ULANGAN 6 - Allah Wene Fano Wene Hupla Inane

Wene esin mene komorinafikhe wene

¹ At Musa nen he, it afuni Israel mene ekhe mel yagaisasikhe: ”O hit hinenggi welagi'legat kwimbik logogun oba andoma logolik, wene nineisena Tuhan Allah nen komotninafikhe wene yiba re, ilren higithogo hilingiti logouwagen yagaisan o, iluk yaganete.

² Hit hinebe inom, hiren tagongge mene inom, o andoma hinebe umur uanhogo logobagaigen he, hineluk logolik nineisena Tuhan Allah agaukhogo fogerati logolik, aren komotninafikhe wene mondogat an nen yagahisikhi lagi mene yi hologo higithogo hilingiti logoino o.

³ Andi nen he, hit afuni Israel mene nerugwi nagaila'lak. Hinesanggo fanorogo holini o. Nineisena Tuhan Allah nen ninombalak yagaisikhi logolik, O kweang muli fanoma yi mene ti mene mondok hokhorogo were'ma andoma logolik hinunggulenu hokho asimbik fano mondok logogun iluk wene warisasikhe andi hak logobagaigen he, wene komotninafikhe wene yagahisikhi lagi yi, fanorogo hologo higithogo hilingiti logoino.

⁴ Nerugwi nagaila'lak. Wene yi hinendawimo eberek mondok logoino o. Nit nineisena re Tuhan Allah, At ebe misigat werek.

⁵ Hinendawinggen inom, hinobabut inom, hinomame inom, misigat asimbik, nineisena Tuhan Allah hinendawinggen hundik logoino o.

⁶ Aren, yi'nogo hilingiti logoino, ti'nogo hilingiti logoino, iluk komotninafe mene yogondak yagahisikhi lagi yi, hinonggoragi'lek eberek mondok logoino.

⁷ Hinendawimo eberek mondok logolik, hinagainafuri yagaisugu mondok logoino o. Hinaiba logolik inom, enda'ma nen inom, set walikhi logolik inom, hinenggi wanhi logolik inom, pilingitu mondok logoino o.

⁸ Hinendawimo eberek logouwogeluk, wene komothinafikhe wene andi hinenggiba kelhik, hinelhaba pugetik, ikhi logoino o.

⁹ Hinaiba kwebene inom, fesenggebene inom, lisu palogo figik, o silikwe ambe palek ebene lisu palogo figik, ikhi logoino o,” iluk yagaisasikhe.

Wene melalek sagalogo fugunem inendawimo eberek logogun mene faget yagaisasikhe wene

¹⁰ A'nogo yagaisasikhesik, ekhe mel yagaisasikhe: ”Nineisena Tuhan Allah nen ninombalak Abraham inom, Ishak inom, Yakub inom, yagaisikhi logolik he, O andoma hit wokhisagain o, iluk wene warisasikhe. Halok he, Allah nen o kota hokhondek mondok fano mene hiren wuti'lek mene wokhisagain o.

¹¹ O andoma kwimbik yi mene ti mene fano mene hiren figi'lek mene elonggoma mondok peterek mene wokhisagainat. Nen, i mogo hiren habulhi'lek mene wokhisagain aro. Yabu anggur yabu inom, zaitun yabu inom, awi hiren yati'lek mene wokhisagain aro. Nineisena Tuhan nen hit wokhinarek o andoma hinobagai lagunem, hiren yi mene ti mene nunggu mene eise asimbik hinalabut ninghogo ninggi logolik,

¹² nineisena Tuhan hit hinebe afuni Mesir mene nen inamingmingengge higit fethinarek were'ma telogo wokhinarek wulibi wagaikhe mene a'nogo oba hinonggot asinogo iluk eberek mondok logoino.

¹³ At nineisena Tuhan Allah agaukhogo fogerati logolik, At faget enek hilingiti logoino. Nen, hombuk paluogeluk halok he, At enuba nek palhi logoino o.

¹⁴ Afuni inunggulenu hunogoat mene o hit logogun oba andoma hinera'lukwe mene nen, Nineisena ebe andiat, iluk hunogo mene fogeratarek mene andi, hit ekhe fogerati logogubo.

¹⁵ At nineisena Tuhan Allah nit fetninarek mondok welagarek mene a'nogo obabut he, afuni ekhe nen, hunogoat mene faget, Nineisena ebe yiat, iluk agarek mene andi, inendawinggen oba himbiretfuluk fogerasu abit mondok anggikherek andi nen he, hiren, Nineisena ebe yiat, iluk hinendawinggen hunogoat meneba himbiretfuluk fogerati logogun halok, At nineisena Tuhan Allah a'mage endu higit hinoba fembik, hinebe mondok legethinabigin o.

¹⁶ Hit waga logolik, o Masa andoma nen nineisena Tuhan Allah a'mage werega, lega, iluk obabut paluogeluk hilingirik wagep andi hak hilingiti logogubo.

¹⁷ At nineisena Tuhan Allah nen wene komotninafe mene andi mondogat hologo higithogo hilingiti logoino o.

¹⁸ At Tuhan nen, fano mene yi'nogo hilingisugun, higithogo ti'nogo hilingisugun, iluk anggikherek andi mene nek hilingiti logoino. A'nogo hilingiti logogun halok, hit fano mondok logogun o. Nineisena Tuhan nen o kweang muli fanoma ninombalak wogisageluk wene warisasikheba andoma hirat eise asugun o.

¹⁹ Eise aga logolik, nineisena Allah nen wene wa'nisasikhe higithogoat he, hiren hinaselei mene andi mugusogo wulakfisogoin o.

²⁰ Hobuk hit hinagainafuri nen he, Nineisena Tuhan Allah nen, Wene komothinafi wene andi mondogat hologo higithogo hilingiti logoino, iluk yaganisasikhe andi nenahalok?

²¹ iluk heinok wokhisugu halok, hiren he, mel yagaisikhi logoino: Nit o attagat, afuni Mesir mene inoe kain Firaun amingmingengge hangge hilingninafukwasik fetninarek were'ma, nineisena Tuhan omame hokho andiba telogo wo'ninarek wulibi wagaikhe.

²² Wo'ninarek wulibi wesigiluk, afuni Mesir mene inom, inoe kain enupogot ebe inom, agoromi kaindek mondogat inomat inailo mene elalinat mondok hilinginafunem nit nineilenggen tomok hasugu o.

²³ A'nogo hilinginafikhesik, nit afuni o Mesir mene nen a'nogo fetninarek were'ma, Aren telogo wo'ninarek wulibi wagaikhesik o yoma ninombalak wene warisasikhe higithogoat wo'nisageluk wo'ninarek waga o.

²⁴ Nineisena Tuhan Allah nen he, yi'nogo hilingiti logoino, ti'nogo hilingiti logoino, iluk komotninafikhe wene andi hologo higithogo hilingitik, At agaukhogo fogeratik, ikhi logouwageluk yaganisasikhe. Niren a'nogo hilingiti logogun halok, Aren nit ninunggulenu yi mene fetninarek mondok were'ma fano mondok logogun o.

²⁵ Niren, nineisena Tuhan nen, yi'nogo hilingiti logoino, ti'nogo hilingiti logoino, iluk komotninafikhe wene andi mondogat fanorogo hologo higithogo hilingiti logogun halok, At oba liok ikhi logogin o, iluk yagaisikhi logoino,” iluk yagaisasikhe.