ULANGAN 9 - Allah Wene Fano Wene Hupla Inane

Afuni Israel mene nen Allah ane sagalhi logoinogo iluk yagaisasikhe wene

¹ At Musa nen a'nogo yagaisasikhesik ekhe mel yagaisasikhe: ”Hit afuni Israel mene yi, nerugwi nagaila'lak. Hinesanggo fanorogo holini. O yogondak he, afuni inunggulenu hit hinom higit mondok lek. We, it inunggulenu hokhoat, nen, inomame mondok hokho mene inaiba sebeli kwimbik logouwogeluk i Yordan palogo wulibugun andi. It inaiba kota re, mondok hokhondek mene, leget helep oba mondok uan-awan pogoroba higit wurik werego.

² Nen, afuni inebe inobakhe mondok hokhondek mene re, inomame mondok hokho were'ma, afuni ekhe nen he, it andi weim inom yafi logolik mabenetfisogoin mondok elo'lego, iluk inabok ugunem hinesanggo lombok holhep anggigi.

³ A'nogo meneat he, yogondak at nineisena Tuhan Allah ebe endu nen yi mene ti mene felelenghogo nilik lagarek andi hak, hinelokhoma attagat laga logolik it afuni andi mondok mabenetfisilik lagunem hineilenggen tomok hogoin aro. A'nogo mabenetfisilik lagunem, At nineisena Tuhan Allah nen, hobuk yi'nogo hilingisugun, iluk wene wathisasikhe higithogoat, hiren it afuni andi weak-weagat mugisigik legetfisigik, ugun o.

^4-5 At nineisena Tuhan Allah nen hit faget it a'nogo mugisogo wulakfisikhe halok, hit hinendawimo nen he, nit he elogo. Nineisena Tuhan nen endawimo agaiyek mene nek hilingiti lagoba, Aren nit o yoma wo'nisagain higithogo wo'nisikhe higi, iluk anggagubo. A'nogo hilingiti lagep mondok lek mene aro. Nineisena Tuhan nen afuni andi mugisogo wulakfisagain andi re, it inobabut mondok weak hilingitarek andi nen aro. At nineisena Tuhan nen he, nit ninombalak Abraham inom Ishak inom Yakub inom yagaisikhi logolik, yi'nogo wokhisagain, iluk wene warisasikhe mene andi emberek higit asuageluk endawimo anggikhe andi nen he, o andoma hit sebeli kuageluk wokhisagain o.

⁶ Hit hinendawimo nen he, nineisena Tuhan nen, o kweang mondok muli fanoma andoma nit eise asugun obaat asuageluk wo'nisikhe fuk. Mondok lego, iluk futfeino o. Hit he, hinungguloak mondok helep, afuni inane hologo hilingsu mondok lek a'nogo hit aro.

⁷ Hiren o Mesir herakfuluk o leimo afuni inebe lekwe waga lagepsik, pikhit o yoma wagep huli nen, nineisena Tuhan Allah a'mage lagauwageluk hinom weim higit hilingirik wagep a'nogo hinendawimo ebe'ni o.

⁸ Hinobabut a'nogo hilingirik waga logolik, tom Sinaiba nen, nineisena Tuhan a'mage mondok ebenagaik lagauwageluk hilingitigipmo, Aren hit hinebe mondok legethinabigiluk isikhe andi.

⁹ A'nogo hilinghinafikhe andi re, nineisena Tuhan nen wene warogo wo'ninafikhe wene a'nogo helep sabiaba lisu palogo fesikhe mene wanigiluk tom oba lagasigisik nenggi 40 nen sumburu inom, i inom mondok ninggi'lek andoma welagagi andi.

¹⁰ Hit hinebe tom a'ma andogorek werek kwelek, At Tuhan ebe endu anggele'ma logolik, At onggwaregenat aneba komorogo helep sabia pire meneba lisu palogo fesikhe mene an wo'netikhe andi.

¹¹ A'nogo wo'netikhe andi re, nenggi 40 nen arat welagagisik oba nen wene warogo wo'ninafikhesik helep sabia mene pire andiba lisu palogo wo'netikhe andi.

¹² A'nogo wo'netikhesik, at nineisena Tuhan nen he mel yaganetikhe: Afuni o Mesir en woginarek wagen omanogo nen weak mondok hilingita andi nen he, hat weak-weak pin o. Iren he wene An nen, Yi'nogo hilingiti logoino, ti'nogo hilingiti logoino, iluk komothinafi mene a'nogo sagalogo herakfisagasik he, tugwi kembu fogerati logouwogeluk ekhe alik hilingisogo faga o, iluk yaganetikhe andi.

¹³ A'nogo yaganetikhesik ekhe mel yaganetikheat: Afuni andi inobabut he, inane hologo hilingisu elo'lek inungguloak mondok helep andi An nelu o.

¹⁴ Ma re, it andi afuni nen inoba inonggoret fisambik logouwageluk, An nen it mondok legetfisagain anggikhi lagi andi nen he, haren An nendawinggen sebelhun o. It mondok legetfisambik, harenek he, it afuni Israel mene inunggulenu endebat inomame lek andi hangge lek. At he, haren tagongge mene inunggulenu hokho inomame hokho mene ineisena hilinghabigin o, iluk yaganetikhe andi.

¹⁵ A'nogo yaganetikhemo holhigisik, nambotkwe lagokhogo pi wesigiluk he, Aren wene komorogo wo'ninafikhe mene helep sabia pireba lisu palek a'nogo nenggi fena-fena waluk tom a'nogo endu amuilok lagagu kwelek pi wagagi anggigi.

¹⁶ A'nogo pi waga logolik neilenggen kwelakhasigi hak he, hiren nineisena Tuhan Allah nen, yi'nogo hilingiti logoino, ti'nogo hilingiti logoino, iluk komotninafikhe wene andi sagalogo re hinonggwarek faget, tugwi kembu emas mene endumo lebeleget fesigipsik sapi hangge wurogo fesigip andiba At Tuhan eilhanem mondok weak hilingitigipmo neilenggen hasigi andi.

¹⁷ A'nogo hasigisik he, Allah nen wene warogo wo'ninafikhe wene helep sabia pire meneba lisu palek aremnogo neilhanem uare'mangge potfisagain anggasigi re, mondok siril-serelhogo amu-amu lakfisasigi andi.

¹⁸ A'nogo lakfisaluk hobuk tom oba lagagirik he, i inom sumburu inom, ninggi'lek nineisena Tuhan eilhanem neindep awi yagaisogo fogeratu nenggi 40 nenat, welagagi andi. A'nogo hilingitigi andi re, At nineisena Tuhan nen he, An neilhanem mondok weak hilingitebo, iluk isikhesik he, a'mage hokho mene lagasikhe.

¹⁹ Nineisena Tuhan nen, endu amuilok ibilasigiluk hilingiterek andi hak, At a'mage hit hinoba het-pet isikhesik hinebe mondok legethinabigiluk hilingitikhe andi, an nailo mondok hokho agaikhe. A'nogo meneat he, an nen hobuk nineisena Tuhan yagatigimo re, nane esanggo holhikhe aro.

²⁰ At nineisena Tuhan nen a'mage Harun oba fesikhesik, ebe mondok wasigiluk isikhe meneat he, an nen at faget samban isigiat andi.

²¹ A'nogo hilingitigisik, hit hinenggi nen emas mene tugwi kembu sapi hangge hilingitigip mene andi An nen endumo kwelakfisigirik nolhigi aro. A'nogo nolhigimo nasikhemo re, sagalogo mondok kweang wul agaikhemo re, i elesi tom oba nen wulibisogo pi wagarek mene andiba kwelakfisasigi o.

²² Nen, hit o Tabera inom, Masa inom, Kibrot-Taawa andoma logolik, At nineisena Tuhan a'makwe het-pet uagaluk weak hilingitigip aro.

²³ A'nogo hilingi'luk, At Tuhan nen hit o Kades-Barnea andoma herakfisaluk o hit wokhisagain oba andoma logouwogoluk waga logolik, nineisena Tuhan nen, yi'nogo sebeli kwino, iluk yagahisasikhe mene andi, eberogoat yaganisikhe, iluk hologo hilingisu hinabiren sagalogo weak hilingitigip andi.

²⁴ O attagaren an hit hinobabut nelu agaikhe huli nen enggere, hit he nineisena Tuhan ane sagalogo hilingitu mondok welagebo.

²⁵ A'nogo hilingiti lagep andi nen, nineisena Tuhan nen he hinebe legethinabigiluk isikhe andi an nelu o. A'nogo isikhe andi nen, an nineisena Tuhan elokhoma neindep awi yagaisogo fogeratu 40 hari logolik, samban yi'nogo ikhi lagagi:

²⁶ Neisena Tuhan Allah Esin Lego welagen mene neisena. Hat honggwarek hagainafuri andi it afuni o Mesir mene nen inamingmingengge hangge ferinarek were'ma homame hokho a'nogoba telogo woginarek wulibi wagagin mo re, inebe legetfisagun o.

²⁷ Haren it afuni Israel mene inobabut mondok weak inane hologo hilingisu lek, inungguloak helep, weak mondok hilingitarek mene andi heilenggen woginafun o. We, it hamingmingengge mene Abraham inom, Ishak inom, Yakub inom, inoba ebe'no o, neisena.

²⁸ Hat hagainafuri andi inebe mondok legetfisagain halok he, afuni o Mesir mene nen mel yagahesugun: At Allah nen he againafuri o it wogisageluk wene warisasikheba loageluk inebe woginarek laga a'nogo re, Aren woginarek la elo'lek agama re, inebe abiren o leimo afuni le'ma andoma nen inoasigiluk woginarek lagama higi, iluk yagahesugun o.

²⁹ Andi nen he, hat hendawimo ebesin o, neisena. It hagainafuri andi, hat hagainafuri hilinglasuageluk wenaginafigindik, homame mondok hokho andiba it o Mesir en woginarek waga lagen andi hendawimo ebesin o, neisena, iluk yagatigi andi,” iluk yagaisasikhe.