WAHYU 22 - Allah Wene Fano Wene Hupla Inane

¹ A'nogo yaganetemo higiri'mo nen ombo'ne re, Allah inom, Domba Eak inom, emberek kain welagaikharek oba inobulu'mo nen, i inelugerinaferek mene eil wurik weak inafumak hangge mene elesi wulibisogo re,

² o kota andi, kwe ebekwe esanggo fena-fena lagaikharek oba were'ma, i a'nogo tulem lagare'ma higi. A'nogo lagu kwelek, i aik eliba, yiba, e awi yago were'ma higi. E andi enggen nunggunem inelugerinaferek mene a'nogo, tugi misigat oba enggen ekhe itik, tugi ekheba enggen ekhe itik, mo lagagik, pigik, ugu kwelek tahun misigat oba enggen huli 12 nen iterek mene welaga. Nen, enggaba re, yi afuni ti afuni inunggulenu lombok fanorinaferek mene higi.

³ Nen, attak Allah nen afuni inom, yi mene ti mene inom, homan fisasikhe mene a'nogo wokhasikhemo andi nen he, hobuk o andi homan oba kotemo welaga higi. Allah inom, Domba Eak inom, emberek kain welagaikharek inobulu'mo a'nogo, o kota andoma tulem werek kwelek, it afuni Allah amingmingengge mene inendawinggen at oba eberogoat himbirik logolik, at faget hilingiti logogun isigi.

⁴ A'nogo logolik, Allah enu it inelhaba lisu pale'ma re, iren at elokhonggen ineilenggen hikhi logogun.

⁵ Nen, Allah ebe aselegen it inebe selegerinafu kwelek andi nen he, o hup aga logogin lek, nen iren esage ibilhi logogun lek, mo yagati logogin legat, werek kwelek it kaindek inenupogot logolik, afuni ekhe inawe a'ma fisaluk ferinarek mondok-mondok logogun isigi o.

Yesus wesigin wene

⁶ A'nogo isigirik were'ma, at malaikat a'nogo nen hobuk yaganeti logolik: ”Yi wene ti wene hilinglagunem yethilik wagen andi re, afuni nen, Wene andi eberogoat, iluk futfogoin mene o. Wene andi re, eil misigat welagi'lek weak-weagat hilinglasigin mene o. A'nogo menere, nineisena Enupogot Allah Areagun it ap at ane yagaisagarek mene wogisikherek mene a'nogo nen, an malaikat en, at amingmingengge mene yagaisoageluk laknobagai wagama wagi o,” iluk yaganete.

⁷ A'nogo yaganetunem at Yesus nen he, mel yaganete: ”Yethan! An weak-weak wesigin o. A'nogo wagunem sa nen yi wene ti wene lisu palek mene yi esanggo hologo higithogo hilingiti logogin halok, Allah nen fanot fugunem endawimo agaiyek asigin o,” iluk yaganete.

⁸ A'nogo yaganetemo, yi wene ti wene mondogat yi re, an Yohanes yaganetunem nesanggo holhik, neilenggen higik, igi o. A'nogo nesanggo holhik, neilenggen higik igirik he, at malaikat wene andi an neilenggen yethoageluk yaganeti laga mene a'nogo, neindep awi yagaisogo fogerasigeluk igi.

⁹ A'nogo meneat he, aren mel yaganete: ”A'nogo fuk! An a'nogo fogetnabugun lego. An nebe re, hat inom hagaila'lak ekhe at Allah ane yagaisagarek mene inom, it ekhe inebe mondogat wene lisu palek yi inesanggo hologo higithogo hilingiti logogun mene inom, ninom higit, ninebe at Allah amingmingengge nek hilingi'mo re, hendawinggen at Allah oba eberogoat himbiret fuluk, at enek fogerasugun o,” iluk yaganete.

¹⁰ A'nogo yaganetesik, hobuk yaganeti logolik: ”Yi wene ti wene Allah nen ikhe mene yi weak-weagat hilinglasigin andi nen he, silo fagarek andi hak, afuni yagaisagain lek, iluk wene hendawimo asimbik kamo igi'lek yagaisikhi logoino o.

¹¹ Yagaisugunem sa nen obabut weak enek hilingiti logogin anggikhe halok he, weak enek hilingirikhi logouwago. Nen, sa nen weak inabit mene nek hilingiti logogin anggikhe halok he, andi meneat hilingirikhi logouwago. Nen, sa nen Allah endawimo anggikherek mene nek hilingiti logogin anggikhe halok he, andiat hilingiti logouwago. Nen, sa nen ebe Allah faget fisaluk logogin anggikhe halok he, ebe Allah fagerat tegelogo fisaluk logouwago,” iluk yaganete.

^12-13 A'nogo yaganetemo, at Yesus nen yaganeti logolik: ”Ero inom, erembul inom, anatma re, omanggum eroba nen pikhit hobuk wurep oba netok mondok logogin mene nen, afuni inebe lombok inobabut hilingitarek mene higithogoat onggo wogisageluk waluk weak-weak wesigin o.

¹⁴ Nen, it ekhe inasu fanorogo sobalogo fakhaluk logogun mene halok enek he, Allah nen fanorinafunem inendawimo inagaiyek a'luk, e enggen nunggunem inelugerinaferek mene a'nogo enggen ninggik, nen o kota andoma kwe ambe palekwe nen wulifik-kwigik, ikhi logouwogeluk eisewerek asimbik logogun.

¹⁵ A'nogo meneat he, it afuni ekhe weak inabit mene hilingitarek mene inom, it wesagun anggwelek inoatarek mene inom, it pailak hilingitik, fakfisoageluk hilingitik, agarek mene inom, it afuni inoatarek mene inom, it inendawinggen tugwi kembu oba himbirik logolik fogeratarek mene inom, it inambeba nen lalinafik, yi mene ti mene hilingiti logolik, lalinafik, agarek mene inebe lombok inom, mondogat o kota andi abel endakwe logogun o,” iluk yaganete.

¹⁶ A'nogo yaganetesik, at Yesus nenat hobuk yaganeti logolik he, ”Yi wene ti wene yi abok, an nagot malaikat en hit nagainafuri o yi awi ti awi andogoti lagep mene mondogat yagahisoageluk hinoba lakfei wagi andi re, an Yesus nen aro. Nen, e asimit fulelherek andi hak, ap Daud en tagongge mene a'nogo re, an nebe aro. Nen, hesagal wap o mo yegelogo lagai wagarek higiren, liabi wagarek mene amulit hokho a'nogo re, an aro,” iluk yaganete.

¹⁷ A'nogo yaganetesik hobuk he, mel yaganete: ”Sa nen i nele nen nogoin inamolo halok he, i inelugerinaferek mene onggolek weat helambik noageluk, Allah Areagun inom, Domba Eak agwe ikhikhe mene a'nogo inom, emberegen ikhi logolik, Na we'ni o, iluk ugunem, sa nen it emberek inane ugunem inesanggo holugun mene nen, Na we'ni o, iluk ikhi logogun aro,” iluk ugunem holhi.

Wene wurep kobokhogo yagatikhe wene

¹⁸ An Yohanes nen hit ekhe wene hobuk hilinglasigin wene an yaganete mene andi hinesanggo holugun mene hinebe lombok, wene ekhe yi yagahisak: ”Sa nen wene lisu palhi mene yi werek kwelegat, wene hunogo mene oba labelhe halok he, Allah nen afuni wene inoba fembik weagerinabigin iluk ikhe mene lisu palogo figi mene yi higithogoat, Allah nen at andi wene ekhe inom mangorogo oba fembik ebe weaget fagain aro.

¹⁹ Nen, sa nen yi wene ti wene hobuk hilinglasigin mene yaganete mene lisu palhi mene yi werek kwelegat he, wene andi mene ekhe sebelogo pelafe halok he, e enggen nunggunem inelugerinaferek mene andi enggen ekhe at noageluk werek meneat he, Allah nen he, Hat nagain lek, iluk yagatik, nen, o Allah onggwarek awi kota a'nogo at andi eisewerek asimbik wulifik-kwigik ikhi logouwageluk werek meneat he, Allah nen, Hat kwigin lek, iluk, yagatik, igin,” iluk yagahisigi andi o.

²⁰ Nen, wene andi mondogat eberogoat iluk ikherek mene at Yesus a'nogo nenat, ”An weak-weak wesigin o,” iluk ili'logo. A'nogo ugunem, an nen he, ”Yesus noe. Hat weak-weak wesigin andi, ebe asuak u hak, Amin,” iluk igi.

²¹ Nen, hit Allah againafuri o yi awi ti awi andogoti lagep mene mondogat, nerugwi, nagaila'lak. Ninoe Yesus obabut fano a'nogo nen fethinarek logouwago.