WAHYU 13 - Allah Wene Fano Wene Hupla Inane

Mene olomene hangge pire hokhondek mene weinam agunem eilenggen yethasikhe wene

¹ A'nogo yethigiri'mo nen, ombo'ne re, mene olomene hangge hokho mene ekhe andimuk unggul oba ebe 10 nen wulibik welaga, nen unggul he, 7 nen hilingi'mo, i laut yenggele'ma nen wulibi wagunem yethigi. Andimuk 10 nen andi, ebe lombok oba re, kware-kware ap kaindek ikfisagarek andi hak ugu were'ma, nen unggul 7 nen andiba, ebe lombok oba re Allah enu wiik-weakhogo hilingitarek mene lisu palek welaga yethigi.

² At mene olomene hokho mene wulibi wagunem higi andi ebe re, mene hak enu harimau hangge. Nen, eisok he, paik inum hangge hokho mene enu beruang andi eisok hangge. Nen, ambe re, mene olomene hangge enu singa ambe hangge mene a'nogo weinam agasi'mo re, at kisu hokho a'nogo nen, mene olo mene hangge andi yagati logolik, ”An kain nomame hokho logolik, yi mene ti mene eisewerek welagirek a'nogo hak, hat an nobali'mo kain logoinogeluk menhobagagi o,” iluk yagatunem holhi.

³ Holhirik yethigi hak he, at mene olomene hangge hokho a'nogo unggul omanogo mene ekhe watama nen, ebe wa'lasu hak meneat he, ebe fano agaikhesik agambut enek were'ma, afuni mondogat ineilenggen hagasik fogerarik, at ombo'ne mondok lagunem isigi.

⁴ At kisu a'nogo nen, at mene olo mene hangge hokho a'nogo yagati logolik, ”Hat kain homame werek logoinok,” iluk menfikhe andi nen, it afuni inendawinggen kisu a'nogo inom, mene olo mene hangge hokho a'nogo inom, inoba himbiret fuluk fogerinafi logolik mel ikhi lagaikha: ”Kisu hokho yi emberek higit he, sa anggegep, Emberek higit ekhe lek. Sa hagen at emberek weim yabugun anggegep, Elo'lego,” iluk ikhi lagaikha isigi.

⁵ A'nogo ugu kwelek, o mo lagagik pigik laga logolik tugi 42 huli folelik lagu kwelek, at mene olomene hangge hokho mene a'nogo onggwaregen fogerakhigik, Allah enu weagarogo figik ikhi logolik, afuni awe a'ma fisaluk ferinarek logouwageluk kisu hokho a'nogo nen eisewerek fikhemo yethigi.

⁶ At a'nogo logolik, aren Allah ebe inom, enu inom, at aiba pogoroba inom, it o pogoroba welagaikharek mene inom, mondogat inenu weagati laga higi.

⁷ Andi hagat, afuni inunggulenu lombok, inane lombok, inagap lombok, inawi lombok, mondogat aren awe a'ma fisaluk ferinarek logouwageluk menfikhemo eisewerek a'luk, Allah againafuri inom weim yafi logolik, mabenetfisikhi laga higi.

⁸ At Allah nen pogot kweang oan elalhi'lek logolik, ”It andem ineluk mondok logouwageluk hilinginabigin,” iluk, inenu lisu palogo at Andomba Eak, it faget watukwa mene a'nogo Ambuku ba fesikhe. It inenu a'nogo lisu palogo fesikhe mene halok, mene olomene hangge hokho a'nogo fogerati'lek werek kwelek, afuni kweangma welagaikharek mene ekhe mondogat inendawinggen mene olomene hangge hokho a'nogoba himbiret fuluk fogerati lagaikha isigi.

^9-10 Andi nen he, wene yagahisagain yi, hit hinesanggo holugun halok he, fanorogo holini o. At ekhe ebe hele warogo fogoin obaat, hele warogo fogoin o. Nen, at ekhe karok oba wasigin obaat, karok oba wasigin aro. A'nogo hilingisugun andi nen, ebe esin he, Allah againafuri mene halok, inendawinggen at oba eberogoat himbiret fuluk inafe morogo logogun andi aro.

¹¹ A'nogo higiri'mo nen, ombo'ne yethigi hak he, mene olomene hangge hokho mene hunogoat ekhe andimuk unggul oba domba andimuk hangge pire wulibik, nen ane ugunem he, kisu ane hangge mene, kweangma nen weinam agunem yethigi o.

¹² Weinam agasik, mene olomene hangge attak mene a'nogo eisewerek logolik hilingiti laga mene, at mene olomene hangge hobuk weinam aga mene andi eisewerek agasik, aren afuni yagaisikhi logolik he, ”Afuni kweangma welagep mene mondogat, at mene olomene hangge attak mene a'nogo watukwama re, ebe wa'lasu hak mene fano agaikhe mene andiat hinendawinggen oba himbiret fuluk fogerasugun o,” iluk ane ninghogo yagaisugunem holhi.

¹³ At mene olomene hangge hokho mene hobuk weinam aga a'nogo, afuni nen at ebe futfouwageluk, it ineilhanem elalin mene hilingiti logolik, pogoroba nen endu pelabi wagunem yethigi.

¹⁴ A'nogo ekhe hilingiti laga andi, at mene olomene hangge hokho attak mene a'nogo nen, elalin mene at eilhanem hilingiti logouwageluk eisewerek fikhe mene a'nogo ebe hilingiti logolik, afuni kweangma welagaikharek mene eranenat lalinafi laga. A'nogo lalinafi logolik, it afuni omanogo nen, mene olo mene hangge hokho karok oba watukwama ebe wa'lasu hak mene ambotkwe fano agaikhe mene a'nogo ebe hangge hilingisogo ilirengge ekhe wusuageluk yagaisasikhemo ebe wutama yethigi.

¹⁵ A'nogo wutama, at mene olomene hangge hobuk mene a'nogo nen ilirengge a'nogo eluget fugunem ane ikhi laga yethigi. A'nogo ikhi logolik, it afuni inendawinggen ilirengge a'nogo oba himbiret figi'lek mene halok inebe mondok inoasigeluk weim yonggo fikhemo inoarik laga lagaikha isigi.

¹⁶ A'nogo inoatu kwelek, at mene olomene hangge hobuk mene a'nogo nen he, afuni kaindek inom, kembu mene inom, inenggi werek mene inom, inelagaik mene inom, inamingmingengge mene inom, it inale'ma mene inom, afuni nen inendawinggen wenggelogo silorogo salenggen ikfisagarek andi hak, it mondogat inebe lombok mel yagaisikhi laga: ”Ilirengge enu lisu palek mene yi, hinelhaba he a? Hinenggi ebekwe he a, isubagaigen wanini o.

¹⁷ Hiren, at enu lisu palek mene he a? Athe, enu faget inenggi wenago mene he a, wanhep mene halok, yi mene ti mene onggo paligik, it ekhe inoba onggo wanhik, ikhi logogun o. A'nogo meneat he, it afuni ekhe wanhi'lek mene halok he, a'nogo wanhi logogun mondok lego,” iluk ane ninghogo yagaisikhi laga yethigi.

¹⁸ Andi nen he, wene andi faget, hinebe hebelek legengge logogun mondok lego. Athe, sa nen obabut hebelek halok he, mene olomene hangge andi enu faget, inenggi 666 oba wenata andi, ebe re, ap ekhe enu mene wenatama andi nen he, futfeni o.