ULANGAN 7 - Allah Wene Fano Wene Hupla Inane

”Ninebe Allah nen wena'ninafikhesik ninayonggo fesikhe,” iluk yagaisasikhe wene

¹ A'nogo yagaisasikhesik, ekhe mel yagaisasikhe: ”Nineisena Tuhan Allah nen o hit hobuk logogun oba andoma wokhinarek lambik, afuni inunggulenu hokho mene pugulogo wulakfisagain. Wulakfisambik logolik inunggulenu 7 nen hit hangge lek. We, it inunggulenu hokhoat, inomame hokho mene, mugusogo wulakfisagain o. It andi re, inunggulenu Het mene inom, Girgasi mene inom, Amori mene inom, Kanaan mene inom, Feris mene inom, Hewi mene inom, Yebus mene inom, mugusogo wulakfisagain o.

² Nineisena Tuhan Allah nen it afuni andi hit hinenggiba foumo, hiren it mabenet fisambik inebe hinendawi nen ekhe herakfisambik, ninom hundik logouwok, iluk wene warisogoin mondok lego. We, inebe mondok felelenghogo inoa'no o.

^3-4 Iren he, hit hinagainafuri nineisena Tuhan inom hundik mene kofologo herakfisaluk, iren, Nineisena ebe yiat, iluk, it mene fogerasuageluk yagaisikhi logoinogo nen, hiren it ina'logomi mene woginafik, iren hit hina'logomi mene woginafik, ikhi logogun mondok lego. Hiren, tugwi kembu andi fogerati logogun halok, nineisena Tuhan a'mage hokho mene lagambik he, hit hinebe weak-weagat legethinobagagin o.

⁵ Andi nen he, iren inandugwi kembu anggo ware'luk noletarek kwe obuluk wurik mene andoma mondok meisalhik, helep mene men fuluk, mondok wesa iluk agarek mene andoma siril-serelhogo lakfisigik, inandugwi he mene Asra alik hilingik mene andi meisak lambukhogo lakfisigik, tugwi kembu hilingisogo fuluk fogeratarek mene andi endu nolhik, ilik lano o.

⁶ Hit hinebe Tuhan Allah againafuri esin mene hilinglasubagaigeluk, yi afuni ti afuni kweangma welagaikharek mene mondogat inunggulenu lombok inanggele'ma nen kigilogo wenagaisogo hinobagasikhesik hinayonggo fesikhemo hinebe eise At Tuhan Allah onggwaregat andi nen he, mondogat a'nogo hilingirik lano o.

⁷ Hit hinebe nineisena Tuhan endawinggen hundik mondogen wenagaisogo hinobagaikhesik hinayonggo fesikhe andi re, hinebe afuni ekhe inunggulenu hokho welagaikharek andi hangge welageben fuk. Lego. Hit hinunggulenu, we, mondok endebat welagep mene aro.

⁸ A'nogo meneat he, nineisena Tuhan hinebe mondok endawi nen, Yi'nogo hilinghinabigin, iluk ninombalak wene warisasikhe mene andi, ebe tiphogo hilinglasuageluk hinebe wenagaisogo hinobagaigeluk hinayonggo fesikhe o. Hinayonggo a'nogo fesikhe andi nen, hit hinebe afuni Mesir mene inoe kain enupogot Firaun amingmingengge higit logouwageluk fethinarek were'ma nineisena Tuhan omame mondok hokho andiba telhinafikhesik wokhinarek wulibi wagaikhe andi.

⁹ Nineisena Tuhan Allah ebe amuat logolik, obabut wene wa'nisikherek higithogo hilingiterek andi oba eberek mondok logoino o. Afuni nineisena Tuhan ebe inendawinggen hundik logolik, Aren, Yi'nogo hilingiti logoino, ti'nogo hilingiti logoino, iluk komotninafikhe wene andi hologo hilingitunem, Aren inebe endawi nen leberisugu mondok were'ma, wene wa'nisasikhe mene andi ebe higithogo mondok hilinginafu kwelek inagainafuri 1.000 huli ta'larik laga logogun andi.

¹⁰ A'nogo meneat he, it afuni At inabit mene andi endawirinafi'legat wene inoba fagain o.

¹¹ Halok he, wene hit hilingiti logogun mene yogondak yagahisigi andi, mondogat hologo higithogo hilingiti logoino o,” iluk yagaisasikhe.

”Hiren wene hologo higithogo hilingiti logogun halok, Allah nen fanothinafi logogin o,” iluk yagaisasikhe wene

¹² A'nogo yagaisasikhesik ekhe mel yagaisasikhe: ”Allah nen he, Yi'nogo hilingiti logoino, ti'nogo hilingiti logoino, iluk komorogo yaganisasikhe mene andi, hiren futfuluk, hinaberali agi'lek hilingiti logogun halok, nineisena Tuhan Allah nen, Yi'nogo hilinghinabigin, iluk wene wathisasikhe mene andi aberali legat ebe higithogo hilinghinafi logogin o. Aren ninombalak yagaisikhi logolik, hinebe nendawi mondok logogin, iluk wene warisasikhe andi hak, hit a'nogoat endawithinafu mondok logogin o.

¹³ Aren, hit endawit hinabimbik, fanothinafu mondok were'ma, hit hinagainafuri hokhorogo taginafunem inebe sik-pik ikhi logogun o. Nen, hit hineabukwe yi mene ti mene yago mene fanotfugunem, gandum inom, anggur inom, e zaitun enggen amusu minyak keralhi logogun mene inom, enggen hokhorogo iti logogin aro. Nen, Aren he, hinenggim mene fanotfugunem, hinanggo sapi, kambing, domba inom, hokhorogo hilinglasigin aro. Nineisena Tuhan nen ninombalak yagaisikhi logolik, yi'nogo wokhisikhi logogin o, iluk wene warisasikhe higithogoat, hit o logogun oba andoma were'ma mondogat wokhisugunem a'nogoat helikhi logogun o.

¹⁴ Aren, hit yi mene ti mene hokhorogo oba loukhogo wokhisugunem helikhi logogun andi hak, afuni inunggulenu lombok kweangma yoma welagaikharek mene andi ekhe wogisugunem helikhi logogun mondok lego. Hit hinebe inom, hinanggo inom he, mondogat he abili mene ekhe logogun lego.

¹⁵ Hit hinebe nineisena Tuhan o Mesir oba logolik fethinarek were'ma Aren ou enggin mene hinoba figik, yi weak ti weak hinoba figik ugunem hit hineilenggen tomok hikhi lagagip andi hangge ekhe hinoba fagain mondok lego. We, it afuni hinaselei mene andi inoba fikhi logogin.

¹⁶ Nineisena Tuhan nen afuni inunggulenu lombok inebe hinenggiba hinobagagin mene andi, inebe ekhe hinendawirinafi'lek mondogat legetfisikhi logoino o. Hiren it afuni andi nen, Nineisena ebe andiat, iluk agarek mene andi fogeratunem, hinebe alomat laga logogun andi nen he, fogerati logogubo.

¹⁷ Hit hinendawimo nen he, afuni inunggulenu lombok andi inebe mondok hokhorogo werek andi nen he, niren mugisogo wulakfisogoin he elo'lek anggikhi lageba.

¹⁸ A'nogo anggagubo, it faget hinailo asu fuk. Nineisena Tuhan Allah nen ap kain enupogot Mesir mene inom, afuni aren awe a'ma ferinarek welagaikhe mene mondogat inom, hilinginafunem hineilenggen tomok hasigip a'nogo hinendawimo ebe'ni o.

¹⁹ Nineisena Tuhan hit afuni Mesir mene nen fethinarek were'ma wokhinarek wulibi wesigiluk omame mondok hokho meneba hilingiti logolik, yi weak ti weak mondok weakhogo inoba figik, elalin mene hokhorogoat hilinginafik, isikhe andi hinendawimo ebe'ni o. It a'nogo hilinginafikhe andi hak, afuni hit hinaselei mene inunggulenu lombok inoba hinailo mondok welagep mene andi, a'nogoat hilinginabigin o.

²⁰ Nineisena Tuhan nen a'nogo hilinginafunem inailo nen hesangge-pesangge pugulhi logolik, it ekhe hinagaiserogo hina'lasi logoin mene re inebe alomat lasugun aro.

²¹ Andi nen he, afuni andi inoba re hinailo asu fugo. Nineisena Tuhan Allah lego mondok logolik omame hokho were'ma inailotharek mene a'nogo nen fethinarek mondok logogin o.

²² Wam maro aik anini weak mene esa hokho a'luk weagethinabinogo nen he, afuni hinaselei mene andi we misigam wulakfisogoin lego. We, endep-endep mondogat mugusogo wulakfisogoin o.

²³ Nineisena Tuhan Allah nen it afuni hinaselei mene andi hinenggiba hinobagaluk, hesangge-pesangge pugulinafunem inebe mondogat alomat lakhogoin o.

²⁴ It hinaselei mene andi inogogwi kaindek inenupogot inebe hinenggiba hinobagaumo, hiren it inebe inoasumo re, inenu mondok hinonggot asumo eberek logogun mondok lego. It inebe mondogat hiren inoasugun andi. Ekhe misigat halok eluk logolik, hit hinoasigiluk weim abok ekhe igin mondok lego.

²⁵ It inangge tugwi kembu alik hilingisogo fuluk fogeratarek mene andi endu nolfisano o. Tugwi kembu oba perak mene, emas mene, werek halok namolo iluk anggaluk hugulengge hinonggwarek faget helagubo. Nineisena Tuhan Allah nen enolino, iluk yagahisikhe mene andi ane sagalogo hilingitep halok he, hinebe wa'lasugun o.

²⁶ Allah nen andi mene homan fisikhemo weak asugun andi hit hinom weagethinabinogo iluk, tugwi kembu hit hinaiba ekhe fugubo. Hineisena Tuhan he, andi mene homan fikherek andi nen, hiren andi mene hinendawimo serametfisaluk hinabit logoino o,” iluk yagaisasikhe.