WAHYU 1 - Allah Wene Fano Wene Hupla Inane

Yesus nen wene hinago mene Yohanes abikanggoba yagatu kwelek, lisu palhikhe wene

¹ Wene ebe re, yi'nogo. Yi wene ti wene hinago welagaikhe mene hobuk weak-weak hilinglasigin mene andi, Allah amingmingengge mene furogo yagaisoageluk Allah nen at Yesus Kristus weinamhogo yagatikhemo, at Kristus nen malaikat lakfei wagaikhemo, wene andi an at Allah amingmingengge Yohanes noba yaganete.

² A'nogo yaganetemo, Allah ane andi Yesus Kristus nen abok yaganetunem wene mondogat an neilenggen higi mene andi abok fakhogo lisu palogo figi andi o.

³ Wene andi mondogat he, weak-weak hilinglasigin andi nen he, it afuni ekhe wene lisu palek mene yi enu salugun mene inom, it ekhe inesanggo holimbik, wene andi hologo higithogo hilingiti logogun mene inom, Allah nen inebe fanorinafunem inendawimo inagaiyek hikhi logogun o.

It Allah againafuri gereja 7 nen andogoti lagaukwa mene hai warinafikhe wene

^4-5 An Yohanes nen hit o propinsi Asia 7 gereja andogoti lagep mene andoma nerugwi nagaila'lak. Nineisena Allah ebe etok mondok logolik, endam welagaikhe, yogondak weregat, hobuk mondok logogin mene wesigin andi inom, Allah ebe kain welagarek obuluk oba werek kwelek Areagun ebe katoksek mondok iluk 7 nen elokhoma welagaikharek andi inom, at Yesus Kristus obabut humbunhogo logolik Allah abok fakhogo yaganisikherek mene a'nogo inom, inobabut fano a'nogo nen kwelakhinarek logolik fano mene wokhisigik, hinendawinggen hambugethinafik, ikhi logouwago iluk, hai wathinafi. At Yesus ebe wa'lagaikhesi'mo nen eisena Allah nen omalik manggusa taginafarek andi hak, at tak ambotkwe eluget fesikhemo, afuni kaindek inenupogot kweangma mene yoma inebe elo'lek meneat he, at enek he, esin welagarek. A'nogo logoigeluk, niren weak hilingiti lagagu andi nen, ninebe hele warek hangge fetninarek were'ma, aren nit endawitninafikhesik, amep wulagaisogo wa'lagaikhe andiba he-le fikhalninfikhe andi.

⁶ A'nogo fikhalninafikhesik, nit at eisena faget hilingiti logouwageluk, ninebe kain Allah eisewerek menninobagasikhemo welago. A'nogo menninobagasikhemo logolik ninendawimo nen he, ”At Yesus Kristus andi, omame hokho werek,” iluk nit at ebe eberogoat fogeratu mondok logouwogo, iluk, u hak, ”Amin,” igi andi.

⁷ Yethani! At ebe ohena anggele'ma wagunem, afuni mondogat inebe lombogen inom, it at sige taukhogo watukwa mene inom, inomaren ineilenggen yethikhi logolik, inunggulenu lombok mondogat le asugun o, iluk yagahisigi andi, ”Ebe asuak,” u hak, ”Amin,” igi andi.

⁸ Nineisena Allah Enupogot omame hokho andi, etok mondok logolik, endam welagaikhe, yogondak weregat, hobuk mondok logogin mene wesigin a'nogo nen ikhi logolik he, ”Ero inom, erembul inom, an aro,” iluk ili'logo o.

Yohanes abikanggo oba Kristus ebe eilenggen hasikhe wene

⁹ An hinerei hinagailak Yohanes ninom ninebe Yesus agoromi misigat mene, yi enggin ti enggin hilingninafu kwelek, ninendawimo nen he, ”Hobuk at Allah nen awe a'ma ninobagagin,” iluk ninafe morogo welagorek andi. Were'ma, Allah ane Yesus nen fakhogo yaganisasikhe wene a'nogo an nen yagaisilik nigirek andi nen, nenggi hele warogo i enggenma o enu Patmos kwelaknobagai wagaikhama welagi o.

¹⁰ A'nogo were'ma, o ninoe Enupogot awi wei ikhemo re, Allah Areagun noba louk ikhemo, nambotma nen at ekhe ane pinggong hokho mene ane hangge oba mel yaganetunem nesanggo holhi:

¹¹ ”Hat heilenggen hagain mene andi, lisu palino o. Palogo re, it Allah againafuri 7 gereja nen andogotarek mene, o enu Efesus inom, Smirna inom, Pergamus inom, Tiatira inom, Sardis inom, Filadelfia inom, Laodikia inom, inoba lakfeino o,” iluk yaganete.

¹² A'nogo yaganetemo, ”Ane andi sa nen yaganeri'logo,” iluk nambotkwe neilenggen hebekhogo yethigi hak he, esage ibilharek mene ebe 7 nen eisok telik emas mene hilingitarek mene were'ma higi o.

¹³ Nen, esage andi elonggoma tulem abat ta'lagaikhe mene a'nogo elokhonggen hangge, su uan endakwe mene huli eisok oba pikhit laberek, nen amik enggen oba emas mene laberek.

¹⁴ Nen, esi re, domba esi mola o anggup hangge. Nen, eilenggen he, endu amulok hangge.

¹⁵ Nen, eisok he, tembaga endumo weratunem amulit papaget hikherek hangge. Nen, ane re, i hut hokho mene ane hangge.

¹⁶ Nen, enggi ebekwe re, hesagal ebe 7 nen fisogo welaga. Nen, ambelema nen karok enggat fena-fena mago mene wulibi waga laga. Elokhonggen amulit he, o lingge tulem mo tilelek-walelek yaterek andi hak were'ma neilenggen higi o.

¹⁷ A'nogo were'ma higirik he, nailo nen nelokhe sagaum warek mene higit at awe a'ma sagam esi lagunem he, at enggi ebekwe an noba fikhesik he, mel yaganete: ”Hailo lek ame. An nebe re, eroba nen pikhit erembul oba netok mondok logolik he,

¹⁸ neluk mondok welagirek he, an aro. An nebe arat wa'lagagi meneat he, yethan! Neluk agagisik, neluk mondogat logogin o. Wa'lagaikharek andi inom, wa'la'luk lagaikhare'ma andi inom, kwe hutarek mene an nenggiba werego.

¹⁹ An a'nogo welagi andi nen he, heilenggen hegen mene yi wene ti wene yogondak ya hilinglari'logo mene inom, hobuk hilinglasigin mene inom, mondogat lisu palin o.

²⁰ Nen, hesagal ebe 7 nen nenggi ebekwe fisogo were'ma hegen a'nogo inom, esage ibilharek ebe 7 nen eisok telik emas mene hilingik inom, heilenggen hegen a'nogo re, wene hinago mene andi nen he, fakhogo yagahesigo. Hesagal ebe 7 nen hegen andi ebe re, it Allah againafuri 7 gereja nen andogotarek mene andi, Allah nen malaikat inayonggo fuluk lakfisa wagarek andi hak, inayonggo fesikhesik fisasikhe mene isegen o. Nen, esage ibilharek 7 nen andi ebe re, it Allah againafuri 7 gereja nen andogotarek mene andiat isegen o,” iluk yaganete.