene fakhogo herakfisaluk hinobabut hebelasimbik, wene andiat hinenggi ninghogo fisogo logoino o.

⁴ A'nogo meneat he, hit afuni o Sardis mene hinebe endebat ekhe, afuni nen inasu sobalek mene muli mene oba labulasinogo iluk tegelogo welagaikharek andi hak, weak ekhe hilingiti'lek werek andi, inasu kut mene labesugun obaat laberogo nen an ninom nikhi logogun o.

⁵ Sa nen omame asigin halok he, su kut mene labetfagain o. Nen, an it afuni inelugerinafirek mene halok inenu buku eluk-eluk meneba palek werek a'nogo terogo lakfisagain lek. An neisena inom, malaikat yonggo lakfisa wagarek mene inom, ineilhanem, it yi an nagainafuri o, iluk inenu fakhogo yagaisagain,

⁶ iluk, igi mene andi, Allah Areagun en it Allah againafuri o yi awi ti awi andogotarek mene inoba yagaisili'logoat andi, hinesanggo holugun halok he, fanorogo holino o, iluk yagaisigi mene andi, lisu palogo inoba lakfeino o,” iluk yaganete.

Wene Allah againafuri o Filadelfia mene faget yagatikhe wene

⁷ A'nogo yaganetesik hobuk yaganeti logolik he: ”An weak hilingiti'lek, tegelek logolik, nane eberogoat enek igirek mene nen kwe hutarek mene Daud mene waluk kwe huti halok, afuni ekhe nen yagasugun elo'lego. Nen, kwe yagati halok, afuni ekhe nen husugun elo'legat mene a'nogo nen wene yi yagahesik: At Allah nen malaikat ayonggo fuluk lakfei wesu hak, at againafuri o Filadelfia andogotarek mene inayonggo fesikhemo werek a'nogo, wene an nen it yagaisagain mene yi, haren lisu palogo inoba lakfeinogen yi'nogo palino.

⁸ Yethani! Hit hinobabut hilingiti lagep he, hinomame mondok endebat meneat he, an nane hologo higithogo hilingitik, nabok labelhi'lek fakhogo yagaisigik, ikhi lagep andi an nelumo re, hit faget he, kwe afuni ekhe nen yagasugun mondok elo'lek mene hurogo hinobagagi o.

⁹ Yethani! It afuni Iblis againafuri andogotarek mene inebe Yahudi mene lek meneat he, ineranenat, nit ninebe Yahudi mene, iluk agarek mene andi, hit hinawe a'ma kwi we'luk, an hit nendawinggen hundik welagirek andi inelu asuageluk, it inebe hit hinoba fisa wesigin o, iluk eberogoat yagahisigi.

¹⁰ A'nogo fisa wesigin andi re, an nen, hinafe morogo logoino o, iluk yagahisasigi mene andi, nane hologo higithogo hilingiti lagep andi nen, o hobuk Allah nen afuni kweangma yoma welagaikharek mene mondogat yi enggin ti enggin inoba fagain sambul andi fugu kwelek, hit enek he, an nen nawe a'ma fano fethinarek logogin o.

¹¹ An weak-weagat wesigin o. A'nogo wesimbik he, sa awewerek-sa awewerek laga logolik, inomame asugun mene onggo kware-kware ikfisagarek andi hak, onggo hit wokhisagain mene, it afuni ekhe nen telogo helanogo iluk, hit ebe wanhigip mene andi, hinenggi ninghogo fisogo logoino o.

¹² Nen, sa nen omame asigin mene halok, o anduli liafarek andi hak, at a'nogoat Allah onggwarek awi wuri'mo menogo fagain, neisena Allah enu inom, awi kota Yerusalem ket mene pogoroba nen pelabi wesigin mene andi enu inom, an nenu ket mene inom, an nen, at andi oba lisu palogo foumo re, at ebe o andoma nen wulibi wesigin mondok lego,

¹³ iluk igi mene andi, Allah Areagun en it Allah againafuri o yi awi ti awi andogotarek mene yagaisili'logoat andi, hit hinesanggo holugun halok he, fanorogo holino o, iluk yagaisigi mene andi, lisu palogo inoba lakfeino o,” iluk yaganete.

Wene Allah againafuri o Laodikia mene faget yagatikhe wene

¹⁴ A'nogo yaganetesik, hobuk yaganeti logolik he: ”Eroba nen, yi mene ti mene ero anat were'ma, Allah nen elalhikhe mene andi, at abok nobabut humbunhogo eberogoat enek igirek mene, nenu ebe asuak u hak, Amin, igirek mene a'nogo nen wene yi yagahesik: At Allah nen malaikat ayonggo fuluk lakfei wesu hak, at againafuri o Laodikia andogotarek mene inayonggo fesikhemo werek a'nogo, wene an nen it yagaisagain mene yi, haren lisu palogo inoba lakfeinogen, yi'nogo palin o.

¹⁵ Hit hinobabut hilingiti lagep mene andi, mondogat an nelu o. Hit hinobabut minhogo logolik, hinobakhe nene hilingiti lagep legat, nen, aganhanhogo logolik, anggilukhogo hilingiti lagep legat, we, hinobabut minat logolik hinobakhe nene logogun halok, andiat logogun, nen, aganhan logolik anggilukhogo hilingiti logogun halok, andiat logogun o.

¹⁶ Meneat he, hinobabut min legat, aganhan legat, we, min he a? Aganhan he a, seram welagep andi nen he, i seram en inambeba nen hemelogo wulakfisagarek andi hak, an nen hinebe wulakhinobagagin o.

¹⁷ Hit he, hinelagaigat, hineilenggen mumat, hinalfulukwaat, logoligat he, nit ninebe inendawi hak mondok weagat welago, iluk futfigi'lek, hiren ikhi logolik: Nit he, ninebe ninonggwaregen kainet fakhogosik, yi mene ti mene ninelagaik agi'lek, nineilmo werek welago, iluk ikhi lagep andi.

¹⁸ A'nogo welagep andi nen, hit kain hineilmo werek asubagaigen he, emas endumo weragaisogo fano hilingitarek mene noba onggo paligik, hinalfulukwa welagep mene andi, hinenggali asinogo nen he, hinasu laberouwogeluk su kut mene noba onggo paligik, hineilenggen mum mene andi, fano agunem yi mene ti mene yethikhi logouwogeluk, amusu hineilenggen ebene tesubagaigen noba onggo paligik, ubagaigen iluk komothinafi o.

¹⁹ A'nogo komothinafi andi re, it afuni an nendawinggen hundik mene halok, inebe lombok komorogo lambisogengge yei inoatirek enek andi nen he, weak hilingiti lagep mene andi herakfisaluk, hinobabut hebela'luk he, anggilukhogo hilingiti logoino o.

²⁰ Yethani! An nebe kweba mendek logolik, kwe ane papaget hikhi lagi o. A'nogo papaget hugunem, sa nen nane esanggo holimbik he, kwe hutneagain halok, an at oba kwi wesimbik he, sumburu ninggi logolik nagailak-hagailak higit nemberek hundik logogun o.

²¹ An arat nomame agagimo, neisena kain welagarek mene obulu'mo nemberek welago yi hak, sa nen omame asigin halok, an kain welagirek nobulu'mo nemberek logouwogeluk menfagain o,

²² iluk igi mene andi, Allah Areagun en it Allah againafuri o yi awi ti awi andogotarek mene yagaisili'logoat andi, hinesanggo holugun halok he, fanorogo holino o, iluk yagaisigi mene andi, lisu palogo inoba lakfeino o,” iluk yaganete.