ULANGAN 32 - Allah Wene Fano Wene Hupla Inane

Musa nen wuni watikhe wene

¹ An wuni wasigin andi, hat pogot hesanggo holino, hat kweang hesanggo holino.

² An nen yagahisagain mene, meiso hangge pi wesuak, nane igin mene andi lilengge hangge yenggelasuak, meiso henanggikil hangge, engga helenggaba pi wagarek hak, andi hangge hilinglasuak, Meiso kweangma yi mene ti mene, yagokwe yenggelherek hak, andi hak hilinglasuak.

³ Nineisena Tuhan, an nen fogerati lagi mene, nineisena Allah enu hokho andiat, wialik lani.

⁴ Nineisena Tuhan, omamerogo hinebikhit agarek mene, Aren yi mene ti mene, katokhogo nek hilingiterek, mondok higithogo nek hilingiterek, Nineisena Allah obabut he, obokhogo herakninobagaikherek lek, weak ekhe hilingiterek legat, at fano nek hilingiterek, eberogo mene nek hilingiterek.

⁵ A'nogo meneat he, hit hinunggulenu yi mene, at oba lombokhogo, logou hinabit welagep, hinebe at againafuri logou hinobabut he, lek. Hinunggulenu yi mene, weagenek hilingiti lagep mene, kwanirogo hilingiti lagep mene.

⁶ Nineisena Tuhan nen he, fano hilingninaferek mene faget, hiren onggo a'nogo, hilingisu mene hilingiteba? Hit hinobabut kembu hangge, hinendawimo ebesugun elo'lek, hineisena At amuat werek lek nogo a? Aren elalhinafikhe lek nogo a? Hit hinunggulenu re, misigat mene logouwagaluk, wenakhinafikhe lek nogo a?

⁷ Afuni attak welagaukwa mene, inoba ebe'ni, hinendawimo ebe'ni, Hinombalagen yagahisoagaluk, inoba heinok wogisano.

⁸ At Lego Mondok welagarek mene nen, kweang sumburisikhi logolik, afuni inunggulenu lombok, inawi lombok wogisasikhe, Inunggulenu lombok faget, inomameba ferinarek logouwageluk aren againafuri Israel mene, inebe werek higithogo eisewerek fisasikhe.

⁹ A'nogo meneat he, afuni Yakub en tagongge mene re, nineisena Tuhan, onggwarek againafuri, logouwagaluk wenaginafikhe.

¹⁰ O ekhema lagik, ekhema lagik nugunem, inebe woginafikhe, o leimo afuni inareng le'ma, nugunem woginafikhesik, elele waganogo, ferinarek welagarek, Nen at onggwarek mene lugouwageluk, ferinarek logolik, eilen woginarek nikherek.

¹¹ Sue pim eagwi tarogo, nikhi logouwagaluk yanggulhi logolik, ogolabi langhogo, amboloba yirugusogo waluk lagarek hak.

¹² At nineisena Tuhan onggwaregenat againafuri woginarek nikherek, Ap pok mene ekhe nen, neisena ebe andiat iluk, ikherek mene andi nen, woginarek nikharek lek.

¹³ At Allah nenat againafuri, dom-dom andoma sebelek logolik, eisewerek logouwageluk fisasikhe, Inonggwarek ineabu mene, inamburu ninggik, kin enggama tom oba mene, iren amusu ningik, Minyak e zaitun enggen, helep ebene yago mene, iren amusu ningik, ikhi logouwageluk hilingfisasikhe.

¹⁴ Inanggo sapi kambing domba eilak amusu hokhorogo welagik, it inanggo fano mondok welagik, It mene gandum anggur enggen, amusu fano mondok logouwageluk hilingfisasikhe.

¹⁵ Tuhan againafuri mene, inangge hokhorogo hilingfisasikhe, A'nogo meneat he, Allah ebe ninabit iluk, folim hibitukwa andi, It inamburu ninghogo ninggi logolik, inebe hokhondek welagaukwa, Inebe a'nogo logolik, Allah elalninafikhe mene, herakfisaluk wulifukwa, Allah omame hokho logolik, telninafikhe mene herakfisasukwa.

¹⁶ It tugwi kembu fogeratunem, nineisena Tuhan nen, it a'nogo hilingitarek mene andi, mondok abit isasikhe, It weak hilingitukwa andiba, at a'makwe het-perisikhe.

¹⁷ Iren inanggo warogo, Allah mene fisigi'lek, munggwarengge inobabut, weak mene fisasukwa. It afuni inunggulenu hunogoat mene nen he, Nineisena andiat iluk, agarek mene fisasukwa, It inebe nen inonggot mene, andi faget fisasukwa, Inombalagen agaukhogo, hilingiti lagaukwa lek mene, andi faget fisasukwa.

¹⁸ Iren nineisena Allah, ninebe telninaferek mene, at ebe herakfisasukwa, It inelugerinafikhe mene, at oba inonggoret fesukwa.

¹⁹ At nineisena Tuhan nen, a'nogo hilingitunem isasikhesik, a'makwe het-pet iluk, An nagainafuri lego, iluk, inebe herakfisasikhe.

²⁰ Herakfisasikhesik mel isikhe, Ap inunggulenu andi mene, inungguloak helep hangge, noba lomborogo werek lek, andi nen leberisa nabit, It a'nogo hilingiti logombik, elugun oba ninggi'nogo, hilinglasugun iluk neilenggen logogin.

²¹ It inendawinggen we mene oba himbiretfuluk fogeratukwa, Anat fogetnabuem iluk na'mage lagasikhe, it inandugwi kembu andi, na'mage oba fesigi, Andi hak, an irat ferinarek logogin, afuni inunggulenu, hunogo mene woginabumo, nagainafuri ina'mage lagagin, Afuni kembu mene, an nen it woginabumo, nagainafuri nen inabit isogoin.

²² Endu amulok melang-melang, ninggerek hak, it ina'makwe het-perimbik, nilik huli fem a'ma ma'limaat pigin, yago mene mondogat nagain. Tom ebe ninggi logolik, ero inom mondok tamukhogo nagain.

²³ An nen yi mene ti mene weak inailo mene, it inoba lakfei wagu mondok logogin, An nandok mondogat, it inoba pisinget isugu mondok logogin.

²⁴ An nen inailo mene, it inoba fagain andi nen, it inoba aganhan nen, inebe wa'lasugun, wam maro aik anini, weak mene nen palinafi logouwagaluk, kisu afuni inoaterek mene nen, aik palinafi logouwagaluk, it inebe herakfisagain.

²⁵ It inebe endakwe lagunem, weim yafi logolik inoasugun, It inebe oloba were'ma, inali'lip hokhorogo hilinglasugun, Ap alage helime yenggerugwi, inebe mondogat legetfisagain, It omalik ketago mene ogo, it ekhe yamanugwi mene ogo, inebe mondok legetfisagainat.

²⁶ It afuni ekhe nen, inoba ebeti'lek, inonggoret fisambik logouwageluk, an nen it legetfisagain.

²⁷ A'nogo meneat he, Israel inaselei mene, fogerakhogoin nabit anggigi, An nen hilingitu kwelek meneat he, it inendawimo weak ebeti logolik, Allah againafuri andi, niren mabenetfisogo, iluk inendawimo angganogo, iluk Allah nenat isikhe.

²⁸ Afuni inunggulenu, Israel mene andi, inendawinggen mondok lek mene, inendawimo kagalek lek mene.

²⁹ Inendawimo kagalek logoilepma re, yi'nogo hilinglasugun higi, iluk futfeilebo.

³⁰ Ap ebe misigat mene nen, inebe seribu mene, ninggi'nogo nen mugisikhe, Ap inebe pire mene nen he, inebe sepuluh ribu mene, ninggi'nogo mugusogo wulakfisaga, Nineisena Tuhan nen, inebe onggo palogo woginafemo, Allah omame hokho a'nogo nen, inebe herakfisikhemo.

³¹ Afuni Israel mene, inaselei mene nen ikhi logolik, nit fetninarek welagarek mene, it afuni Israel mene, ferinarek welagarek mene, Allah andi hangge re, lek, emberek higit he, lek, iluk it inelu werek.

³² It afuni andi inobabut he, afuni Sodom Gomora, inobabut hangge mondok weak, Anggur enggen ale weak, afuni inoaterek mene, it inobabut andi hangge.

³³ It inagai anggur amusu re, kisu afuni inoaterek mene, andi emberek mondok higit.

³⁴ Nineisena Enupogot, againafuri inaselei mene nen, hilinginafa mene andi, endawimo eberek mondok werek, A'nogo eberek logombik, o higit asigin oba, wene inoba fagain werek.

³⁵ Iren hilingita onggo, wene inoba fembik, inebe inoasigin, Inenggi welagi'lek, inebe alomat lasugun, it weagarinabigin oba, horogat asi waga.

³⁶ Nineisena Enupogoren, againafuri telinabimbik, it afuni at amingmingengge mene, inomame legasimbik were'ma, it hilingisu elo'legen he, Aren eilenggen isambik endawirinabigin.

³⁷ Nineisena Enupogoren againafuri mel yagaisagain Hiren he, afuni nen hunogoat mene faget, Nineisena ebe andiat, iluk agarek mene andi, omame mondok hokho, iluk anggegepsek mene andi, inebe o koma werek, iluk heinok wogisagain.

³⁸ Wam hiren fisegep mene, iren he, sei nengga, I anggur enggen amusu, fisegep mene nenggaat, Iren he, hit hinebe telhinabi wesuwagaluk, hompuk palugun mene, Iren hit hinebe fethinarek, logogun mene hilinglasuak.

³⁹ Yethani, Allah an namunek, Allah amu mene ekhe werek lek, An nen inebe inoatik, inelugerinafik, igirek mene, Inoumo asuagaluk, inoatirek mene, fano asuagaluk hilinginafirek mene, An nen hilingitunem, it ekhe nen an nane ugunem, sebelumo re mondok elo'lek.

⁴⁰ An Allah nali'-nalegat, neluk mondok welagirek mene, An nenggi liakfulugen, nonggwarek nenu hombuk palogo, ikhi lagi.

⁴¹ Nenggarok amulit hokho mene, andi enggat makfembigenat, wene inoba filik lagain, Naselei mene inoasigin, An nebe inabit mene, inebe mondogat he, wene inoba fagain.

⁴² It inamep an nandok ebene, hokhorogo labulasigin, Noasuogoluk agarek mene, nenggarok oba inoasigin, Afuni an naselei mene, tok warek, hele warek, ineluk herakfisigi'lek, mondogat inoasigin, iluk ikhe.

⁴³ Nineisena Enupogot, againafuri inoatarek mene, it inebe mondogat he, wene inoba fagain, Againafuri inunggulmo, it andi inoasigin, Inoasigin andi nenat, inunggulenu lombogen, Allah Enupogot, againafuri andi fogerinabini, Aren it weak hilingitarek mene, sagalogo legetfisikherego, iluk iren wuni wati logouwagaluk yagaisasukwa.

⁴⁴ At Musa, Yosua ap Nun amlogo a'nogo emberek en, wuni andi it Israel mene mondogat yagaisugu kwelek, inesanggo holek welagaukwa.

At Musa nen, ”Yi'nogo hilingisugun, ti'nogo hilingisugun,” iluk elugun oba yagaisasikhe wene

⁴⁵ At Musa nen wene at nineisena Enupogoren komotninafikhe wene afuni inunggulenu Israel mene arat yagaisasikhesik,

⁴⁶ mel yagaisasikhe: ”Wene an nen, Yi'nogo hilingiti logoino, ti'nogo hilingiti logoino, iluk yogondak yagahisigi mene andi mondogat hinendawinggenma feino o. Hit hinagainafuri nen wene nineisena Enupogoren, Yi'nogo hilingiti logoino, ti'nogo hilingiti logoino, iluk yaganisasikhe wene andi, at oba lomborogo logolik inaberali legat hilingiti logouwagen he, yagaisikhi logoino o.

⁴⁷ Wene komotninafikhe wene andi ebe lek ineranen wene mene fuk. Eberogoat hinelugethinafi logogin mene o. Hinenggi welagi'legat, o i Yordan palogo sebeli kugun oba andoma kwimbik, hinebe umur uanhogo logoubagaigen he, aren, Yi'nogo hilingiti logoino, ti'nogo hilingiti logoino, iluk komothinafe wene andi mondogat hologo hilingiti logoino o,” iluk yagaisasikhe.

⁴⁸ A'nogo yagaisasikhemo, andi sambulat, nineisena Enupogoren Musa mel yagatikhe:

⁴⁹ ”O kota Yerikho nen wulakfei wagunem, o Moab mene Abarim tom ebene andoma lano o. Lambik he, tom enu Nebo ba lagambik, o Kanaan An nen afuni inunggulenu Israel mene inenggi welagi'legat wogisagain oba andoma heilenggen yethano o.

⁵⁰ A'nogo yethugunemen, hat hoe Harun tom Hor oba wa'laga a'nogo hak, hat tom Nebo andiba hebe wa'lasigin o.

⁵¹ Hit hemberegen he, o Sin leimo o kota Kades era'lu i Meriba elesi wulibi wagaikheba andoma nen An nane hologo hilingiti'lek, afuni inunggulenu Israel mene ineilhanem An agaukhogo hilingnafigip lek andi.

⁵² A'nogo hilingitigip andi nen, hat hebe o An nen afuni inunggulenu Israel mene wogisagain oba andoma kwigin mondok lego. We, hebe yatma nen heilenggen yethagain andi o,” iluk yagatikhe.