ULANGAN 30 - Allah Wene Fano Wene Hupla Inane

Tuhan Allah nen he, ”Nagainafuri. Hinobabut hebelugun mene fanothinabigin o,” iluk yagaisasikhe wene

¹ At Musa nen a'nogo yagaisasikhesik, wene ekhe mel yagaisasikhe: ”Yogondak he hineisena Allah nen fanothinabuagaluk wenakhogoin a? At he, homan hinobagauwagaluk wenakhogoin a. Hirenat wenakhobagaigen iluk yagahisigi o. An nen, weak yi'nogo hogoin, ti'nogo hogoin, iluk yagahisigi andi, At Tuhan nen hit hinebe pugulogo afuni inunggulenu hunogoat mene inoba lakhinobagaikhemo it inanggele'ma andoma logolik, weak a'nogo mondogat hikhi logolik he, an nen, Ekhe mene wenakhogoin a, athe ekhe mene wenakhogoin a, iluk yagahisigi mene andi hinendawimo ebesugun o.

² Hit hinebe inom hiren tagongge mene inom nineisena Tuhan oba hinambotkwe wesugun halok, Aren wene komorogo, yi'nogo hilingi'no, ti'nogo hilingi'no, iluk yaganisasikhe mene an nen yogondak yagahisigi mene andi, hinendawinggen oba nen futfuluk higithogo hilingiti logogun halok he,

³ nineisena Tuhan Allah nen endawithinabigin o. A'nogo endawithinabimbik, o hinebe pugulogo afuni inunggulenu hunogoat mene inanggele'ma lakhinobagagin oba andoma nen hinambotkwe hinobagai wesimbik he, attagat fano logogun andi hak logouwagaluk hilinghinabigin o.

⁴ Hit hinebe a'nogo pugulogo o yi awi ti awi esanggo-esanggo a'lima mondogat lambik logogun meneat he, nineisena Tuhan nen hinebe andogethinabimbik he, hinambotkwe wokhinarek wesigin o.

⁵ A'nogo wokhinarek wagunem, o nit ninombalak welagaukwaba andoma hit eise asimbik logogun aro. A'nogo eise asimbik were'ma re, Allah nen nit ninombalak endebat hangge fano logouwagaluk hilinginafikhe meneat he, hirenek he, fano mondok logouwagaluk hilinghinafik, ninombalak inebe endebat welagaukwa andi hak he lek. We, hinebe mondok hokhorogo hilinghinafik, igin o.

⁶ A'nogo hilinghinabimbik, hit hinebe inom, hiren tagongge mene inom, hinagap hinenggalimo mene palhinabu hak, hinendawinggen tegelogo hinobagaumo, hinendawinggen inom, inobabut inom misik asimbik, nineisena Tuhan Allah hinendawinggen hundik logolik, hinebe hineluk hinaiba andoma logogun o.

⁷ A'nogo hilinghinabimbik he, homan mondogat andi, afuni hit hinaselei mene hinebe inabit logolik, sebelogo hinobagauwogoluk yi enggin ti enggin hilinghinafi logogun mene andi inoba fagain o.

⁸ A'nogo inoba foumo re, hiren hinambotkwe nineisena Tuhan Allah ane hologo hilingitik, Aren, yi'nogo hilingiti logoino, ti'nogo hilingiti logoino, iluk yaganisikherek mene, an nen yogondak yagahisigi mene yi mondogat higithogo hilingiti logoino o.

⁹ A'nogo hilingitunem, nineisena Tuhan Allah nen he, hit yi mene ti mene mondogat hilingisugun mene andi wurep oba re, hokhorogo sabuthisikhi logogin o. A'nogo sabuthisugu kwelek he, hinagainafuri hokhorogo taginafik, hinanggo hokhorogoat hilinglagik, ugun o. A'nogo wokhisikhi logolik hineabukwe yi mene ti mene awi yasugun mene ebe mondok hokhorogo oba heilarogo wokhisikhi logogin. A'nogo wokhisikhi logolik, At Tuhan endawimo agaiyek oba, hinombalak fano logouwagaluk hilinginafikhe andi hak, hit fano logouwagaluk hilinghinabigin aro.

¹⁰ A'nogo meneat he, hit he, nineisena Tuhan Allah ane hologo hilingiti logolik he, Aren, yi'nogo hilingiti logoino, ti'nogo hilingiti logoino, iluk komotninaferek wene lisu palek werek yi hologo higithogo hilingiti logoino o. A'nogo hilingiti logolik, hinobabut inom, hinendawinggen inom, misigat a'luk At oba hinambotkwe sugulogo waga logoni o.

¹¹ Wene an nen, hit yi'nogo hilingiti logoino, iluk yagahisigi andi re, wene hinago mene yagahisigi lego. Nen yatma were'ma yagahisigi legaro.

¹² Wene andi ebe pogoroba werek legat. Were'ma hiren he, niren wene andi ninesanggo holfuluk higithogo hilingisuageluk sa nen wani lagambik yaganisa pi wesigin iluk heinok wanugun nogo? Mondok elo'lego.

¹³ Wene andi ebe i laut yenggelek elikwe werek legaro. A'nogo were'ma hiren he, niren wene andi ninesanggo holimbik he, hologo higithogo hilingisuagaluk, sa nen wani lambik yaganisa wesigin he iluk heinok wanugun nogo? Legaro.

¹⁴ Wene andi hit hinoba horogat werek andi nen he, hiren a'nogo heinok wanugun mondok elo'lego. We, hit hinendawimo wanhepsik hinelumo re, ebe pikhit hilingiti logogun andi aro.

¹⁵ Arigini'mo re, fano logolik hineluk logogun mene andi wenakhogoin a? Athe, weak logombik wa'lasugun mene andi wenakhogoin a. Hiren o yogondak yibaat hinonggwaregen wenakhani o.

¹⁶ Hit hinenggi welagi'legat nineisena Tuhan Allah nen o andoma wokhinarek kwimbik fanothinafu kwelek, hinebe andoma logolik, fano welagik, hinunggulenu hokho agik, ubagaigen he, nineisena Tuhan Allah ane hologo ebe hinendawinggen hundik logolik, Aren, yi'nogo hilingiti logoino, ti'nogo hilingiti logoino, iluk komorogo yaganisikherek wene andi mondogat hologo higithogo hilingiti logoni o, iluk o yogondak yiat yagahisigi o.

^17-18 A'nogo meneat he, hiren wene andi hinesanggo hologo higithogo hilingisugun hinabit logolik, it afuni ekhe nen, hunogo mene faget, Nineisena ebe yiaro. Halok, ninom fogerati logouwok, iluk lalhinafunem, inoba lombok, iluk herakfisigi'lek inane hologo fogerasugun halok, hit i Yordan palogo wilibimbik, o andoma kwimbik hinenggi hokhorogo welagik, umur uanhogo welagik, igi'le'ma, Allah nen hinebe hinelokhenggen lambukhogo eberogoat hinoasigin o, iluk yogondak fakhogo yagahisigi andi, hinendawimo eberek logoino o.

¹⁹ Yogondak he, hit hineluk logogun mene wenakhogoin a? Wa'lasugun mene wenakhogoin a. Allah nen fanothinabuagaluk wenakhogoin a? Homan hinobagauwagaluk wenakhogoin a. Hit hinonggwaregen wenakhani o. Hiren he, nit yi mene ninamolo iluk ugunem pogot inom, kweang inom ineil werek kwelek ubagaigen he, wolisagain o. Andi nen he hiren, nineluk logogun ninamolo re, ebe yi mene, iluk wenakhani o.

²⁰ Nineisena Tuhan Allah hinendawinggen hundik logolik, At oba lomborogo ane hologo mondok hilingiti logoino o. A'nogo hilingisugun halok he, At Tuhan nen o ninombalak Abraham inom, Ishak inom, Yakub inom, wogisagaluk wene warisasikheba andoma hit hinebe inom, hiren tagongge mene inom, hineluk logolik hinebe umur uanhogo logogun o,” iluk yagaisasikhe.