ULANGAN 29 - Allah Wene Fano Wene Hupla Inane

¹ At Tuhan nen Musa inom afuni Israel mene inom yagaisikhi logolik hinane yi'nogo wene warogo feino iluk yagaisasikhemo, it o Moab kweang oba logolik wene watukwa mene ebe yi: Wene warek fesukwa mene andi re wene attak o Tom Sinai ba nen At Tuhan inom it afuni Israel mene inomen watukwa mene a'nogo ambisangma wene watukwa.

At Allah obabut fano nen hilinginafi lagaikhe mene inom, wene warisikhi lagaikhe mene inom, eberek logouwageluk yagaisasikhe wene

² At Musa nen afuni Israel mene omanogo mondogat kaboge'ni iluk yagaisasikhemo, it mondogat kabogetukwama yagaisikhi logolik, ”At hineisena Tuhan nen raja Mesir mene inom, agoromi eabu inom hilingitarek mene inom, o sili abirengge inom, oba hilingfisasikhe mene a'nogo hit hinamu-hinamu nen hineilenggen mondogat hasigibo.

³ Nen At Tuhan nen enggin-fenggin mondok elo'lek mene hilingfisigik, elalin mene hilingitik, hilingisu elo'lek mene hilingitik, nikbolan mene hilingitik, hilingiti laga mene a'nogo hirogo hasigip aro.

⁴ Oba nen he o yogondak huli yaba re hit a'nogo hogoin mene ebe yi'nogo faget hilinglaga iluk futfou re elo'lego.

⁵ Hit hinebe 40 tahun hunugusogo andi At hineisena Tuhan nen o leikwe wokhinarek waga lagaba nen he, hinasu labetu mene inom, hineisok agut kwelafu mene inom tilip igik, weak agik ikhi laga lek.

⁶ Hit hinamburu nunggu mene faget roti le'ma, i anggur agai inom, anggur arik weak omame ambik mene noageluk lek kwelek oba nen At hineisena Tuhan, hiren At eberogo nineisena Tuhan Allah werek a'nogo hinelu asuageluk, hinendawimo anggugu mene higithogo nek wokhisikhi lagaikhe.

⁷ Nen nit o yoma asi wagagusik hilingitunem raja Sihon awi Hesybon agun a'nogo inom, raja Og awi Basan agun a'nogo inomen waga logolik ninom weim yabik wagagumo nen niren mabenet fisasugu.

⁸ A'nogo hilingfisasugusik it inanggweang niren sebelasugusik he, it ap Ruben mene inom, Gad mene inom, it Manasye mene fena minggilogo inom, inoba sumburisasugu.

⁹ Arigini'mo re hiren yi'nogo-ti'nogo hilingitunem ambisangma fano mene nek hilingiti logobagaigen he, wene yi higithogo fifurogo hilingiti logoni o.

¹⁰ Yogondak yi sambul he hit hinebe mondogat hinogogwi kaindek inom, inogogwi ap hokho inap inom, it sikhe fisogo mene inogogwi lego mene inom, ap inom,

¹¹ hemi inom, yenggerugwi magendek mene inom, it afuni pok mene hit hinanggelekwe logolik e wutik, i hinatik hilingitarek mene inom, hineisena Tuhan Allah elokhoma menlasi wagep andi.

¹² At hineisena Tuhan Allah nen hit hinom wene katokhogo wasimbik he hiren wene warek andi hinebe seberogo hinane lambulhik, nen hiren yi'nogo hilingiti logogun iluk wanhik, hilingiti logouwogeluk yoma kabogesi wagep andi.

¹³ Wene wasugun mene andiba re At hineisena Tuhan nen yogondak yi sambul hit An nagainafuri mene iluk menhinobagaumo re Aren it hinombawi Abraham, Ishak, Yakub inoba wene warisikhe hakhogo re hit hineisena Allah At amuat logogin.

¹⁴ Wene warek andi inom, hiren yi'nogo ikhi logogun iluk hinoba fikhe mene andi inom he At Tuhan nen hit hinoba nek yagahisikhe fuk,

¹⁵ oba nen he, yogondak yi sambul ap hinebe lombok faget inom, At hineisena Tuhan Allah eilhanem mendek welagep mene inom, nen it hiren tagomangge mene hobuk hinerumbulkwe logogun mene faget inom ogo yagaisikheat,” iluk yagaisasikhe.

Afuni nen Tuhan faget inomamerogo logogun lek halok wene hinoba aga logogin iluk yagaisasikhe wene

¹⁶ A'nogo yagaisasikhesik ekhe yagaisikhi logolik, ”Hit o Mesir logolik welagagip aple inom, afuni inunggulenu amu mene werekwe laga lagagip mene inom omanogo mondogat he hit hinonggwarek hinelu welagep.

¹⁷ It andoma nen amu mene faget apne wanhi lagaukwa mene helep inom, e inom, perak, emas mene inom mondok hilingisu lek inabit mene omanogo hiren ogo hikhi lagagip aro.

¹⁸ Arigini'mo re hit afuni andoma hinanggele'ma nen ekhe ap mene a, he mene a, it o hulu misik mene he a, it henawi misik mene he a, ya mendek welagep mene misik ekhe nen nit nineisena Tuhan Allah a'nogo herakfuluk afuni inunggulenu amu mene nen amu mene faget allah ap-ap elalfuluk apne wanharek mene andoma inoba apne wanilagep hanogore furogo kagalek logoino. Hiren a'nogo hilingisugun halok he omanggen ale weak mene inom, wa'lagaikharek mene inom wuliferek a'nogo hakhogo asugun o.

¹⁹ Hit hinanggele'ma andoma nen wene a'nogo hilingisu fuk iluk haferogo yagahisikhe mene andi re at ekhe nen holfoluk at oba ebe ambisangma mondok fano nek aga logogin angga fuk, we at onggwarek a'mage lagagin mene nen hilingirik lagain oba nen ogore. At hilingisigin andiba re ap fano meneet, weak meneet hinebe abirengge lek hilingisogo hinobagagin o.

²⁰ At hineisena Tuhan nen he ap ariginik mene re inaweak legetfisagain angga fuk. Athe agamhogore Tuhan a'mage mondok elokhoma asi wesigin mene andi inom, enggin-fenggin inoba fagain iluk buku yiba palek werek mene andi inom, oba asi wesumo re, at ebe Tuhan nen mondok lek hilingisogo fagain.

²¹ At Tuhan nen ap andi legetfagain andiba re it afuni Israel amu mene inelu asuageluk he, wene warek a'nogo homan ugu hilingfisagain iluk buku Tuhan Awene melalek yiba palek mene higithogo hilingisigin.

²² A'nogo hilingisumo hobugen, it hiren tagomangge nen inom, ap pok mene o yatma nen wesimbik logogun mene inom inoba At Tuhan nen enggin-fenggin inom, ou pou engge inom hit logogun oba hilingfei wagunem andoma ineil hikhi logogun.

²³ Hit hineabu re lei pirim ugunem he mayu inom, aspal ebekwe talharek mene a'nogo hangge enu belerang inomen salek logogin. Hinanggweang he awi yasu elo'lekhogo engga inom wilibu elo'lekhogo hilingik logogin. Hit hinawi sili andoma re o kota Sodom inom, Gomora inom, Adma inom, Zeboim inom, At Tuhan obaharoba mondok endu fesikhe a'nogo hakhogo hilingik logogin.

²⁴ A'nogo hilingfoumo re, afuni inunggulenu lombok o kweangma welagaikharek mene nen ikhi logolik, ’Nenahalok At Tuhan nen it inawi sili andoma a'nogo hilingfikhe agi? Nenahalok Aren mondok a'mage lagaikhesik a'nogo inoba fikhe nogo?’ ikhi logogun.

²⁵ A'nogo heinok waganogo ugunem onggore yi'nogo ikhi logogun, ’Iren At Tuhan Allah it inombawi ineisena o Mesir en woginarek wulibi wagaikhe huli nen, wene warisasikhe mene a'nogo higithogo hilingita le'ma o.

²⁶ Wene a'nogo taganet fagasik iren ebe inonggot logoligat he amu mene faget allah ap-ap hilingfagasik obaget hilingiti logolik, Tuhan nen apne wanhi logou fuk ikhe mene a'nogo apne wanhi lagaikhama.

²⁷ Andiba re, At Tuhan oba haro againafuri inoba fikhesik he enggin-fenggin buku yiba palek werek mene a'nogo it inoba lakfei waga andi.

²⁸ Tuhan a'mage mondok hokho mene inoba fikhe mene a'nogo wilifi logolik, anini mondok hokho meneba re it afuni Israel mene omanogo inanggweangma nen henogo o kweang amu mene inonggot meneba huginabi lagama werek andoma o,’ ikhi logogun.

²⁹ Wene fena At nineisena Tuhan Allah nen hinagaisogo fikhe mene werek oba nen he, awene melalek nit ninoba weinamhogo nit inom, niren tagomangge mene inom faget yaganisikhemo niren hologo hundik-handik hilingiti logogun o,” Iiuk yagaisasikhe.