WAHYU 12 - Allah Wene Fano Wene Hupla Inane

He mene inom, kisu inom, eilenggen isasikhe wene

¹ A'nogo higiri'mo nen, ombo'ne yethigi hak he, afuni nen futfouwageluk pogoroba elalinat hilingisu lek mene hokhorogo hilingitunem yi'nogo yethigi. He mene ekhe tugi ebeba mendek logolik, asu higit he mo mene laberek welaga, nen hesagal ebe 12 nen menere unggul oba kware-kware higit ugu mene yethigi.

² He andi eak a'ma mene arat takhagain higit aga andi nen he, heinet wati logolik, ane kweti laga.

³ A'nogo heinet watu kwelek, afuni nen futfouwageluk pogoroba elalinat hilingisu lek mene hokhorogo hilingitunem ekhe yethigiat. Kisu agap mep mene ebe hokho mene were'ma unggul he, 7 nen hilingik welaga, ungguloa'ma andimuk 10 nen wilibi'mo, nen, kware-kware ap kaindek ikfisagarek andi mene 7 nenat inunggulkwe inebe lombok ugu welagaikha.

⁴ A'nogo logolik, agenggum oba hesagal pogoroba mene henagan minggilogo fisikhesik, pire herakfisaluk, ekhe lisogo kweangma pelakfisa wagasik, he a'nogo eak takhugunem haumhogo nageluk elokhoma kagalek welaga.

⁵ A'nogo werek kwelek, afuni nen sige tomuk waluk wam konharek andi hak, at he a'nogo eak ap mene tatikhesik he, sige tomuk posiemanggen mene waluk afuni inunggulenu lombok mondogat awe a'ma fisaluk omamerogo ferinarek logogin mene takhikhe. A'nogo tatu kwelek, aremnogoat omalik a'nogo telogo waluk Allah kain welagarek oba obuluk a'nogo elokhoma fei lagunem yethigi o.

⁶ A'nogo waluk lagu kwelek, at he a'nogo o leimo afuni le'ma logogin oba, Allah nen obalik ekhe tegelogo fisasikheba andoma heise lagasik were'ma nenangorogo werek kwelek, enggi 1.260 nen welaga yethigi o.

⁷ A'nogo lagasik werek kwelek, pogoroba weim kagalagunem yethigi. Malaikat Mikhael agoromi inomen kisu a'nogo wasuogeluk ugunem, at a'nogo agoromi malaikat at werekwe mene inom agaikhasik weim yafi lagaikha.

^8-9 A'nogo yafi logolik he, at kisu hokho a'nogo mabenet fagasik, at ebe inom, malaikat at agoromi mene inom, ”O pogoroba yoma logogun mondok lego,” iluk kweangma pelakfisa wagunem isigi. Kisu hokho andi, enu re, Iblis igik, Setan igik, agarek mene attagaren afuni mondogat lalinaferek mene a'nogo aro.

¹⁰ A'nogo mabenet fisaluk, pelakfisa wagama, pogoroba nen inane hokhorogo mel ugunem holhi: ”At andi nen Allah eilhanem eranenat it ninerugwi ninagaila'lak linggene hubanggo wene inoba fugu mondok welagarek mene a'nogo arat mabenet fisaluk ebe wulakfisaga andi fano o. Nineisena Allah Enupogot ebe kain logolik, telninabuageluk Kristus menfesikhe a'nogo, yi mene ti mene mondogat eisewerek logolik, emberek inomame agaikhasik telninafasik, inawe a'ma arat ninobagaga yi o.

¹¹ It ninerugwi ninagaila'lak andi inonggwarek inebe inendawi agi'lek, ”Ninoata halok he, fano aro,” ilik nugunem inoata. It andi re, Domba Eak amep wulagaisogo watukwa andiba inom, iren Allah ane ebe wene andi fakhogo yagaisilik nikhi lagaikha andiba inom, Iblis a'nogo arat mabenetfisaga andi o.

¹² Andi nen he, hit pogoroba welagep mene mondogat yi sani! Hinendawimo hinagaiyek hikhi logoino. Hinendawimo hinagaiyek agu kwelek, hit kweangma mene inom, i laut yenggele'ma mene inom, enek he, Iblis a'nogo hinoba pelakfisa wagama, at enggi endebat logogin mene futfikhesik, aren he, nenggi endebat enek logogin andi nenahalok, iluk a'mage lagaikhesik weagethinabigin andi nen he, eigo! Nendawilage,” iluk ugunem holhi o.

¹³ A'nogo pelabi wagaikhemo logolik, ”An yi'nogo kweangma pelaknobagai wagama welagi,” iluk futfikhesik andi nen he, he eak ap takhikhe mene a'nogo wasigeluk murok nikho.

¹⁴ A'nogo nikho andi nen, at agaiserogo o afuni le'ma logouwageluk, Allah nen obalik tegelogo fisasikheba andi tarogo loageluk, sue pim hokho mene ogolabi mene wogotemo tarogo andoma lagasik, Allah nen kwalogo werek kwelek, o mo lagagik, pigik, ugu kwelek, 3 setengah tahun welaga higi.

¹⁵ A'nogo were'ma, at kisu a'nogo nen, at he a'nogo i fu nen waluk loageluk, i ambelema nen elesi hokho mene wulagaisogo, he a'nogo ebe werekwe higithogo lakfikhi laga.

¹⁶ A'nogo lakfikhe meneat he, afuni nen, he a'nogo ebe telu hak, kweangen ambe pakhogo i a'nogo elonggoma pelafunem he, lek aga laga higi.

¹⁷ A'nogo pelafunem he, kisu a'nogo a'mage he a'nogo oba fesikhesik, afuni he a'nogo nen tagongge mene fena Allah nen wene komotninafikhe wene hologo higithogo hilingitik, Yesus nen hilingitikhe wene fakhogo yagaisigik, agarek mene inoasigeluk inaweim kabelhesik,

¹⁸ ebe i laut yenggelek esanggoma andoma lagasik mendek were'ma yethigi o.