ULANGAN 33 - Allah Wene Fano Wene Hupla Inane

Musa nen he, afuni Israel mene inunggulenu lombok fanorinafi logouwagaluk yagatikhe wene

¹ A'nogo yagatikhemo, at Musa Allah nen ayonggo fesikhe mene a'nogo ebe oan wa'lagi'lek logolik, afuni inunggulenu Israel mene Allah nen fanorinafi logouwagaluk wene yi'nogo isikhe:

² ”Nineisena Tuhan ebe it malaikat inebe 10.000 mene inom, tom Sinai ba nen o mo henogo lagai wagarek andi hak, o Edom higit andoma wagasik, mo linggene yaterek andi hak, at enggi ebekwe higit endu ibilik logolik, tom Paran oba nen againafuri inoba ombak-bak tilelogo lakfei waga.

³ Eberogoat nineisena Tuhan he againafuri endawi welagarego. Afuni Aren wenaginafe mene nek inebe lombok mondogat ferinarek welagarek. Nit at awe a'ma nineindep awi yagaisogo nen fogeratik, Aren, yi'nogo hilingiti logoino, ti'nogo hilingiti logoino, iluk yaganisasikhe wene andi hologo higithogo hilingitik, ikhi logouwogo.

⁴ Hiren he, wene at Musa nen, Yi'nogo hilingiti logoino, iluk yaganisikhe mene andi hologo higithogo hilingiti logouwogo. Afuni ninunggulenu nit mene ninangge yi mene ti mene abelma hangge meneat he, esin he, ninawene fano wene andi aro, iluk isigip andi.

⁵ A'nogo ugunem hit afuni Israel mene hinogogwi hinom andogotigip andi sambul, nineisena Tuhan ebe hit faget kain Raja at logogiluk agaikhe andi,” iluk yagaisasikhe.

⁶ A'nogo yagaisasikhesik, afuni inunggulenu Ruben mene faget Musa nen wene Allah mel yagatikhe: ”It inunggulenu Ruben mene inebe endebat meneat he, mondok lek agi'lek logouwago,” iluk yagatikhe.

⁷ A'nogo yagatikhesik, afuni inunggulenu Yehuda mene faget wene Allah mel yagatikhe: ”Nineisena Tuhan Allah Henupogot mene, Afuni Yehuda mene nen henu hombuk palhi logogun andi, inane hesanggo holhi logoino o. It inale'ma hilinglagaikha halok, hobuk inunggulenu Israel mene inebe misigat logouwagaluk, it Yehuda mene yi inom lambukhogo fisano. It faget inaweim yabino, neisena. Inaselei mene nen inoasuogoluk ugunem telinafi logoino o,” iluk yagatikhe.

⁸ A'nogo yagatikhesik, afuni inunggulenu Lewi mene faget, wene Allah mel yagatikhe: ”It ap hat hamingmingengge ekhe inunggulenu Lewi mene hat hoba lomborogo logolik, hebe eisewerek welagaikharek. Logolik, inami'mo itarek mene Urim inom Tumim inom oba hat hendawimo anggegendek mene faget heinok wanhunem senggerogo yaganisoagaluk yagaisegendek andi. O Masa andoma nen inobabut palhik, i Meriba elesimo andoma nen hinom wene palhik, isigip oba nen,

⁹ inobabut Hat hoba lomborogo logolik, inesugwi inagaisawi faget inom, inogogwi, ina'logomi faget inom, inagainafuri faget inom, abelmatfisaluk, Hat hobaget enek he, esinetfesukwa andi. Haren, yi'nogo hilingiti logoino, ti'nogo hilingiti logoino, iluk yaganisasigin wene andi, iren hologo higithogo hilingitik, nen, haren he, An nen wene warogo wokhinafi, iluk isiginmo, iren, Nit At againafuri, iluk isukwa andi.

¹⁰ Andi nen he, hobuk iren he, Haren, yi'nogo hilingiti logoino, ti'nogo hilingiti logoino, iluk yaganisasigin wene andi mondogat it hagainafuri nen inaberali lekhogo hilingiti logouwagaluk yagaisigik, wam yi mene ti mene hat hobaget nolhetarek oba nolhetik, ikhi logouwago.

¹¹ Tuhan neisena, afuni inunggulenu yi mene inomame werek hilinglasuagaluk fanorogo leberisikhi logoino. Iren yabu hat faget hilingitunem hoba liok ikhi logoino, neisena. It inaselei mene mondogaren hobuk inoasuogoluk weim abok inogo iluk, haren legetfisikhi logoino o,” iluk yagatikhe.

¹² A'nogo yagatikhesik, it afuni inunggulenu Benyamin mene faget Allah mel yagatikhe: ”Afuni inunggulenu Benyamin mene yi re, hat nineisena Tuhan nen he hendawi hundik mene o. Andi nen he, hat hebe it inanggelekwe mondok logolik, linggene hubanggo ferinarek mondok logoino o,” iluk yagatikhe.

¹³ A'nogo yagatikhesik, it afuni ap Yusuf en tagongge mene faget, wene Allah mel yagatikhe: ”Meiso pogoroba nen inanggweang oba sakhot fei pi wagik, i elesi kweangma nen liagisa wagik, ikhi logoino o, neisena.

¹⁴ Yi mene ti mene awi yago mene enggen iterek sambul, enggen fano mondok mene nek eroba nen yugulagarek mene oba heilarogo iti logouwago, neisena.

¹⁵ It inandom endamat haren walhasigin mene andomaba welagarek mene re, yi mene ti mene enggen fano mondok mene nek iti logouwago, neisena.

¹⁶ At Yusuf ebe, at ogogwi, agoromi, inanggele'ma nen inoe kain logouwageluk menfesigin andi nen, hagainafuri inanggweang oba nen he, yi mene ti mene yago mene fano mondok mene nek oba heilarogo wogisigik, Hat hebe e sebelek mene anggele'ma endu amulok hangge wialhi logolik hane yaganetigin a'nogo hobabut fano nen fanotfigik, ikhi logoino o, neisena.

¹⁷ Yusuf he, wam sapi ai mene omame hokho mene hangge asuak. Wam sapi ai mene enggama mene andimuk ungguloa'ma werek andi hangge ap Manasye mene esa re, mondok hokhorogo ribuan hilinglasuak. Nen, ap Efraim mene esa re, mondok hokhorogoat puluhan ribu hilinglasuak. Wam sapi ai mene andimuk ungguloa'ma taunghogo inoaterek andi hak, at Yusuf en tagomangge mene ap esa hokhorogo andi nen, afuni ekhe inunggulenu hokhorogoat mene warogo o yi awi ti awi huli pogot ero-ero a'lima lakfisikhi logouwago,” iluk yagatikhe.

¹⁸ A'nogo yagatikhesik, it afuni inunggulenu Zebulon mene inom, Isakhar mene inom, faget Allah mel yagatikhe: ”Afuni inunggulenu Zebulon mene re kwe mondok nikhi logolik yi mene ti mene onggo heligik, saburigik, ikhi logolik fano mondok logouwago, neisena. Nen, it afuni inunggulenu Isakhar mene re inawi su mene wuri'mo logolik, inendawimo inagaiyekhogo fano mondok logouwagaro, neisena.

¹⁹ A'nogo logolik, afuni inunggulenu ekhe mene inayonggo foumo, it Zebulon mene inandom oba andogosi we'luk, wam yi mene ti mene hat hobaget nolheti logogun obaat eberogoat nolhesi waga logouwago. Nen, it Zebulon mene andi re, yi mene ti mene fano mene, i laut oba mene heligik, ial laut era'lukwe welagarek andoma mene heligik, ikhi logolik, ineilmo wulalhak aga logouwago,” iluk yagatikhe.

²⁰ A'nogo yagatikhesik, it afuni inunggulenu Gad mene faget wene Allah mel yagatikhe: ”Nineisena Allah, haren it afuni inunggulenu Gad mene inaiba hokhorogo wialek logouwageluk hilingfisikhi lagen andi nen he, fogethafi lago o. It afuni inunggulenu Gad mene andi inobabut he, mene singa obabut weak andi hangge logolik, yi mene ti mene wagunem wasigiluk housalek wela'luk wulifi logolik, enggi hea, ungguloak oba hea, agap aigen libik labakhogo waterek andi hangge logouwago.

²¹ Kweang mondok fanokwe andoma re it inonggwarek faget eise asuago. Nen, inogogwi kaindek mene re it meneat menfisikhi logouwak aro. Afuni Israel mene inogogwi mondogat inom inebe misi'mo andogetfuluk, Allah nen,” Yi'nogo hilingi'no, ti'nogo hilingi'no, iluk isikhe wene andi, it inomen mondogat hilingiti logouwago,” iluk isikhe.

²² A'nogo isikhesik, it afuni inunggulenu Dan mene faget Allah mel yagatikhe: ”It afuni inunggulenu Dan mene inobabut he, mene singa ket souge mene nen leget esia'le harogo wagarek andi hak, o Basan nen wulibi waga logouwago,” iluk isikhe.

²³ A'nogo isikhesik, it afuni inunggulenu Naftali mene faget Allah mel yagatikhe: ”It afuni inunggulenu Naftali mene nineisena Tuhan nen hendawirinabimbik he, yi mene ti mene oba heilarogo wogisikhi logoino. Nen, inawi re, i Galilea yenggelegen pikhit huli i ambutmo higit logouwago,” iluk yagatikhe.

²⁴ A'nogo yagatikhesik he, it afuni inunggulenu Asyer mene faget wene Allah mel yagatikhe: ”Afuni inunggulenu fenakwe, we, endebat hangge fanorinafi logolik he, it afuni inunggulenu Asyer mene nek he, mondok hokhorogo fanorinafi logoino o. It inerugwi inagaila'lagen he irat inendawi hundik logouwago. Nen, it ineabumo e zaitun yakfugu mene re muli fanorogo wulipluk amusu hokhorogo keralhu mene fulelhi logouwago, neisena.

²⁵ It ineluk logolik, fano lioksek logouwagaluk, it inaiba kota mondogat, leget pa'leget ambe palek mene ebene re, kwe sou tembaga mene inom, posiemanggen mene inom, hilingik logouwago,” iluk yagatikhe.

²⁶ A'nogo yagatikhesik, afuni Israel mene lambulogo faget mel yagatikhe: ”Hit afuni Israel mene yi, afuni nen hunogo mene faget, ”Nineisena ebe andi aro,” iluk agarek mene andi, nit nineisena Allah hangge ekhe mondok lego. Halok he, at ebe fogeratu kwelek pogoroba wagik, hit lebethisagaluk ohena anggele'ma heakhogo wagik, ikhi logouwago.

²⁷ Allah awe a'ma fethinarek mondok logolik, enggi omame hokho mene andiba lebethisugu mondok logouwago. Aren hit hinelokhoma nen hinaselei mene mugusogo lakfisikhi logolik, Hiren it mondok legetfisani, iluk yagahisikhi logouwago.

²⁸ Hit ap Yakub en tagomangge mene yi, hobuk o fanoma hinabolo'lek logouwageluk, meiso pogoroba nen pelabi wagunem lilengge nen kweang minyeratunem, gandum inom, anggur enggen amusu inom, hokhorogo were'ma logolik, fano lioksek mondok logoino o.

²⁹ Hit afuni Israel mene yi, hinendawimo hinagaiyeti logoino o! Nit nineisena Tuhan nen hit telhinafikhe andi hak, it afuni inunggulenu lombok ekhe telinafi'lego. Nit nineisena Tuhan a'nogo, ebe hit werekwe a'luk, hinaselei mene mabenetfisaluk, hinomame asuagaluk hilinghinafik, ikhi logolik, At ebe re, karok weim yafarek mene hakhogo inom, afuni nen inoasinogo iluk sing labetarek hakhogo inom, asimbik logouwago. Afuni hinaselei mene andi nen, Hinendawit ninabini o, iluk yagahisa wagunem, hiren he, it inebe hineisogen al perelogo fisikhi logogun o,” iluk yagaisasikhe.