ULANGAN 28 - Allah Wene Fano Wene Hupla Inane

Afuni Allah ane hologo hilingitarek mene inoba fanot hinobagakhi logogin iluk yagaisasikhe wene

¹ A'nogo yagaisasikhesik he ekhe yagaisikhi logolik, ”Hiren hineisena Tuhan Allah ane hologo hilingiti logolik, an nen wene melalek yogondak ya yagaisikhi lagi mene yi tiphogo nek hilingiti logogun halok he, At hineisena Tuhan Allah nen it afuni inunggulenu amu mene o kweangma welagaikharek mene oma sebelek hak werek kwelek, hirenek he hinenu werek logouwageluk legeisogo hinobagagin.

² Hiren hineisena Tuhan Allah oba ane hologo nek hilingiti logogun halok he Aren yi'nogo fanothinobagakhi logogin:

³ Hinawi kota-kota inom, hineabukwe inom fanothinobagakhi logogin.

⁴ Hit hinoba fanothinobagagunem hinagainafuri hokhorogo hilinglagik, hinanggweang oba nen enggen itu mene mondok sik-pik igik, hinanggo kambing, domba uluk pambialhogo hilinglagik ikhi logogin.

⁵ Gandum enggen palhu mene inom, enggen palek mene andiba nen nunggu mene faget munenogo hilingik mene inom andomaba fanothinobagakhi logogin enek.

⁶ Hiren ekhe mene ekhe mene hilingiti logogun mene andoma fano nek aga logogin.

⁷ It afuni hinaselei mene nen hinoasi kwi wagu halok he At hineisena Tuhan nen hit hinaselei mene andi mabenet fisikhi logogin. Iren higit-hagathogo erarogo fuluk tok kwelabi waga logogun oba nen he heise mondok telfol ikhi logogun.

⁸ Hineisena Tuhan Allah nen hiren ekhe mene-ekhe mene hilingitunem fanothinobagagik, hinangge gandum enggen palhu mene re su ambe peterogo kwalogo hinobagagik, ikhi logogin. O kweang Aren wokhisikheba andoma were'ma hinoba fanothinobagakhi logogin.

⁹ Hiren At hineisena Tuhan Allah ane hologo hilingiti logolik At awene melalek a'nogo tiphogo nek hilingiti logogun halok he, Aren a'nogo hilinghinabigin iluk abok yagahisasikhe higithogo hit hinebe At onggwarek againafuri hilinghinobagagin.

¹⁰ A'nogo hilinghinobagaumo it afuni inunggulenu amu mene kweangma yoma werek mene nen, it yi re Tuhan againafuri mene werek iluk ineil alonghogo kwelakhisikhi logogun.

¹¹ O kweang hit wokhisageluk logolik it hinombawi inoba a'nogo wogisagain iluk abok yagaisasikheba omanogo nen hinagainafuri hokhorogo wokhisigik, hinanggo hokhorogo hilinghinobagagik hinanggweang oba nen enggen igisogo sik pililirogo wokhisigik hilinghinobagakhi logogin o.

¹² At hineisena Tuhan Allah pogoroba meiso yenggelogo fisogo welagarek mene omanogo liba pelakhisa waga logogin. A'nogo hilingiti logolik hiren ekhe mene ekhe mene hilingitu mene omanogoba fanothinobagagunem hiren ap inunggulenu amu meneba hinangge palegengge hak hobuk obali'mo wo'nisobagaigen iluk wogisikhi logogun oba nen he hiren it inoba a'nogo mene ekhe kino ikhi logogun lek.

¹³ Hit hineisena Tuhan Allah nen he it ap inogogwi it inunggulenu amu mene inanggele'ma ferinarek logouwageluk menhinobagaumo hit he it inagoromi mene logogun lek. Hiren ambi an nen Tuhan awene yi'nogo hilingi'no ti'nogo hilingi'no iluk yagahisikhi lagi mene andi hologo higithogo hilingiti logolik tiphogo nek hilingiti logogun halok he, hit hinoba yi mene ti mene weregenek logolik hinambot fikhit ekhe higilogo laga logogun lek.

¹⁴ A'nogo meneat he hiren wene an nen hilingiti logouwageluk yagahisigi mene andi higithogo hilingiti'lek ap amu mene nen hilingitarek higithogo hilingisugun lek. Hiren amu mene faget allah ap-ap hilingfuluk apne wanhu meneba apne wanhik, obaget hilingitik ikhi logogun lek,” iluk yagaisasikhe.

Afuni Allah ane sagalhunem homan inoba fikherek wene

¹⁵ A'nogo yagaisasikhesik ekhe yagaisikhi logolik, ”Ariginik oba nen he, hiren hineisena Tuhan Allah ane hologo hilingiti'legengge, awene melalek inom, yi'nogo ti'nogo hilingi'no iluk yagahisikhe mene a'nogo inom tiphogo hilingiti'legengge hilingiti logogun halok he homan ugu mene hinoba asi waga logogin:

¹⁶ Hit hinaiba kota-kota inom, hineabukwe inom homan ugu logogin.

¹⁷ Hiren gandum enggen palhu mene inom, enggen palhu mene munenogo werago mene inom homan ugu logogin.

¹⁸ Hit hinebe homan hinoba were'ma re, hinomalik inebe endebengge taginafik, hineabukwe enggen endebat itik, hinanggo sapi, domba inom we endebengge nek hilingik logogin.

¹⁹ Hiren ekhe mene ekhe mene hilingiti logogun mene andoma re homan ugu logouwak.

²⁰ Hiren hinanini weak logolik Tuhan hinabiret fuluk logogun halok, Aren he hiren yi'nogo ti'nogo hilingiti logogun meneba enggin-fenggin hikhi logouwageluk lakfei wagik, hinoba obabut nonghongsek mene lakfei wagik, hit hinanggele'ma andoma nalek-falek hinabi wagik umo re, linggene misik oba nek hit hinebe mondogat misigam legarik logoin o.

²¹ Ou ero ekheba nen he ekhe ero-erongge hinoba asi wagunem he, hilingirik-hilingirik ambisangma nen he afuni hit mene misik ekhe o kweang yomaba logogun lego.

²² At hineisena Tuhan nen he hit hinoba enggin mene fikhi logolik ou sep hun-hun lagu mene lakfei wagik, tuk-tugengge mene lakfei wagik, sogoi aganhan mene lakfei wagik, igin o. Aren enek hibi fululung hibi lagaikherek mene lakfei wagik, sogoi mondogat aganhan mene lakfei wagik ugunem, hiren enggen palugun iluk hilingik mene mondogat weak arik laga logogin o.

²³ O meiso mondogat pi wagi'lek werek kwelek kweang mondogat haro asimbik posiemanggen hak kelokhogo hilinglasigin.

²⁴ At hineisena Tuhan nen he meiso i mene pelabi wesigin lek oba nen he, meiso elokhe wulage hak mene inom, ilingage ial hak mene inom, pelabi wesumo hit mondogat wa'larik logoin o.

²⁵ Hiren At hineisena Tuhan Allah ane hologo hilingiti lagep lek halok he hit hinaselei mene nen hinomame leget hinobagakhi logogun. Nen hiren fanorogo hinebe eratfuluk weim yabi laga logogun oba nen wulifi logolik he hesangge nalek-falek wulifi logogun. Hit a'nogo hilingitunem weak mene hinoba nek aga logogin mene andi faget, it afuni inunggulenu amu mene nen hit hinoba inamel-melhogo nek kwelakhisikhi logogun.

²⁶ Hit hinebe wa'lagunem warek andoma re sue inom, yi mene ti mene aik weregengge nen inom, nunggu mene aga logoginmo re, ap ekhe nen silogo wulakfisa re elo'lek aga logogin.

²⁷ At Tuhan nen afuni Mesir mene inoba hilingfesikhe higithogo hit hinoba ogore pot enggin mene hilinghinobagagin aro. A'nogo hilinghinobagaumo hinagap oba purak inom, kilip-kilibengge mene inom, agal-agalengge mene inom obat mondok lek mene hinoba asigin.

²⁸ At hineisena Tuhan nen hit ap wenenebo mene hilinghinobagagik, hineil puk mene hilinghinobagagik, afuni inendawinggen nonghongsek mene hilinghinobagagik igin o.

²⁹ A'nogo hilinghinobagaumo lingge enggen tulem hilingik kwelek he ap ineil humunik mene nen yafak-tafak hilingitarek hak hilingiti logogun, oba nen he kwe herasugun mondok lek. Hiren walhogoin iluk hilingisugun oba nen he nonghong enek ikhi logogin. A'nogo nek hilinglagunem afuni nen hit sebelenek hinobagakhi logolik hinangge telugunem ap amu mene ekhe nen lebethinafi logogun mondok lek.

³⁰ Nen hiren hineisena Tuhan Allah ane hologo hilingiti logogun lek halok he ero ariginik mene andi hinoba asi wesigin. Hiren hinagagwi helogoin iluk hinom lombolek werek kwelek it ekhe nen lisogo helikhi logogun. Hit hinaiba wuti logogun oba nen he hit hinonggwarek hinebe elonggoma logogun legat. Hiren e anggur awi yasugun oba nen he enggen hit ekhe nogoin legat.

³¹ Hit hinanggo sapi hineilhanem warikhi logogun oba nen he, senggelhu mene andi hit ekhe ninggi logogun lek. Hit hinonggwarek hineil werek kwelek hinanggo keledai lisogo helaluk laluk hobuk wokhisa waga logogun lek. Hinanggo domba mondogat it hinaselei mene wogisugunem ap ekhe nen lebethisogoin legat.

³² Hit hinonggwarek hinelokhoma nen hinagainafuri ap inamingmingengge hilinginabuageluk ap pok meneba wogisikhi logogun. Lingge hundik-handik hineil firogo hineagwi heraginafi logogun oba nen he, inambotkwe fisa wesugun le'mare, heraginabu elo'legat aga logogin.

³³ Afuni inunggulenu pok mene nen hineabu hinomame lekhogo wokfuluk enggen palhu mene omanogo helugunem he, hiren fena ekhe heligi logogun lek we hundik-handik ina'mage nen inomameba sebelhinarek mondok logogun.

³⁴ A'nogo nek hilingitunem hikhi logolik hit hinafe moruerogo lugu-lugwi mene hak aga logogun.

³⁵ At hineisena Tuhan Allah nen hineisok oba purak ou mondok weak mene, weak-weak agambut asu lek mene hilinghinobagaumo, hineisok oba nen pikhit hinunggul oba andi re mondogat pot enek selelemsek logogin.

³⁶ Hit inom hinoe raja inom At Tuhan nen o kweang hit hinonggotma, hit hinombawi nen ogo inonggotma wokhinarek lagain o. Hit andoma logolik he hiren tugwi kembu e mene helep mene alik waganogo hilingfuluk fogerati logogun.

³⁷ O kweang At hineisena Tuhan nen nalek-falek hinobagagin oba andoma nen he afuni nen inamel-melhogo ineil kumuthisikhi logolik he pilibethinafik, endo yakhinafik, hilinghinafi logogun.

³⁸ Hiren enggen awi hokhorogo folhi logogun oba nen he pulue nen nunggunem we endebengge nek enggen itunem palhi logogun.

³⁹ Nen hiren anggur yabumo e anggur awi yakfuluk puguneti logogun oba nen he kon nen e anggur yago omanogo nunggunem he, enggen ugu ekhe taganhi logogun mondok lek, nen amusu hinago ekhe ninggi logogun legat.

⁴⁰ Hit hinawi hinanggweang oba andoma e zaitun hokhorogo wilifi logogin oba nen he, enggen mondogat lologo pugunem amusu ekhe helikhi logogun lek.

⁴¹ Hiren hinagainafuri ap inom helime inom hokhorogo taginafi logogun oba nen he, weim yabik laga logolik weim ambisangma a'luk helaluk lagunem he, hit hinagainafuri ekhe logogun lek.

⁴² E wilibik mene mondogat inom yi mene ti mene yago mene inom tagwi hangge mene nen mondogat ninggi logogin.

⁴³ Ap pok mene hit hinailokwe logogun mene omanogo it inomame aga logolik hit hinomame lek aga logogun.

⁴⁴ It inauang he hit hinoba hobuk nekhengge wo'nisobagaigen iluk wokhisikhi logogun. Oba nen he, hit hinangge le'ma re hiren nit wo'nisobagaigen iluk ugunem, hiren wogisa re elo'lek aga logogin. A'nogo hilinglagunem iren hit sebelhinarek logogun.

⁴⁵ Hiren At hineisena Tuhan Allah oba horokhogo welagi'lek, awene melalek yagahisikhe mene a'nogo furogo hilingiti'lek hilingiti logogun halok he, yi enggin ti enggin andi hinoba nek asi waga logolik lalhinafu werek kwelegenek hinebe mondok felelenghogo legasugun.

⁴⁶ Enggin-fenggin hinoba asi wesigin andi re At Tuhan nen hit inom hiren tagomangge mene inom hinoba wene mondok-mondok fagain mene a'nogo enek hoageluk hilingiti logogin.

⁴⁷ Hit hineisena Tuhan Allah nen yi mene ti meneba mondogat fanothinobagaikheba nen he, hiren At obaget hinendawinggen hinagaiyek oba inom, hinendawinggen sakhorek oba inom eberogo meneba hilingiti legep lek.

⁴⁸ Andiba re, hiren it ap hinaselei mene At hineisena Tuhan nen hit hinom weim yabuageluk lakfisa wesigin mene andoma inobaget hilingiti logogun. Hit hinebe hinamburu ouwak agik, hinagai nele agik, hinalfulukwa kogouk welagik, yi mene ti mene mondogat hinelagaik logolik hinenggi lek welagik hilingiti logolik, At hineisena Tuhan nen a'mageba fethinarek werek kwelek enek hit hinebe mondogat wa'lasugun.

⁴⁹ Afuni inunggulenu hiren ogo inane futfou elo'lek mene At hineisena Tuhan nen o kweang wurep fikhit andoma nen hit hinom weim yabuageluk lakfisa wesigin, waga logolik sue kuri nen hilingiterek hak sebelhinabi wesugun.

⁵⁰ It andi re inobabut mondok weak logolik he ap yaman mene iluk ogo, yenggerugwi magendek mene iluk ogo, inendawit inabugun lek.

⁵¹ It a'nogo waga logolik, hiren takhikhi lagep mene inom, hinanggweang oba nen enggen palikhi legep mene inom, legetfikhi logolik hit faget iluk gandum ogo, anggur agai ogo, zaitun amusu ogo, sapi, kambing, domba ogo, mondogat helamo re hit nele nen mondogat wa'lasugun o.

⁵² O kota mondogat At hineisena Tuhan Allah nen wokhisikheba andoma hiren mondogat pin kwi wesumo re leget uwan-awan aleget mondok omamerogo wagane'ma hiren hinendawimo hambukhogo welagep mene andoma mondok meisalogo sagauk ikhi logogin.

⁵³ It hinaselei mene oan o kota hiren omanogo walingisi wagu kwelek he, hit hinamburu ouwagen nelerogo logolik hinomalik At hineisena Tuhan Allah nen we onggolek wokhisikhe mene omanogo hinonggwaregen ninggi logogun.

^54-55 A'nogo hilingitunem ap inogogwi inenu lego logolik inobabut mondok sakhorek fano inap oba nen ogore, aben o laberinafu kwelek andem he inendawinggen eaga'luk nunggungge amu mene ogo ekhe werek legen he, onggwarek omalik ninggi logogin. At a'nogo ninggi logolik he aren onggwarek are ba nen ogo, agwe endawi hundik oba nen ogo, at omalik fena ineluk logogun mene ogo, endebengge ekhe iluk wogisikhi logogin mondok lek.

^56-57 Hemi inogogwi inenu lego logolik inobabut mondok sakhorek fani-fano he enggi werek logolik eisok oba kweanggwe iluk ogo ekhe lagarek lek mene ogore a'nogo nek hilingisugun. It hinaselei mene o kota walingisi kwi wesumo re at he andi nunggu mene legen endawinggen mondok legasigin, andiba aren linglongengge onggwarek omalik, oan ket takhagain mene ninggi logogin. A'nogo ninggi logolik at eagwi mene ogo, nen onggwarek agun endawi hundik oba nen ogo, we endebengge iluk ogo ekhe wogisagain lek.

⁵⁸ Hiren At hineisena Tuhan Allah ane melalek buku yiba palek werek mene tiphogo hologo hilingiti'legengge hilingitik, At hineisena Tuhan Allah mondok lego were'ma inailotarek agun a'nogo agaugwerati'lek hilingitik, hilingiti logogun halok he,

⁵⁹ At hineisena Tuhan nen he, hit inom hiren tagomangge meneba inom ou inoba fano asu lek mene inom, ou age-age mene inom, ina'maforok mondok palasu elo'lek mene inom lakfei wesigin.

⁶⁰ Ou mondok hinamelmel mene hit o Mesir en hineil hasigip mene omanogo mene hinoba asi wesimbik he, hinoba nen waganogo laga logogin mondok lek.

⁶¹ At hineisena Tuhan nenat ou enggin mene obabut yinik hunik buku Tuhan awene melalek palek mene yiba re enu werek lek mene lakfei wesumo hit hinebe mondogat legarik logoin.

⁶² Hiren hineisena Tuhan Allah oba ane hologo hilingiti legep le'ma re, hinebe hokho pokhorogo hesagalenggen pogoroba welagarek hakhogo asugun oba nen he, hit hinanggele'ma nen we hinebe endebengge nek hineluk logogun.

⁶³ At hineisena Tuhan nen agaiyek oba hit hinangge yi mene ti mene werek enek logouwageluk wokhisigik, hinebe ekhe inom hokhot hinobagagik hilingiterek hak, Arenat agaiyek oba hit hinebe hinoatik, leget hinobagagik igin. O kweang horok yogondak ya kwilambik logogun oba andi nen henogo wulak hinobagagin.

⁶⁴ At hineisena Tuhan nen hit hinebe mondogat o yi awi ti awi kweangma yoma afuni inunggulenu amu mene inanggelekwe nalek-falek hisogoin o. A'nogo hilinghinobagaumo re andoma nen amu mene faget allah ap-ap hilingfuluk kembu e inom helep inom oba elalek mene, it hinombawi nen ogo mondok inonggot mene, nen hiren ogo hinonggorat mene andomaba apne wanhi logogun.

⁶⁵ Afuni inunggulenu amu mene inanggele'ma andoma nen he hit hinoba hambukhogo welagaikharek mene ekhe hilingi, logogin lek, nen hiren obalik yare nit ninonggwarek en mene ugun oba ekhe logogin legat. At hineisena Tuhan nen he hit hinoba liliap iluk hinendawimo weakhogo, hinendawi firogo, hiren hinendawimo eberek engge ekhe le'ma logouwageluk hilinghinobagagin.

⁶⁶ Hit hinoba enggin-fenggin mene nek asi wagunem, hubanggo inom linggene inom wa'lagu aple faget hinailo nen hinali'lip eti logogun.

⁶⁷ Hiren amu mene ekhe hikhi logolik mondok hinailo nen he hinendawimo set pongeti logogun. A'nogo hilingiti logolik o hubanggore weak-weak wei inik agwi igik, nen o linggene logolik he weak-weak o huba'nik agwi igik hilingitu mondok logogun.

⁶⁸ At hineisena Tuhan nen hit O Mesir en wokhinarek wulibi wagaikhesik, Aren ikhi logolik, o andoma nekhengge sugulogo kapal oba lakhinobagagin o. Andoma re, hit hinonggwaregen hinomamerogo afuni inamingmingengge logogun nen ninebe onggo paloageluk it hinaselei mene inoba onggo huniti logogun oba nen he, ap misigen iluk ogo ekhe onggo palu re elo'lek hilingik logogin o,” iluk yagaisasikhe.