WAHYU 11 - Allah Wene Fano Wene Hupla Inane

”Ap inebe pire Allah ane yagaisugu were'ma inoasugun,” iluk yagatikhe wene

¹ A'nogo yaganetasik hobuk he, e ilirengge sige tomuk hangge mene wo'netasik he, mel yaganeta: ”Allah awi wurik inom, at anggo warogo noletarek mene obuluk a'nogo inom, ilirenggeba walhigik, afuni Allah awi wuri'mo at fogerasi kwili'lagwi mene halok mondogat henggi wenaginabi lan o.

^2-3 A'nogo henggi wenasi lagain meneat he, o silimo Allah awi wuri'mo abel endakwe nek he, Allah nen it afuni at ebe inonggot mene wogisikhemo, iren o silimo andoma inom, Allah onggwarek awi kota ari inom, ineisogen al perelhu kwelek tugi 42 nen logogun. Nen, ninenggi re 1.260 nen logogun andi nen he, haren walhagain mondok lego. It a'nogo werek kwelek, an nen ap inebe pire su pelagwi su labetarek andi hak laberek logolik, an nane fakhogo yagaisikhi logouwageluk lakfisa wesigin o,” iluk yaganete.

⁴ It ap inebe pire andi re, e zaitun pire inom, esage ibilharek mene eisok telik pire mene inom, nineisena Enupogot yi mene ti mene mondogat eisewerek welagarek mene elokhoma welagaikharek a'nogo, it ap andi aro.

⁵ Nen, it afuni nen, ”It weagerinabuok,” iluk ugun halok he, endu it ap pire andi inambelema nen wulibi waga logolik, it inaselei mene andi inebe endu nen nagain aro. Halok, sa nen, it weagerinabigeluk igin halok he, a'nogo wasu higit obaat a'nogo wasugun o.

⁶ Nen, iren Allah ane yagaisikhi logolik, ”Meiso pogoroba nen pi wesigin lek,” iluk elogat yagatik, i mondogat mep asuageluk elogat hilingitik, nen inendawimo amolo anggogoin oba, ”Afuni kweangma mene yi ou ti ou inoba fouwok,” iluk elogat ou ero inoba figik, ikhi logouwageluk, Allah nen eisewerek fisikhemo a'nogo hilingisugun isigi.

⁷ Wene a'nogo arat yagaisaga halok, mene olomene hangge hokho mene ekhe kweang a'ma nen inoba lagai wesimbik, inom weim yafi logolik, mabenet fisambik inebe inoasigin o.

⁸ A'nogo warogo fisambik, inebe warek he, o kota kwe ebekwe ninoe eba menfuluk watukwaba andoma fisogoin o. O kota andi, o Sodom inom, Mesir inom, oba litarek a'nogo aro.

⁹ A'nogo fisamo were'ma, afuni inunggulenu lombok, inane lombok, inagap lombok, inawi lombok, inebe mondogaren warek salinafi'lek herakfisaluk, ineilenggen kwelaginarek werek kwelek, inenggi henagan logombigen inenggi ekheba linggene huliba logogun.

¹⁰ A'nogo werek kwelek, afuni kweangma mene inebe mondogaren ikhi logolik he, ”It ap pire wene yaganisikhi lagaikha mene yi nen, yi enggin ti enggin hokhorogo ninoba fikhi lagaikha mene a'nogo inebe fanoat inoata,” iluk inendawimo agaiyek hokhorogo anggikhi logolik, pesta hilingitik, yi mene ti mene onggo lek it ekhe nen ekhe wogisigik, wok-wok ikhi logogun.

¹¹ Inenggi henagan oba re a'nogo hilingiti logombik, inenggi ekhe linggene a'nogo hilingitu were'ma, Allah Areagun inelugerinaferek mene a'nogo it ap pire andem inendawimo kugunem ineluget fisamo menlasumore, afuni mondogat ineilenggen isambik he, inailo hokhorogo asugun o.

¹² A'nogo inailo asimbik werek kwelek, pogoroba nen ane hokhorogo it ap pire wene yagaisikhi logogun mene a'nogo mel yagaisagain: ”Lagai we'ni o,” iluk yagaisugunem, it ap a'nogo inom weak mene omanogo ineilenggen yerinarek werek kwelek pogoroba ohena anggele'ma lagagunem, isigi o.

¹³ O andi sambul he, lugul hokho inailo mene ekhe lang-fanget hikhi logolik, o kota andi ebe 10 ba minggilogo fikhesik, hokhorogo herakfikhi logolik, misigat ekhe mondok wolelenggen tagalogo fikhi logolik, afuni inebe 7.000 nen inoatunem, it fena inoati'lek mene inailo hokhorogo agaikhasik, iren he, ”Allah pogoroba mene, nailo e,” iluk fogeratunem isigi o.

¹⁴ A'nogo hilinglaga mene arat asi lagunem, yethani! Weagerinabigin mene a'nogo re, inenggi pireba arat weagerinafesik, ombo'ne ekhe weak-weagat weagerinafemo weregaro.

Pinggong ane wurep oba anet hasukwa wene

¹⁵ A'nogo isigiri'mo nen, it malaikat inebe 7 nen omanogo, inebe falfalik mene inambinggong arat anet hagasi'mo nen, ekhe ambinggong anet hugunem he, pogoroba nen inane hokhorogo yi'nogo ugunem holhi: ”Attak afuni kweangma mene nen inawe a'ma fisaluk ferinarek welagaukwa mene re, yogondak nineisena Enupogot Allah nen ninoe Kristus nen telninabuageluk menfesikhe mene a'nogo emberegen inawe a'ma arat ninobagagasik, at Kristus nen fetninarek mondok-mondok logogin o,” iluk ikhi lagaikha.

¹⁶ Nen, it inaluendek inebe 24 en Allah era'lu kain inobuluk oba welagaikharek mene omanogo inelokhe sagaum Allah awe a'ma kuluk fogerati logolik mel ikhi lagaikha:

¹⁷ ”Allah Nineisena, Hat homame hokho mene, Attak welagagindik yogondak inomat welagen andiba, Yogondak hat hebe kain Henupogot logolik, Afuni mondogat hawe a'ma arat fisegendik, Ferinarek mondok welagen andi nen, Hai wathafi lago.

¹⁸ Afuni inunggulenu lombok mondogaren, Inanini hoba fikhi lagaikha mene, Haren ogo hanini inoba fagain andi. A'nogo inoba fikhi logolik, Afuni wa'lagaukwa mene ekhe, Wene inoba fikhi logolik, It ekhe wene inoba kosigin mene, Hat hane yagaisagarek mene inom, Hagainafuri inenu werek inom, inenu lek mene inom mondogat, Hat inailorogo logolik, Hane wanho welagaikharek mene faget, Onggo arat wogisagain andi. It ekhe o kweangma weagetfesukwa mene, Haren it arat weagerinabigin andi. A'nogo hilingisigin andi nen, Hai wathafi lago o,” iluk wuni wati lagaikha holhi.

¹⁹ A'nogo ugunem isigirik yethigi hak he, pogoroba Allah awi wuri'mo kwe hu'lagunem he, Allah nen wene komotninafikhe wene lisu palek peti elonggoma kwalek welagaikhe a'nogo weinam aga. A'nogo weinam agunem he, eilabut hobugalep yararethigik, unggunggu ane pak ilugen ane lulu lagik, lugul lang-fanget higik, meiso sogonggen hokho mene pelafik ninggik ugunem yethigi o.