WAHYU 2 - Allah Wene Fano Wene Hupla Inane

Wene it Allah againafuri o Efesus mene faget yagatikhe wene

¹ A'nogo yaganetesik hobuk mel yaganete: ”An nenggi ebekwe hesagal ebe 7 nen fisogo logolik, esage ibilogo fagarek mene ebe 7 nen eisok emas meneba hilingisogo telik omanogo esanggokwe werek kwelek, anggele'ma tulem nikhi lagi mene a'nogo nen wene yi yagahesik: At Allah nen malaikat ayonggo fuluk lakfei wesu hak, at againafuri o Efesus andogotarek mene inayonggo fesikhemo werek a'nogo, wene an nen it yagaisagain mene yi, haren lisu palogo inoba lakfeinogen yi'nogo palin:

² Hiren an faget hinafe morogo hinomamerogoat hilingiti logolik, it ekhe weak hilingitunem he, inoba lombok, iluk, komorinafi'lek herakfisikhi lagep lek. Nen, it ekhe Yesus nen lakfisa wagunem hak hilingisogo we'luk ugunem, hiren he, ineranen ili'lagwi, iluk inobabut enegat palhi lagebat. Hinobabut a'nogo hilingiti lagep andi, an nelu o.

³ Nen, afuni nen an faget yi enggin ti enggin hilinghinafu kwelegat, hiren he, At ninabit, iluk, heraknobagagi'lek hinafe morogo welagep andi.

⁴ A'nogo meneat he, omanggum hinendawinggen an noba hundik welagagip andi hak, yogondak a'nogo welagep lek andi nek he, weak hilingiri'lagwi, iluk hinobabut palhi lagi o.

⁵ Andi halok he, hit kobokhogo mondogat pegepsik welagep andi, hinendawimo ebetfuluk, hinobabut hebela'luk he, attak hilingiti lagagip andi hagat hilingiti logoino o. A'nogo hilingiti'lek halok he, an nebe wesimbik he, hit hinesage ibilik mene andi obali'mo nen kigilogo wokhagain o.

⁶ A'nogo meneat he, it ekhe ap Nikolaus obabut waganogo hilingitunem, an nen nabiret fisigirek hak, hiren ogo hinabiret fisikhi lagep andi nek he, fano o.

⁷ Wene igi mene andi, at Allah Areagun en Allah againafuri o yi awi ti awi andogotarek mene yagaisili'logoat andi, hinesanggo holugun halok he, fanorogo holino o. At sa nen omame asigin halok he, Allah eabumo enggen inelugerinaferek mene noageluk wogosigin o, iluk wene mondogat yagaisigi mene andi, lisu palogo inoba lakfeino o,” iluk yaganete.

Wene Allah againafuri o Smirna mene faget yagatikhe wene

⁸ A'nogo yaganetesik, hobuk yaganeti logolik, ”An he, eroba nen pikhit erembul oba mondok logogin mene a'nogo arat wa'lagagisigen hobuk neluk agagisik welagirek mene a'nogo nen, wene yi yagahesik: At Allah nen malaikat ayonggo fesikhesik lakfei wesu hak, at againafuri o Smirna andogotarek mene inayonggo fesikhemo werek a'nogo, wene an nen it yagaisagain mene yi, haren lisu palogo inoba lakfeinogen yagahesik:

⁹ Hit ebe mene faget hinebe kain hineilmo werek meneat he, it afuni Iblis againafuri meneat he, ineranenat, nit ninebe Yahudi mene, iluk ikhi logolik, hit hinenu weak hilingisogo weak hilinghinafunem, hinebe hinelagaik weak welagep andi, an neluaro.

¹⁰ At Iblis nen hit hinendawimo kagaluageluk, afuni hit mene fenakwe inenggi hele warogo fisamo, inenggi 10 nen yi enggin ti enggin hikhi logogun andi re, hinailo agubo. Yi enggin ti enggin a'nogo hilinghinafu kwelek, hinendawinggen noba eberogoat himbiret fuluk, an ninom hundik were'ma wa'lasugun halok he, sa awewerek-sa awewerek lagunem, it inomame agaikharek mene onggo kware-kware ikfisagarek andi hak, onggo nabulal-habulal hilinghinabigin o.

¹¹ Wene yagaisigi andi Allah Areagun en, Allah againafuri o yi awi ti awi andogotarek mene yagaisili'logoat andi, hinesanggo holugun halok he, fanorogo holino o. Sa nen omame asigin halok he, it ekhe wa'la'luk hobuk mondok-mondok wa'lasugun mene andi, inom weagerinabigin lego, iluk wene mondogat yagaisigi mene andi lisu palogo inoba lakfeino o,” iluk yaganete.

Wene Allah againafuri o Pergamus mene faget yagatikhe wene

¹² Wene a'nogo yaganetesik, hobuk yaganeti logolik he, ”An karok enggat fena-fena mago mene nenggimo fisogo welagi mene a'nogo nen wene yi yagahesik: At Allah nen malaikat ayonggo fesikhesik lakfei wesu hak, at againafuri o Pergamus andogotarek mene inayonggo fesikhemo werek a'nogo, wene an nen it yagaisagain mene yi, hat lisu palogo inoba lakfeinogen yi'nogo palino:

¹³ Hit he, Iblis ebe kain logolik afuni ekhe awe a'ma ferinarek welagarek oba welagep andi an nelu o. A'nogo Iblis awibaat logolik, an namlogo Antipas nen nabok aberali agi'lek, obabut humbunhogo yagaisilik nugunem, it ekhe nen ebe hinendawimo nen watunem, hiren he, nit ninendawinggen Yesus oba eberogoat himbirik welagorek andi lek, ninabit, iluk kobokhogo heraknobagagi'lek, ninom hundigat mondok welagep andi, hinobabut an nelu o.

¹⁴ A'nogo meneat he, wene endebat ekhe an nabit mene hilingiti lagep mene andi yagahisago. Fageat afuni Israel mene inebe weak asuageluk, wam tugwi anggo warek mene kurik ninggik, pailak fakfisigik, uageluk, ap Bileam en Balak yagatikhemo, aren inendawimo kagalhi lagaikhe mene andi, hit ekhe at awene andi fisogo welagep higi.

¹⁵ Nen, hit ekhe nen, wene ap Nikolaus nen yagaisasikhe mene awene andi waganogo fisogo welagebat andi. A'nogo hilingiti lagep andi, an nabit mondok anggikhi lagi o.

¹⁶ Nabit anggikhi lagi andi nen he, hit weak hilingiti lagep mene andi herakfisaluk hinobabut hebela'no o. A'nogo hebelagi'lek halok he, hit an karok nambeba mene nen hinoasigiluk weak-weagat wesigin o.

¹⁷ Wene yagaisigi andi, Allah Areagun en it Allah againafuri o yi awi ti awi andogotarek mene yagaisili'logoat andi, hinesanggo holugun halok he, fanorogo holino o. Sa nen omame asigin mene halok, sumburu enu manna hinago mene melagatik, enu ket mene salogo helep mola meneba lisu palogo wogetik, igin o. Enu palek andi re, it ekhe inonggot. We, at enu lisu palek helagain mene andi nek elu asigin mene wogosigin, iluk mondogat yagaisigi mene andi, lisu palogo inoba lakfeino o,” iluk yaganete.

Wene Allah againafuri o Tiatira mene faget yagatikhe wene

¹⁸ A'nogo yaganetesik hobuk mel yaganete: ”An Allah amlogo neilenggen endu amulok hangge, nen, neisok he, tembaga endumo weratunem amulit papaget hikherek andi hangge a'nogo nen wene yi yagahesik: At Allah nen malaikat ayonggo fuluk lakfei wesu hak, at againafuri o Tiatira andogotarek mene inayonggo fesikhemo werek a'nogo, wene an nen it yagaisagain mene yi, haren lisu palogo inoba lakfeinogen yi'nogo palino:

¹⁹ Hit hinobabut hilingiti lagep mene andi an nelu o. It afuni ekhe hinendawirogo welagep andi inom, hinaberali agi'lek hinobabut humbunhogo welagep andi inom, it ekhe leberisikhi lagep andi inom, it ekhe nen yi enggin ti enggin hinoba fugu kwelek, hinafe morogo welagep andi inom, mondogat an nelu o. Nen, attak endebat hak hilingiti lagagip meneat he, yogondak mondok hokhorogo hilingiti lagep andi, an nelu aro.

²⁰ A'nogo meneat he, at he Izebel a'nogo nen eranenat, An nebe Allah ane yagaisigirek mene aro, iluk afuni an namingmingengge mene inebe hokhorogoat pailak fakfisikhi logouwageluk yagaisigik, wam tugwi anggo warek mene kurik ninggi logouwageluk yagaisigik, ugu kwelek, hiren he, wenageti'lek, At oba lombok, iluk, herakfikhi lagep andi nek he, It weak hilingiri'lagwi, iluk hinobabut palhi lagi o.

²¹ At he andi, pailak fakfouwageluk hilingiri'logo mene andi herakfisaluk obabut hebelasuageluk nenangorogo welagi mene re, at hilingiri'logo mene andi, herakfisaluk obabut hebelasu re, abiro.

²² Wene yi hinendawimo eberek logoino: It ap ekhe nen, he andi inom pailak hilingitarek mene herakfisaluk, inobabut hebelagi'lek halok, he andi oba ou hokho mene foumo re, it inoba enggin-fenggin hokho mene hikhi logogun.

²³ A'nogo hilingitunem, it Allah againafuri o yi awi ti awi andogotarek mene mondogaren ineilenggen hambik, iren he, At Allah re, afuni inendawimo ebetarek mene andi inom, inendawinggen kagalharek mene andi inom, elumo re, afuni ninebe lombok ninobabut hilingitorek mene higithogoat wene ninoba figik, onggo wo'nisigik, igin o, iluk, an futnobagauwageluk, it afuni he andi ane wanharek mene inebe inoasigin aro.

²⁴ A'nogo meneat he, afuni ekhe nen, he andi Iblis awene endawimo mene yagaisikherek, iluk agarek mene andi re, hit afuni o Tiatira mene fenakwe nen, wene andi yagatik, hinelu agik, igi'lek andi nen he, hiren wene enggin mene ekhe hilingisubagaigen iluk yagahisagain lego.

²⁵ We, an wesigin andi oan wagi'lek werek kwelek, wene wanhigip mene andiat hinenggi ninghogo fisogo logoino o, iluk yagahisigi andi.

^26-27 Sa nen an namolo mene hilingitu mondok huli o wurep oba omame asi lagain halok he, an neisena nen afuni inunggulenu lombok, an nen ferinarek logouwageluk mennobagaluk eisewerek nobagaikhe andi hak, at omame asi lagain mene andi a'nogoat ferinarek logouwageluk menfuluk eisewerek foumo, afuni nen sige tomuk posiemanggen meneba kweang haroweak mene tamuk-tamakhogo hilingitarek andi hak, at ane omamerogo yagaisikhi logolik, ferinarek logogin o.

²⁸ Nen, hesagal wap o mo lagai wagarek higiren liabi wagarek mene a'nogo wogosigin aro, iluk yagahisigi andi,

²⁹ Allah Areagun en it Allah againafuri o yi awi ti awi andogotarek mene yagaisili'logoat andi, hinesanggo holugun halok he, fanorogo holino o, iluk yagaisigi mene andi, lisu palogo inoba lakfeino o,” iluk yaganete.