ULANGAN 8 - Allah Wene Fano Wene Hupla Inane

Allah nen ninombalak kweang fano mene ekhe wogisageluk abok yagaisasikhe wene

¹ At Musa nen a'nogo yagaisasikhesik, ekhe mel yagaisasikhe: ”Nineisena Tuhan nen, nit ninombalak o hit logogun oba andoma it wogisageluk wene warisasikheba andoma, hit hineluk fano logolik hinebe hokhorogo hilinglasubagaigen he, aren ikhi logolik, yi'nogo hilingiti logoino, ti'nogo hilingiti logoino, iluk isikhe wene hit yogondak yagahisigi andi mondogat fanorogo higithogo hilingiti logoino o.

² At nineisena Tuhan Allah nen he, hit hinendawimo anggaluk ninggi'nogo hilingisugun. Wene an nen, yi'nogo hilingiti logoino, ti'nogo hilingiti logoino, iluk komothinafi wene andi hologo higithogo hilingiti logogun a? Lega, iluk hinobabut paligiluk, kwe yatkwe nenat o leimo afuni lekwe wokhinarek wagu kwelek, 40 tahun hilinglaga andi hinendawimo ebe'ni o.

³ A'nogo wokhinarek waga logolik, hit sumburu nele logouwageluk eranenat hilinghinafikhesik, hobuk sumburu manna hit inom, hinombalak inom, ekhe ninggi'lek enduk hinonggot mene noageluk wokhisasikhe andi. Aren a'nogo hilinghinafikhe andi re, mel yagahisageluk: Afuni sumburu nek ninggi logolik, ineluk mondok welagaikharek lego. We, An hineisena Tuhan nane igirek mene andi mondogat wanhu halok, hineluk mondok logogun o, iluk yagahisageluk hilingitikhe andi.

⁴ Andi nen he, 40 tahun andem oba logolik, hit hinasu mondok libilagik, hineisok fitik, igi'lego.

⁵ At hineisena Tuhan Allah nen he, yenggerugwi inesugwi nen yei warogo komorinafarek andi hak hilinghinabik waga andi hinendawimo ebe'ni o.

⁶ Ma re, at nineisena Tuhan Allah nen, yi'nogo hilingiti logoino, ti'nogo hilingiti logoino, iluk komothinafe wene andi hologo higithogo hilingiti logolik, agaukhogo hilingiti logoino o.

⁷ At nineisena Tuhan nen hit wokhinarek o kweang mondok muli fanoma, i hokho mene inom, i elesi agai inom hokhorogo were'ma, i kweang elema nen hut hilingisogo founalogo o tonggwe mondogat kwelabik lagik, tom ebene nen kwelabik lagik, ikhere'ma andoma wokhinarek lagain o.

⁸ O andoma re, yi gandum ti gandum inom, anggur inom, e ara inom, e delima inom, e zaitun inom, enggen mondok hokhorogo itik, kin amusu hokhorogo welagik, ikhere'ma o.

⁹ O andoma, hit sumburu nele agik, yi mene ti mene lek hinelagaik welagik, ikhi logogun lego. Nen, helep isa talek elema posie ero figik, tom ebene kweang habulogo tembaga wani kwigik, ikhi logogun o.

¹⁰ A'nogo logolik, hinamburu hinalabut ninghogo mondok ninggi logolik, nineisena Tuhan Allah nen kweang muli fano mene wokhisikhe mene andi faget At hai watu mondok logogun o,” iluk yagaisasikhe.

”Nineisena Tuhan oba hinonggoragi'lek hinendawimo eberek logoino o,” iluk yagaisasikhe wene

¹¹ A'nogo yagaisasikhesik, ekhe mel yagaisasikhe: ”Hiren nineisena Tuhan oba hinonggot asinogo iluk hinafe hebelogo logoino o. Aren, hit yi'nogo hilingiti logoino, ti'nogo hilingiti logoino, iluk isikhe wene yogondak yagahisikhi lagi mene andi mondogat, hiren ekhe hologo higithogo hilingiti'lek hinendawimo serametfuluk logogubo.

¹² Hinamburu hinalabut ninghogo ninggik, hinaiba hinebe logogun oba fanorogo wurigik,

¹³ hinanggo sapi, kambing, domba inom, hina uang, perak, emas inom, hinangge hinasungge fenakwe ekhe inom, mondok hokhorogo hilinglagik, ikhe halok,

¹⁴ hinonggwaregen fogerakhigik, At nineisena Tuhan nen hit hinebe afuni Mesir mene nen inamingmingengge higit fetninarek were'ma telogo wokhinarek wulibi wagaikhe mene a'nogo oba hinonggoragik, inogo nen he, hinafe hebelogo hilingiti logoino o.

¹⁵ At nineisena Tuhan hit hinebe wokhinarek, o leik hokhokwe afuni inebe le'ma, inailorekwe, kisu afuni inoaterek mene inom, elilim aik anini weak mene inom, mondok hokhorogo were'ma wokhinarek waga laga andi. i mondok le'ma kweang amusu mondok le'ma wokhinarek waga logolik, hit hinoba hambukhogo nobagaigeluk, i helep elema nen elesi wulibisogo wokhisikhe andi.

¹⁶ O leimo afuni le'ma yoma nen sumburu manna hit hinombalak ineilenggen higi'lek inonggot mene hit noagaluk wokhisilik waga laga andi. A'nogo hilinghinabik waga laga andi re, wurep oba fanot fanothinabigiluk hinobabut palhik, hinendawinggen sebelfakhaluk hilingiti logouwageluk hilingirik waga laga andi.

¹⁷ Andi nen he, hiren he, nit ninonggwarek ninomameba nen heragaisogo ninebe kain nineilmo wulalhak hilingirikhi lago, iluk hinendawimo anggagubo.

¹⁸ We, nineisena Tuhan Allah nen yi mene ti mene yoma wo'nisili'lago higi, iluk hinendawimo eberek logogun o. Aren ninombalak yagaisikhi logolik, an nen hit yi'nogo hilinghinafi logogin, iluk wene warisasikhe andi nen, a'nogo hilinghinafu mondok huli yogondak hinoba eberek mondok werek andi.

¹⁹ Nineisena Tuhan Allah oba hinonggoragi'lek eberek mondok logolik, hinendawimo nen hunogoat mene faget, nineisena ebe andiat iluk fogeratik, hinebe at amingmingengge hilinglagik ugubo. A'nogo meneat he, hiren fogeratep halok, At nineisena Tuhan nen hinebe mondok legethinabigin, iluk hinendawimo eberek logoubagaigeluk yogondak yagahisigi andi o.

²⁰ At nineisena Tuhan Allah ane hologo higithogo hilingiti'lek halok he, Aren afuni inunggulenu hunogoat mene hit hineilhanem inebe mondok legetfisagain andi hak, hit hinebe mondok legethinabigin o,” iluk yagaisasikhe.