WAHYU 21 - Allah Wene Fano Wene Hupla Inane

Allah nen pogot inom, kweang inom, ket mene hilingisigin wene

¹ A'nogo higiri'mo nen ombo'ne re, Allah nen pogot inom kweang inom attak mene legetfigik, i laut yenggelek legetfigik, ikhesik obali'mo re pogot inom kweang inom ket mene hilingisogo fikhemo were'ma higi.

² A'nogo hilingisogo fikhesik, at onggwarek awi sili o kota Yerusalem ket mene, hemi inaguni helowogeluk inalilingge li'lukhogo wanharek andi hak, at were'ma pogoroba nen pelabi wagunem higi.

³ A'nogo higiri'mo nen, hobuk nesanggo holhi hak he, at Allah kain welagarek obuluk oba a'nogo nen, at ekhe ane hokhorogo ikhi logolik: ”Yethani! Allah afuni inom mondok logogin mene, awi a'li yethani! A'nogo logolik, it at againafuriat logogun, nen, at Allah it ineisena inendawinggen oba eberogoat himbirik logogun meneat logolik, inom mondok logogun o.

⁴ A'nogo logolik, yi wene ti wene attak mene legetfisaluk, aren it ineil amusu arat terogo fagain andi nen he, inebe wa'laga logogun legat, inendawimo weak aga logogun legat, le aga logogun legat, heinet wati logogun legaro,” iluk ugunem holhi.

⁵ Nen, at Allah ebe kain welagarek mene obuluk a'nogoba logolik, mel ikhe: ”Yi mene ti mene mondogat ket mene elalogo figi yoma yethani!” iluk ikhesik, an mel yaganete: ”Wene yi faget, afuni nen he, Wene andi eberogoat, iluk futfogoin mene andi nen he, lisu palin o,” iluk yaganete.

⁶ A'nogo yaganetesik hobuk ekhe mel yaganete: ”Ero inom erembul inom anatma, An nebe re eroba nen pikhit, erembul oba netok mondok logogin mene nen, i nele agunem i inelugerinaferek mene i elesimo nen hinagaisogo we onggo legat wogisikhi logogin o.

⁷ At sa nen omame asigin mene halok, wene mondogat igi mene andi at eisewerek logogin o. A'nogo eisewerek logolik, an Allah at eisena endawinggen noba himbirik mene logogin, nen at an namlogoat logogin o.

⁸ A'nogo meneat he, it afuni ekhe inailo werek mene inom, Allah ane wanharesigen herakfisagarek mene inom, Allah abit mene hilingitarek mene inom, afuni inoatarek mene inom, pailak fakfisigik, fakfisoageluk hilingitik, agarek mene inom, wesagun anggwelek inoatarek mene inom, tugwi kembu oba himbirik logolik, fogeratarek mene inom, ineranen agarek mene mondogat inom, i laut endu mene yenggelek were'ma, hendali al hangge amben weak mene enu belerang inom amulok nunggu mondok welagare'ma andoma lakfisagain o. Lakfisagain andi re, inebe attak elama faget wa'lasimbigen hobuk wa'lasugun andi aro,” iluk yaganete.

O Yerusalem ket mene eilenggen yethasikhe wene

⁹ A'nogo yaganetesi'mo nen ombo'ne re, Allah nen wurep kobokhogo afuni weagerinabuageluk, it malaikat inebe 7 nen Allah a'mage i hak hinago waluk kweisali wagaikha mene omanogo mene ekhe wagasik mel yaganete: ”Domba Eagen agwe ikhikhe mene andi ebe yagahesumo heilenggen yethanogen eme o,” iluk yaganete.

¹⁰ A'nogo yaganetu kwelek, Allah Areagun noba louk i wagama re, at malaikat a'nogo nen wo'narek tom hokho uan meneba lagaikhesik, Allah onggwarek awi o kota Yerusalem pogoroba Allah nen pelabi waga mene a'nogo yaganetemo yethigi.

¹¹ O kota andi re, Allah ebe amulit fogeratarek hagatma re, helep amulitweak onggo hokho palharek mene enu pailuri pandan elokhonggen muli weak fano inafumak yabelanget hikherek andi hangge mene higi.

¹² Nen, leget pa'leget hokho uan wagane'ma re, kwe ambe 12 nen palek. Nen, kwe ambe palek ebe lombok oba re, afuni Israel mene inunggulenu 12 nenat lisu pale'ma re, it malaikat inebe 12 nenat kwe ambe bene lombok kagalek welagaikha.

¹³ Nen, o kota andi, mo yegelogo liabi wagarek fikhit he, kwe ambe henagan mene palek welaga. Nen, poikwe higit he, kwe ambe henagan mene palek welaga. Nen, mayikwe higit he, kwe ambe henagan mene palek welaga. Nen, mo ubuk ikherek higit he, kwe ambe henagan meneat palek welaga.

¹⁴ Nen, leget pa'leget waganek andi, obule helep ebe 12 nenatma re, at Domba Eagen inebe 12 nenat wenagaisogo inayonggo fuluk lakfisasikhe mene omanogo inenu lisu palek welaga higi.

¹⁵ Nen, at malaikat an wene yaganeti laga mene a'nogo nen, o kota a'nogo inom, kwe ambe palek omanogo inom, leget pa'leget waganek a'nogo inom, ilirengge emas meneba walhageluk fisogo were'ma yethigi.

¹⁶ A'nogo fisogo logolik ebe walhikhi logolik, o kota a'nogo onggut enggaminogo oba hilingi'mo aleget fena-fena uankwe inom, horokwe inom, emberek higitse'ma re, ilirengge a'nogoba walhikhi laga. A'nogo walhugunem, leget aleget fena-fena inom, anduli elugun inom, huli it inenggi wenatarek higit he, 12.000 nen, nen nit yoma wenatorek higit he, 2.400 kilometer hilinglagunem higi.

¹⁷ At malaikat a'nogo afuni nen walhagarek hangge leget pa'leget a'nogo walhikhe mene re, huli it inenggi wenatarek higit he, 144 en, nen nit yoma wenatorek higit he, 60 meter hangge agunem higi.

¹⁸ Leget pa'leget andi re, helep amulitweak onggo hokho palharek mene enu pailuri pandan andi mene hilingik. Nen, o kota andi ebe emas elokhonggen fano inafumak hangge mene higi.

¹⁹ O kota andi, leget pa'leget obule waganek he, yi helep ti helep onggo hokho mene enu permata mene eil fanorogo waganek. Helep obule nomor 1 enu pailuri pandan andi mene wurik. Nen, ombo'ne, helep obule nomor 2 enu nilam andi mene waganek. Nen, ombo'ne helep obule nomor 3 enu yakhut andi mene waganek. Nen, ombo'ne helep obule nomor 4 enu samarut andi mene waganek.

²⁰ Nen, ombo'ne re, helep obule nomor 5 enu pailuri sepa andi mene waganek. Nen, ombo'ne re, helep obule nomor 6 enu delima andi mene waganek. Nen, ombo'ne re, helep obule nomor 7 enu era'na sempakha andi mene waganek. Nen, ombo'ne re, helep obule nomor 8 enu pirut andi mene waganek. Nen, ombo'ne re, helep obule nomor 9 enu topas andi mene waganek. Nen, ombo'ne re, helep obule nomor 10 enu krisopras andi mene waganek. Nen, ombo'ne re, helep obule nomor 11 enu lasuardi andi mene waganek. Nen, ombo'ne re, ebe wurepma helep obule nomor 12 enu kecubung andi mene wagane'ma higi.

²¹ Nen, kwe ambe palek ebe 12 nen omanogo kwe sou ebe lombok helep onggo hokho mene enu mutiara andi mene hilingitarek. Nen, o kota andi kwe nikherek kwe mondogat he, emas mene elokhonggen muli weak fano inafumak hangge mene talek were'ma higi.

²² A'nogo higi meneat he, o kota andoma Allah omame hokhoatma yi mene ti mene hilingisu hagenek a'nogo inom, Domba Eak a'nogo inom, emberek inebe Allah awi wurik higit welagaikha andi nen he, Allah awi wurik ekhe were'ma higi lek.

²³ Nen, o kota andoma Allah amulit yatik, Domba Eak a'nogo esage hangge yatik, selekhogo yatu kwelek andi nen he, mo inom, tugi inom, yati logogun legat welaga higi.

²⁴ A'nogo amulit hokhorogo werek kwelek andi nen he, afuni kweangma mene inunggulenu lombok ekhe amulit andiba nikhi logogun. Nen, it ap kaindek inenupogot kweangma mene inagarek yi mene ti mene onggo hokho mene were'ma fogerinafarek mene andi waluk o kota a'nogo fei kwikhi logogunat.

²⁵ Nen, o kota andoma o hubagi'lek linggene mondok logogin andi nen he, leget pa'leget waganek kwe ambe palek ebe lombok, kwe sou yagati'lek hurik mondok logogin higi.

²⁶ Nen, yi afuni ti afuni inunggulenu lombok mondogaren fogeratik, agaugweratik, agarek mene omanogo waluk o kota andoma fei kwikhi logogun.

²⁷ A'nogo kwikhi logogun meneat he, afuni weak inabit mene hilingitik, ineranen wene igik, ikhi logolik inoba horinafi'lek mene re o andoma kwikhi logogun mondok le'ma higi. A'nogo meneat he, it ekhe ineluk mondok logouwageluk fanorinabigin mene halok inenu lisu palogo Domba Eak asuesinggaba fikhe mene nek o andoma kwikhi logogun higi o.