WAHYU 14 - Allah Wene Fano Wene Hupla Inane

At Domba Eak inom, againafuri telinafikhe mene inom, yerisasikhe wene

¹ A'nogo yethigiri'mo nen, ombo'ne yethigi hak he, at Domba Eak a'nogo tom Sion oba mendek were'ma yethigi. Andi re, at ebe inom, it afuni inebe 144.000 nen, at Domba Eak inom, Eisena inom, emberek inenu it andi inebe lombok inelhaba lisu palek were'ma yerisigi.

² A'nogo logolik, inane pogoroba nen he, i hut hokho mene ane hangge igik, unggunggu ane hokhorogo ikherek hangge igik, it afuni ekhe gitar watarek mene nen ebe watunem ane ikherek hangge igik, inane hokho ugunem nesanggo holhi.

³ A'nogo inane hokho ikhi logolik, Allah ebe kain welagarek mene obuluk oba werek kwelek, it aren elalinafikhe mene ekhe inebe enggaminogo omanogo inom, ap inaluendek omanogo inom, ineilhanem wuni ket mene felalogo it afuni fena yanggulhi'lek inonggot, we, it afuni inebe 144.000 kweangma nen arat telinafe mene omanogo nek inelumo watunem inane nesanggo holhi.

^4-5 It afuni andi inebe re, tegelek logouwogeluk, hemi inom nogo igi'lek logolik, inambeba nen ineranen ekhe agarek legat, nen, afuni ekhe nen he, ”It andi weak ekhe hilingitama,” iluk wene inoba fou legat mene, logolik, Domba Eak a'nogo kwe komakwe lagu halok, ombo'ne nugunem, sumburu ebe oan werek kwelek, attak mene nenggarek andi hak, Allah nen yi afuni ti afuni inanggele'ma nen kigilogo inonggo palogo telinafikhemo, it inebe Allah inom, andomba fisagasik, were'ma isigi o.

Malaikat inebe 3 mene yerisasikhe wene

⁶ A'nogo higiri'mo nen, ombo'ne re, at malaikat ekhe wene fano wene mondok logogin mene afuni kweangma mene inunggulenu lombok, inane lombok, inagap lombok, inaiba lombok, yagaisilik pogot ebene tarogo nugunem yethigi

⁷ A'nogo nikhi logolik, ane hokhorogo mel ikhi laga: ”Nineisena Allah nen wene afuni inoba figik, kotik, igin a'nogo, arat horogasi waga andi nen he, Allah pogot inom, kweang inom, i laut yenggelek inom, i elesi agai mondogat inom, elalhikhe mene a'nogo hinailorogo logolik, hinendawinggen at oba eberogoat himbiret fuluk, fogerati logoino o,” iluk ikhi laga yethigi.

⁸ A'nogo ikhesi'mo nen ombo'ne re, at malaikat ekhe wagasik, mel ugunem nesanggo holhi: ”Afuni ekhe nen it ekhe lugulugwi palik a'luk, agasabu nen pailak fakfisikhi logouwageluk, anggur enggen amusu wogisagarek andi hak, it afuni o kota Babel mene agasabu nen afuni inunggulenu lombogen pailak fakfisikhi logouwageluk, inendawimo kagalharek mene a'nogo, inebe arat wolelenggen tagalagaikha yi, weing!” iluk ugunem holhi.

⁹ It malaikat inebe pire a'nogo agasi'mo nen, inombo'ne malaikat ekhe wagasik, ane hokhorogo mel ugunem holhi: ”Hit ekhe mene olomene hangge hokho andi inom, ebe higit ilirengge hilingik andi inom, hinendawinggen inoba himbiret fuluk fogerinafepsik, hinebe silorogo at enu palek hinelhaba he a? Hinenggiba he a, wanhep mene halok,

¹⁰ afuni nen, i inom lek, we anggur enggen amusu nek ale weak mene hinatarek andi hak, Allah a'mage hit endawithinafi'lek, wene ninghogo hinoba fagain o. A'nogo hinoba fembik, nit malaikat Allah faget welagorek mene inom, Domba Eak a'nogo inom, nineilhanem hinebe, endu inom, hendali al hangge amben weak mene enu belerang inom, ninggerek oba andoma lakhinobagaumo heinet watu mondok logogun o.

¹¹ Andi re, hit hinendawinggen mene olo mene hangge andi inom, ilirengge at ebe hangge hilingitarek andi inom, inoba himbiret fuluk fogerinafi lagep, hinebe silorogo enu palek wanhep mene halok a'nogo lakhinobagaumo, lingge hundik, hup hundik, set walogo fano ekhe welagi'lek, hinoba endu aigen heinet watu kwelek, hinesi hinagap hule lagagu mondok logogin o,” iluk ugunem holhi.

¹² Wene yi faget esin hilingisugun he, Allah againafuri at ane hologo higithogo hilingiti logolik, hinendawinggen eberogoat Yesus oba himbirik welagep mene andi, hinafe morogo logogun o.

¹³ Wene a'nogo ugunem holhiri'mo nen, ombo'ne re, pogoroba nen ane yi'nogo yaganetunem nesanggo holhi: ”Yogondak afuni ninoe Enupogot inom hundik logolik, at faget fano hilingitunem inoasugun mene re, inendawimo inagaiyek asugun o, iluk lisu palogo feino o,” iluk yaganetunem Allah Areagun pogoroba nen ane hokhorogo mel yaganete: ”Andi eberogoaro. It afuni andi Yesus faget set kwil-kwalhogo hilingiri'lagwi mene andi, ebe hilingiri'lagwi mene waluk logoin andi nen, set fanorogo walogoin o,” iluk yaganetunem nesanggo holhi.

”Kweangma awi yago mene enggen arat wurik agama palugun horogasi waga,” iluk isikhe wene

¹⁴ A'nogo yaganetesi'mo nen, ombo'ne re, ohena kut mene were'ma, ap ebe abat ta'lasi wagaikhe mene a'nogo hangge mene kware-kware emas mene unggul oba ugu, nen, karok enggat hokho mago mene maserek mene enggim fisogo logolik, ebe ohena a'nogoba hurek were'ma yethigi.

¹⁵ Andi ombo'ne re, at malaikat ekhe Allah awi wuri'mo nen wulibi wagasik, ane hokhorogo, at ohenaba hurek welaga mene a'nogo mel yagate: ”Kweangma enggen arat wurik agama ebe palugun oba arat horok asi wagama andi nen he, henggarok andi waluk he, yogondak enggen pali pin o,” iluk yagatemo,

¹⁶ at ohena oba hurek welaga mene a'nogo enggarok a'nogo waluk he, kweangma enggen pali pi wagunem yethigi.

¹⁷ A'nogo higiri'mo nen, ombo'ne re, at malaikat ekhe pogoroba Allah awi wuri'mo nen, enggarok enggat mago maserek mene waluk wulibi wagunem yethigi.

¹⁸ A'nogo higiri'mo nen ombo'ne re, at malaikat ekhe endu eisewerek mene Allah anggo warogo noletarek oba nen wagasik, at malaikat enggarok enggat mago mene waluk pikhe mene a'nogo ane hokhorogo mel yagatunem holhi: ”Kweangma anggur enggen arat wurik agama werek andi nen he, henggarok andi waluk, pali pin o,” iluk yagate.

¹⁹ A'nogo yagatemo, at a'nogo enggarok waluk kweangma pi wagasik, anggur enggen agayoba nen palogo enggen sagalharek oba obuluk hokho mene elonggoma andoma hukha lagunem higi. Enggen sagalharek oba andi ebe re, Allah nen a'mage hokhorogo inoba fikherek andi aro.

²⁰ Nen, anggur enggen palek and o sili abel endakwe sagalhunem he, enggen sagalharek mene andi anggele'ma nen, mep i elesi higit fulogumhogo huli 2 meter hakhogo lagaikhesigen, hurogo re, huli 300 kilometer yatmaat andoma lagunem yethigi o.