WAHYU 17 - Allah Wene Fano Wene Hupla Inane

He yanani hilingirik nikherek mene nen hilingitunem hasikhe wene

^1-2 A'nogo higiri'mo nen ombo'ne re, it malaikat inebe 7 nen Allah a'mage i hak hinago waluk kweisalha mene omanogo mene ekhe wagasik mel yaganete: ”It afuni o kota Babel mene, he kain yanani nilik nikherek mene hangge andi, i hokhondek mene esanggoma were'ma, ap kaindek inenupogot kweangma mene nen at pailak hilingitik, afuni ekhe nen anggur enggen amusu nunggu mondok logolik, lugulugwi palharek andi hak, afuni kweangma mene nen at pailak hilingitu mondok welagik, agarek mene andi, Allah nen, he andi wene oba fembik ebe weaget feigeluk aweim kabelhe mene yagahesigen eme o,” iluk yaganete.

³ A'nogo yaganetunem he, Allah Areagun noba louk i wagama, at malaikat a'nogo nen wo'narek, o afuni le'ma leimo laga. A'nogo wo'narek lagama logolik, yethigi hak he, he a'nogo mene olomene hokho mene esi mep sagalek mene amboroba hurek nugunem yethigi. Mene olomene andi unggul he 7 nen were'ma andimuk unggul oba re, 10 nen wulibik, nen, ebene mondogat he Allah enu wiik-weakhogo hilingitarek mene lisu mondok peterogo palek were'ma yethigi.

⁴ Nen, he andi asu ekhe elokhonggen mep hangge, nen, ekhe elokhonggen kibi-kibi warek hangge, mene laberek. Nen, alilingge re, emas mene inom, helebenggen homboninggen onggo hokho palharek mene enu permata inom, mutiara inom, palek logolik, obabut weak hilingitik, pailak fakfouwageluk hilingitik, a'nogo yanani nilik nikherek mene andi, iwak emas meneba hinago enggimo fisogo welaga yethigi.

⁵ Nen, wene ebe hinago mene elhaba lisu yi'nogo palek: ”Afuni kweangma mene yanani nilik nikharek mene inom, inobabut weak mondok hilingitarek mene inom, mondogat inagaisa enu Babel kain yi,” iluk lisu palek welaga yethigi.

⁶ Nen, he andi nen, Allah againafuri mene inom, Yesus ane yagaisilik nikharek mene inom, inoatikhe mene inamep ninggesik, afuni nen anggur enggen amusu naluk lugulugwi palik agaikharek andi hak, lugulugwi palik agasik were'ma yethigi. A'nogo yethigirik hokhorogo fogerati.

⁷ A'nogo fogerati lagimo, malaikat a'nogo nen mel yaganete: ”Nenahalok fogerati lagen? An nen, he andi ebe inom, mene olomene hangge unggul 7 nen were'ma, andimuk unggul oba 10 nen wulibik mene, amboroba at he andi hurek were'ma waluk nikherek mene andi inom, emberek faget wene hinago werek mene fakhogo pilingisogo yagahesigo.

⁸ Mene olomene hangge hegen andi attak welagaikhe meneat he, yogondak elokhe lek hegen andi re, kweang a'ma nen lagai wesigin o. Lagai waga halok, Allah nen alomat fagain o. Nen, Allah nen kweang pogot oan elalhi'lek logolik, suesingga it afuni ineluk mondok logouwageluk fanorinabigin mene halok inenu lisu palek andiba, it ekhe inenu lisu palek lek mene nen, mene olomene hangge andi ineilenggen hasukwasik, iren he, mene olomene hangge yi, attak welagaikhesigen, elokhe lek agaikhe meneat he, hobuk weinam aga yi, nailo e, iluk fogerasugun o.

⁹ Nen, wene yagahesigin yi faget he, inobabut hebelogo werek mene nek futfogoin o. At mene olo mene hangge andi, ungguloak ebe 7 nen hegen andi ebe re, tom ebe 7 nen, at he andi kain welagarek oba werek mene hegen o. Nen, ekhe re, ap kaindek inenupogot inebe 7 nen werek mene faget hegen o.

¹⁰ Nen, it kaindek inebe 7 nen andi mene, inebe 5 arat kobokhogo pagama re, inebe pire werek mene andi, ekhe arat kain logolik, afuni awe a'ma fisaluk ferinarek werek. Nen, ekhe hobuk halok weinam asigin. Weinam asimbik, aren afuni awe a'ma fisaluk ferinarek mondok logogin lek. We, enggi endebat logogin o.

¹¹ Mene olomene hangge attak welagaikhe meneat he, elokhe lek andi ebe re, kaindek inebe 7 nen omanogo arat kobokhogo pilik-pilik waga lagaikhasik, it 7 nen andi mene ekhe hobuk ambotkwe kain a'luk, inenggi wenagaisogo 8 hangge hilinglasimbik, hobuk Allah nen weagetfagain, mene hegen o.

¹² Nen, andimuk unggul oba 10 nen wulibik hegen andi ebe re, ap inebe 10 nen kain asugun mene oan werek mene hegen meneat he, it kain menfisamo, at mene olomene hangge a'nogo inom, we, satu jam faget enek kain logolik afuni ferinarek logogun mene hegen o.

¹³ It andi inendawinggen misigat logolik, at mene olo mene hangge a'nogo yagati logolik he: Nit kain logouwageluk menninobagagama ninenuwerek welago mene andi, harat henuwerek logoinogeluk eisewerek menhobagaga o, iluk yagata.

¹⁴ A'nogo eisewerek fembik, Domba Eak a'nogo weim inom yabuogeluk ugun meneat he, at Domba Eak ebe afuni kaindek inenupogot inom, inenuwerek mene inom, mondogat inoe enuwerek lego mene arat andi nen he, againafuri wenaginafikhesik inayonggo fesikhemo inobabut at faget humbunhogo hilingitarek mene omanogo, at ebikhit agaikhasik, inomen, at mene olomene hangge a'nogo agoromi inom mabenetfisogoin o,” iluk yaganete.

¹⁵ At malaikat a'nogo nen a'nogo yaganetesik, ekhe mel yaganete: ”At he yanani nilik nikherek mene hangge andi, ebe kain welagarek oba i hegen andi ebe re, afuni mondogat inunggulenu lombok, inagap lombok, inawi lombok, inane lombok mene heilenggen isegen o.

¹⁶ Nen, andimuk unggul oba 10 nen wulibik a'nogo inom, mene olomene hangge ebe a'nogo inom, inomen, he yanani nikherek mene andi, ebe inabiret fuluk he, yi mene ti mene at mene heligik, ebe alfulukwa herakfisigik, iluk, ebe warogo fena ninggi logolik, fena endu nolfisogoin o.

¹⁷ A'nogo hilingisugun andi re, Allah nen isikhe mene higithogoat hilinglasuageluk, aren at endawimo anggikherek mene andi, it ap kaindek andi inendawimo kagalhemo, it inendawinggen misigat logolik, iren he, at mene olomene hangge a'nogo yagati logolik, nit kain ninenuwerek welago mene andi, hat kain henuwerek logoinogo, iluk eisewerek fuluk, inomen, he yanani nilik nikherek mene a'nogo ebe wasugun andi.

¹⁸ Nen, he mene heilenggen hegen andi ebe re, ap kaindek inenupogot kweangma mene mondogat awe a'ma fisaluk ferinarek welagarek mene, o kota hokho mene agarek a'nogoat heilenggen hegen o,” iluk yaganete.