ULANGAN 3 - Allah Wene Fano Wene Hupla Inane

Afuni Israel mene nen raja Og agun omame leget fesukwa wene

¹ A'nogo yagaisasikhesik ekhe yagaisikhi logolik he, ’Andi nen nit eil ambolkwe o Basan fikhit lagagusi'mo nen hun Og o Basan raja welagaikhe agun andi agoromi sikhe fisogo mene tentara inom monesi waga logolik o kota Edrei horokhogo andoma nen ninoba tok pisinghogo kwelabi wagaukwa.

² Oba nen he Tuhan nen an yaganeti loglik, ’Musa. At andi oba hailo aguno. An nen at andi ebe inom agoromi sikhe fisogo inap inom at aiba inom mondogat hat henggiba wokhesigin enggere, haren hun raja Sihon it Amori mene inoe o Hesybon nen ferinarek welagaikhe agun a'nogo oba hilingfesigin a'nogo hakhogo hilingfeino,’ iluk yaganetikhe.

³ Andiba at nineisena Tuhan Allah nen enek hun raja Og inom againafuri inom mondogat nit ninenggiba wo'nisasikhemo, niren inomame leget fisasugu.

⁴ Aremnogo huli nen he, hun raja Og aiba Basan mene andi nen ferinarek were'ma omanogo o Argob oba andoma mondogat 60 nen sebelhugusik he, kota misik ekhe we herakfisasugu lek, oba nen mondogat abirengge sebelhugu a'nogo.

⁵ O kota mondogat andire leget fak leget helep oba uanhogo wagane'ma, kwe kwi wagaikharek oba ogore kelok omame meneba yagarek welagaikhe. Oba nen he, o kota fena re leget obaluak leget helep oba waganek legengge welagaikhe.

⁶ Niren raja Sihon o Hesybon agun a'nogo nen ferinarek welagaikheba o kota omanogo hilingfesugu hakhogo, o kota andoma mondogat he lilibuk-lalabakhogo hilingfikhi logolik ap inom hemi inom omalik yenggerugwi mene inom mondogat inoatugu.

⁷ It inanggo halhi lagaukwa mene niren mondogat helikhi logolik o andi ogo niren telasugu a'nogo.

⁸ O pin kwisugu sambul a'nogore it raja o Amori mene inebe pire aremnogo mene re, o i Yordan esanggo fena mo yegelogo lagai wagarek fikhit andoma nen i Arnon ima nen hiling-hiling he Tom Hermon huli telasugu.

⁹ (Tom Hermon andi it afuni Sidon mene nen he Siryon ikhi lagukwa, nen it Amori inaben he Senir ikhi lagukwa).

¹⁰ Niren at hun Og raja Basan agun a'nogo nen halinafunem, o kota-kota punukwe wurik mene inom, o Gilead inom, Basan inom andi nen hilingirik-hilingirik o Salka inom, Edrei inomen eil poikwe utara fikhit andoma uanhogo helasugu a'nogo.

¹¹ (Hun raja Og andire it afuni Refaim mene omanogo wurep kobokhogo re hun andi welagaikhe. At ebe wa'lagaikhemo re ebe kwelafu mene peti re helep mene wurep uanhogo 4 meter en, nen elonggo wogologo re 2 meter ilirengge waleti logogun iluk werek meneba waletukwa. At ebe warek kwelafukwa mene andi re yogondak huli nen o Raba it afuni Amon mene inaiba andoma were'ma ineil hili'lagwi.)

I Yordan palogo mo liabi wagarek fikhit it inunggulenu ekhe mene nen kweang o andoma helasukwasik eise agaukwa wene.

¹² A'nogo isikhesik ekhe inom ikhi logolik, ”Kweang a'nogo niren mondogat sebelfakhasugusik, an nen it inunggulenu Ruben mene inom Gad mene inom he, o i Arnon horokhogo o kota Aroer en ambolkwe inom o Tom Giliad en tomkwe fena werek mene inom o kota-kota inomat wogisasigi.

¹³ Nen it inunggulenu Manasye mene minggilogo fena inoba re, hun Og en sebelinarek welagaikhe kwe o Basan inom, o Gilead fenakwe werek mene omanogo inom Argob kwe haningisogo andoma mondogat inom wogisasigi,” iluk yagaisasikhe. (O Basan andire it afuni Refaim inawi sili iluk inelurek welagaikhe.

¹⁴ Hun Yair it inunggulenu Manasye mene nen he, o Argob kwe andoma nen haningisogo o Basan kwe nen lambukhogo re o Gesur inom Maakha inom huli-hulimo andoma mondogat seberogo helasukwa. Helasukwasik o sili endephogo werek mene omanogo at onggwarek enubene nek salhukwa. A'nogo salfesukwa mene andoma o yogondak huli nen o sili andoma Yeir mene inawi sili iluk inelu welagaikharek.)

¹⁵ Ekhe ikhi logolik, ”O Gilead kwe andoma re an nen it hun Makhir againafuri inom inunggulenu Menasye meneba nen wogisasigi.

¹⁶ Nen it inunggulenu Ruben mene inom, Gad mene inom inoba re, an nen o Gilead en hilingi'luk i Arnon nen hilingi'luk tulem kwe andoma wogisasigi. I andi ebe tulem heire'ma re it werek oba nen eil ambol kwe re i Yabok huliba, nen a'ma fikhit he it afuni Amon mene inaiba inom hulirek andi.

¹⁷ Nen it inaiba mo ubuk ikherek fikhit he mondok tinggi-tonggorogo hilingi'mo esanggo re i Yordan huliba nen ambolkwe re i Galilea yenggelek mene andi huliba, nen a'ma fikhit he i hokho mene Laut Mati huli, nen mo liabi wagarek fikhit he Tom Pisga helang alem kwe andoma huli wogisasikhe.

¹⁸ Aremnogo hulire an nen wene melalek yi yagahisasigi: ’Hit hineisena Tuhan Allah nen he hinanggweang i Yordan fena mo lagai wagarek fikhit ari hit hinebe logogun oba faget iluk wokhisasigi. Oba nen he hit mene ap sikhe fisogo mene re inasikhe harogo waluk i Yordan fena fikhit it hinagaila'lak Israel mene leberisouwogeluk inelokhoma kweang andi it tak sebeli laga logogun.

¹⁹ We hit hinogogwi inom, hinagainafuri inom hinanggo hokhorogo inom andi nek he o kota mondogat wokhisasigiba yoma logogun.

²⁰ Hit he hinagaila'lak hinunggulenu misik mene oma leberisaluk lambik o kweang At Tuhan Allah nen it i Yordan palogo mo ubuk ikherek fikhit it wogisikhe mene andoma it hela lambik, At Tuhan nen o yoma hit faget hinobagaikhe hakhogo, Aren ogo it o yoma inebe inailo legengge logouwageluk anggamo nek he, hit ogo kweang hit eise asuageluk wokhisasigiba yoma hinambotkwe sugulogo wesugun.

²¹ Andi nen an nen at Yosua yagati logolik: ’Tuhan Allah nen it raja inebe pire Sihon inom Og inom inaiba yi mene ti mene hilingfisasikhe aple andi re haren mondogat heilenggen hegen. Andi hakhogo it raja inanggweang haren sebelogo fisagain kwe andoma re At Tuhan nenat a'nogo hilingfisikhi logogin.

²² Tuhan Allah nen hat faget omamerogo hilingiti logoginmo re, haren it faget hailorinafi logou fuk.” iluk yagatigi a'nogo, iluk yagaisasikhe.

Musa o Kanaan kwi lagain lek iluk yagatikhe wene

²³ Aremnogo higit he an nen Tuhan oba kino yagati logolik:

²⁴ ”Tuhan neisena, Hat mondok lego welagen mene. Haren an noba weinamet fikhi lagen mene andi re, hobabut mondogat elalin mene hilingitik, hilingisu mondok elo'lek mene hilingitik ikhi lagen mene a'nogo attak-attak inu'nisageluk erorati lagen. O pogoroba mene nen ogo, kweangma mene nen ogo Hat Allah nen elalin hilingisu lek mene hilingiti lagen andi hakhogo ap allah alek mene nen hilingisu mene ekhe werek lek.

²⁵ Tuhan neisena, an o i Yordan palogo fena fikhit kweang mondok heiselek oba, o tom oba mondogat muli-muli hilingi'mo andoma inom, o Libanon tomkwe andoma inom neilenggen halayogen loak anggano, iluk yagatigi a'nogo.

²⁶ A'nogo isigiba nen, hiren hilingitigip oba At Tuhan nen an noba obaharo fikhemo an nen kino isigi mene a'nogo fano anggasikhe lek. Mene athe At Tuhan nen yaganeti logolik, ’Musa, wene andi mene re arat enggere, hane ekhe inom ugun.

²⁷ Hat he i Yordan palogo wulibi lagain lek enggere Tom Pisga punuba lagambik heilenggen mo lagai weri'lago fikhit inom, mo ubuk ikherek fikhit inom yethigik, abel utara fikhit inom, selatan fikhit inom yethigik, imbik furogo yerogo logoin o.

²⁸ O hat heilenggen yethagain oba andoma sebeli kuagen he at Yosua nen woginarek kwi lagain enggere, yi'nogo ti'nogo hilingiti logogin iluk at oba fifurogo yanggul figik, endawinggen hambuget figik, hilingi'no,’ iluk yaganetikhe.

²⁹ A'nogo yaganetemo nit o kota Bet-Peor en elikwe tonggoma andoma welagagu,” iluk yagaisasikhe.