WAHYU 20 - Allah Wene Fano Wene Hupla Inane

Mo lagagik pigik ugu kwelek 1.000 tahun logogun wene

¹ A'nogo isigiri'mo nen, ombo'ne re, at malaikat ekhe pogoroba nen kwe kunci enggen kweangma ma'lima mene inom, hele kombi posiemanggen mene inom, enggimo waluk pi wagunem yethigi.

^2-3 A'nogo waluk pi wagasik, at kisu hangge hokho o endam en welagaikhe mene enu Iblis igik, Satan igik, agarek mene a'nogo, ebe fakfuluk, yi afuni ti afuni lalinaferek andi hak lalinafi'lek 1.000 tahun enggi hele warek kweang a'ma ma'lima logouwageluk pelafesik, kwe kolok yagarogo kwelakfisagarek andi hak, kwe kunci yagarogo fugunem higi. Andoma logombigen, fikhalogo liakfei wesugun obaat we endebat faget fikhalek logouwageluk fikhalogo liakfei wesigin.

⁴ A'nogo higiri'mo nen, ombo'ne re, ap kaindek inobuluk hokho were'ma andoma inebe hokhorogoat kain logolik, afuni ekhe inawe a'ma fisaluk ferinarek logolik wene inoba figik, kotik, ikhi logouwageluk eisewerek fisagama isigi. Nen, ekhe higi re, it afuni mene olomene hangge hokho mene a'nogo inom, ilirengge at ebe hangge hilingitarek a'nogo inom, fogerinafi'lek, enu hangge lisu palek a'nogo inendawinggen wenggelogo inelhaba hea? Inenggiba hea, wanhi'lek herakfisaluk, Yesus hilingiti lagaikhe mene yagaisilik nikharek mene faget inom, Allah ane faget inom, inalonggop palogo inoatukwa mene arat inambotkwe inelugetfisaluk menfisikhesik, at Kristus inom afuni ekhe inawe a'ma fisaluk ferinarek, mo lagagik pigik ugu kwelek 1.000 tahun welagaikha isigi.

⁵ Afuni wa'lagaukwa mene omanggum andiat inelugerinafesik menfisikhe isigi. A'nogo meneat he, it afuni wa'lagaukwa mene fena ekhe nek he, o mo lagagik, pigik, ugu kwelek inambotkwe inelugerinafi'lek 1.000 tahun hilingisuageluk fisikhemo were'ma isigi.

⁶ It afuni attak wa'lagaukwa mene ekhe hobuk warek mondok logouwageluk wene inoba fembik inoasumo wa'lasugun. Meneat he, it ekhe attak inambotkwe inelugerinabimbik, inebe Allah faget inobagagin mene andi nek he, inendawimo mondok inagaiyek hogoino. It andi hobuk wa'lagi'lek logolik, inebe Allah inom, Kristus inom, emberek eisewerek a'luk, o mo lagagik, pigik, ugu kwelek 1.000 tahun oba, it Kristus inom afuni ekhe inawe a'ma fisaluk ferinarek logogun isigi.

Iblis mabenet fisaluk endu aikmo lakfisagain wene

⁷ A'nogo isigiri'mo nen, ombo'ne re, o mo lagagik, pigik, ugu kwelek, 1.000 tahun arat logombigen, wurep kobokhogo re, Iblis enggi hele warek a'nogo hele fikhalogo liabi wesigin.

⁸ A'nogo liabi wagunem he, weim yabuogeluk, afuni inunggulenu lombok pogot ero-ero po'likwe, ma'likwe, elikwe, yikwe, welagaikharek mene lalinabigeluk inendawimo kagalik laga-laga higi. Andi re, o enu Gog mene inom, Magog mene inom, inoba weim yonggo lagasik, inebe mondok hokhorogo ial laut yenggelek esanggokwe welagarek andi hangge andogorogo fisikhemo welagaikha isigi.

⁹ A'nogo andogotasik, afuni Allah againafuri o kota Allah awi sili endawinggen hundik mene a'nogo esa folhasik were'ma o larogo inebe inoasuogeluk o peterogo kwi wesuogeluk ugunem he, endu pogoroba nen pi waga logolik, inebe hali luphogo ninggi laga isigi.

¹⁰ A'nogo nunggu kwelek, at mene olomene hangge a'nogo inom, at ekhe nen, ”An Allah ane yagaisikhi lagi,” iluk eranen lalinaferek mene a'nogo inom, i laut endu mene yenggele'ma hendali al hangge amben weak mene enu belerang inom endu amulok nunggu mondok welagare'ma andoma hambokhogo pelakfisasikhe mene a'nogo andoma were'ma, Iblis a'nogo hobuk inoba hambokhogo pelakfisikhemo inom andoma logolik, linggene hubanggo heinet wato mondok-mondok logogun isigi.

O wurep oba wene inoba figik, kotik, igin wene

¹¹ A'nogo higiri'mo nen, ombo'ne re, Allah kain welagarek oba obuluk hokho kut mene were'ma, at ebe andoma welaga higi. A'nogo were'ma pogot kweang mondogat at agaiserogo legasugun andi nen he, hobuk ineilenggen hogoin legat aga laga higi.

¹² A'nogo legagu kwelek, afuni wa'lagaukwa mene inenuwerek inom, inenu lek mene inom, at kain obuluk oba werek a'nogo elokhoma mendek were'ma isigi. A'nogo werek kwelek, suesingga mondogat fikhalhik, suesingga ekhe afuni ineluk mondok logouwageluk fanorinabigin mene halok inenu lisu palek mene fikhalhik, ikhi laga. A'nogo fikhalhaluk, it afuni wa'lagaukwa mene inobabut hilingiti lagaukwa mene suesingga andomaba lisu palek mene higithogoat wene inoba figik, kotik, ikhi laga higi.

¹³ Andi hagat, afuni fenakwe wa'lagaukwasik, i laut yenggele'ma welagaikharek mene, i laut en foinalogo wulakfisa wagik, afuni wa'la'luk kweang a'ma pisukwa mene, at wa'lagaikharek ero inom, kweang a'ma inom, eisewerek welagarek mene a'nogo nen liakfisa wagik, ugunem he, at Allah nen it inebe lombok inobabut hilingiti lagaukwa higithogoat wene inoba figik, kotik, ikhi laga higi.

^14-15 Wene a'nogo inoba fagain andi re, suesingga it afuni ekhe inebe lombok ineluk mondok logouwageluk inenu lisu palek a'nogoba pale'lek mene halok i laut endu mene yenggelek andiba hambokhogo pelakfisikhi logolik, kweang a'ma inom, wa'lagaikharek ero inom, inomat hambokhogo andomaat pelakfisikhi laga higi. A'nogo pelakfisikhi laga andi re, attagat elama faget wa'lagunem en, hobuk wa'lasugun menere, i endu mene yenggele'ma pelakfisagain andi aro.