WAHYU 18 - Allah Wene Fano Wene Hupla Inane

Afuni o Babel mene wolelenggen tagalinafunem eilenggen yethasikhe wene

¹ A'nogo yaganetesi'mo nen ombo'ne re, at malaikat hunogo mene ekhe pogoroba nen pi wagunem yethigi. At andi omame mondok hokho logolik, ebe amulit hokhoma re, afuni kweangma mene mondogat inoba ibilogo yethikhi laga higi.

^2-3 A'nogo pi wagasik ane hokhorogo mel yagatikhe: ”O Babel hokho andi arat wolelenggen tagalagaikhe! Afuni ekhe nen anggur enggen amusu wogisugunem naluk lugulugwi palharek andi hak, he kain yanani nikherek mene a'nogo agasabu lagagunem, ”Fakneani,” iluk, afuni inunggulenu lombok mondogat inom, ap kaindek inenupogot kweangma mene inom, yagaisugunem, iren pailak fakfikhi lagaikha andi. Nen, at he andi agasabu lagagunem fakhoageluk obabut hilingiterek andiba, afuni kweangma mene yi mene ti mene onggo ha awatarek mene ineilmo werek hilingirikhi lagaikhaat. A'nogo hilingiti lagaikha meneat he, yogondak arat wolelenggen tagalagaikha yi, hweing! A'nogo wolelenggen tagalagaikhama re, Iblis agoromi inom, munggwarengge obabut weak mene inom, ”Sue andi mene nagain lek iluk agaiseratarek mene mondogat inom, it inaiba hilinglaga o,” iluk yagatikhe.

^4-5 A'nogo yagatikhesi'mo nen ombo'ne re, at Allah ane pogoroba nen ekhe mel ikhe: ”Afuni nen, yi mene ti mene ambola'ma oba lou'-louk filik lagagarek andi hak, it afuni nen, at he andi inom weak hilingitu mondok welagaikharek mene andi pogoroba higit lagaikhemo, an Allah nendawimo eberek mondok welagi andi nen he, an nen it wene inoba fembik weagerinabigin. It weagerinafi logolik, hit an nagainafuri mene it hinom logolik, it inobabut waganogo weak hilingisumo hinom weagethinabi nogo nen he, it herakfisaluk heise wulibi we'ni o.

⁶ Nen, hit he andiba wene fogoin mene nen, aren it hilinginafi laga hagat, wene ebe oba fikhi logolik, ekhe inom oba loukhogo feino o. Nen, aren i melagisikherek andi hagat, anini inoba fikhi laga mene andi, onggo wene oba fikhi logolik, ekhe inom oba loukhogo feino o.

⁷ At he andi onggwaregen ikhi logolik: An nebe kain logolik, afuni nawe a'ma fisaluk ferinarek logolik he, sogwe nobagagama nen nendawimo weak a'luk le aga logogin nogo? Lego, iluk yi mene ti mene oba peterogo logolik onggwaregen hokhorogo fogerakhugu mondok werek andi hagat, heinet hokhorogo wati logolik, endawimo weak a'luk le aga logouwageluk unggum wogo'no o.

⁸ A'nogo anggikherek andi nen he, an Allah nomame Hokho welagimo re, misigam fagerat sumburu ouwak inom, ou hokho mene inom wogosimbik, ebe endumo nolfisugunem afuni ekhe endawimo weak a'luk le aga logogun andi,” iluk pogoroba nen ugunem nesanggo holhi.

⁹ At he andi ebe a'nogo endu ninggi logolik, esi hule lagagunem, it ap kaindek inenupogot kweangma welagaikharek mene, at he andi oba aigage lagagunem, sebelfigi'lek pailak fakfouwageluk hilingitunem, fakfikhi lagaukwa mene omanogo nen ineilenggen yethaluk obaget li le aga lagaikha.

¹⁰ Obaget le a'nogo aga logolik, ”At weagetfikhemo heinet wari'logo andi, nit ninom weagetninafunem heinet wathanogo,” iluk inailo nen inebe yatma mendek logolik, le yi'nogo aga lagaikha: ”At Allah nen, hit afuni o Babel mene hinomame hokho a'nogo re, we, misigam fagerat wene hinoba fuluk weagethinafe andi, eige, hweing,” iluk le aga lagaikha isigi.

¹¹ It a'nogo le agu kwelek, it afuni yi mene ti mene onggo oaragarek mene nen he, mel ikhi lagaikha: ”Ninagarek yi mene ti mene waluk laluk, it afuni o Babel mene inoba onggo wanhorek mene a'nogo, hobuk sani inoba onggo wanhi logogun,” iluk inobaget li le aga, lagaikhaat.

¹² A'nogo le aga logolik, ”Yi mene ti mene andi ebe re, onggo hokho palharek mene emas inom, perak inom, helebenggen onggo hokhorogoat palharek mene enu permata inom, mutiara inom, su kain sutera inom, lenan su inom, elokhonggen he, mep hangge inom, kibi-kibi warek hangge inom, e amben fano mene inom, wam hangge enu gajah aik mene yi mene ti mene hilingitarek mene inom, yi mene ti mene e onggo hokho palharek mene hilingitik, tembaga mene hilingitik, posie mene hilingitik, helep enu pualam mene hilingitik, agarek mene inom,

¹³ amben fano mene kami inom, heinde hangge mene inom, larengga hangge mene inom, e mur amusu inom, kemenyan amusu inom, anggur enggen amusu inom, wam amusu inom, tepung inom, gandum inom, wam sapi inom, kuda inom, domba inom, kereta inom, afuni inebe inamingmingengge logouwageluk inom, mondogat waluk laluk, sani inoba onggo wanhi logogun,” iluk le aga lagaikha.

¹⁴ A'nogo le aga logolik, it Babel mene mel yagaisaga: ”Yi mene ti mene hit hinamolo mene legagik, yi mene ti mene oba heilarogo logolik, hinendawimo hinagaiyekhogo welagep mene legagik, ikhemo re, hiren heragaisogo wanugun mondok elo'lek aga o,” iluk ikhi lagaikha.

¹⁵ A'nogo agasik, it afuni yi mene ti mene onggo oarogo it Babel mene inoba saburikhi lagaikha mene omanogo nen he, ”It afuni o Babel mene yi enggin ti enggin hilinginafe andi hak, nit a'nogoat hilingninabinogo,” iluk inailo nen inebe yatma mendek logolik, inobaget le aga logolik, mel ikhi lagaikha:

^16-17 ”Hit Babel mene hinasu kain lenan su mene elokhonggen mep hangge mene inom, kibi-kibi warek hangge mene inom, labetfuluk, hinalilingge emas mene inom, helebenggen onggo hokhorogoat palharek mene enu permata inom, mutiara mene inom, wanhi lagep a'nogo re, we, misigam faget arat alomat lagaikha yi eige, ihi!” iluk inobaget li le aga lagaikha. It a'nogo ugu kwelek, it afuni kapal hokho mene waluk nikharek mene inogogwi ap kaindek inom, inagoromi kapal ebe waluk lagaikharek mene inom, it afuni ekhe woginarek lagaikharek mene inom, it ekhe i laut yenggelek kwe yi mene ti mene herarik nikharek mene inom. mondogat, it afuni Babel mene inebe endu nunggunem inesi hule yatma nen mendek logolik ineilenggen yerogo logolik, mel ikhi lagaikha:

^18-19 ”Eige, nailo e. O kota afuni Babel mene inawi sili yi hangge, o yi awi ti awi ekhe werek nogo? Mondok lego,” iluk, wul fesi inunggul oba yugulogo inobaget le aga logolik mel ikhi lagaikha: ”Yegei! nendawilage. It afuni o Babel mene inagarek yi mene ti mene hokhoatma, nit ninangge kapal onggo palogo ninenggi werek hilingninafarek a'nogo meneat he, we, misigam faget alomat lagaikha yi nendawilage,” iluk ikhi lagaikha.

²⁰ A'nogo ugu kwelek, at ekhe nen he, it Allah againafuri mene mel yagaisikhe: ”Allah nen he, hit hinunggulmo it o Babel mene wene inoba fuluk weagerinafe andi nen he, hit pogoroba mene mondogat hinendawimo hinagaiyegetik, hit Yesus nen hinayonggo fikhesik lakhinobagasikhe mene inom, hit at ane yagaisikhi lagep mene inom, hit Allah againafuri ekhe inom mondogat hinendawimo hinagaiyege'ni o,” iluk ugunem holhi.

²¹ A'nogo ugunem holhiri'mo nen ombo'ne re, at malaikat omame hokho mene ekhe wagasik helep hokho yi mene ti mene sagalharek mene hangge hambokhogo i laut yenggele'ma hugisikhi logolik mel ikhe: ”At Allah nen hit afuni o kota Babel mene, yi'nogoat omamerogo hambokhogo pelakhinobagagin o. A'nogo pelakhinobagaumo hobuk afuni nen ineilenggen hisogoin mondok lego.

^22-23 Afuni o yi awi ti awi onggo oatarek mene, inenu lek hangge meneat he, ap hit mene nek he, inenuwerek welagaikha. Nen, hiren hinawesa meneba afuni yi awi ti awi inunggul enu lombok, lalinafi lagebat. A'nogo hilingiti lagep meneat he, it gitar watarek mene inom, endawi watarek mene inom, longgop anggwe folelogo futhagarek mene inom, pinggong hokho mene anet hagarek mene inom, hobuk watunem ane holugun legat. Nen, ap ekhe yi mene ti mene ambugun weak hilingiterek mene hilingitunem ineilenggen hogoin legat. Nen, inamburu gandum enggen mene sagalhunem helep ane ikherek mene andi, hobuk ane ugunem inesanggo holugun legat. Nen, hinaesage amulok ineilenggen hogoin legat. Nen, aben hemi woginafunem inendawimo inagaiyekhogo inane agarek mene inesanggo holugun legaro,” iluk ugunem holhi.

²⁴ It afuni o kota Babel mene nen, afuni Allah ane yagaisagarek mene inom, Allah againafuri ekhe inom, inamep wulagaisogo inoatik, it afuni ekhe kweangma inoata mene mondogat, irenat inoatik, inoatukwasi'mo andi nen he, inamep inenggi unggut oba werek andi nen, Allah nen wene inoba fesikhesik, weagerinafunem isigi andi.