ULANGAN 27 - Allah Wene Fano Wene Hupla Inane

Allah wene melalek helep oba pal fesikhe mene a'nogo

¹ A'nogo yagaisasikhesik At Musa inom it afuni Israel mene inogogwi kaindek ferinarek mene omanogo inom he it afuni inunggulenu andoma mene inoba yi'nogo yagaisasukwa: ”Wene melalek an nen yogondak yagahisigi mene andi re hiren mondok hologo nek hilingiti logoino.

² Hit hinebe yogondak yi sambul i Yordan palogo o kweang At hineisena Tuhan Allah nen wokhisagain oba omanogo kwi lambik hiren helep miren mene hak menfuluk enegengge amusu kut meneba warogo feino.

³ A'nogo watfuluk helep andem ebene re wene melalek yi ane misik-misik palfeino. Hit ambi o kweang At hineisena Tuhan Allah nen wokhisagain oba yi mene ti mene mondok werek enek were'ma, kweang muli mondok fanoma andoma kwi lambik halok he,

⁴ hit hinebe mondogat i Yordan fena fikhit enek asi lambik he hit o Tom Ebal oba andoma lano. Andoma lambik he, an nen yogondak yagahisigi mene yi higithogo andoma helep menfembik he enegengge amusu watfeino.

⁵ Nekhema andoma At hineisena Tuhan Allah faget hiren helep aben ogo posiemanggen oba watarek mondok lek meneba Tuhan obaget nolhuba obuluk ekhe wu'no.

⁶ At hineisena Tuhan Allah faget nolhuba obalik andi re helep amu mene faget ekhe wanharek mondok lek mene we anuet meneba nek hilingiti logogun, hilingfuluk wurik mene amboloba andi re yi mene ti mene Tuhan obaget nolhungge mondogat nolino.

⁷ Andi nolhi logolik he wam Tuhan nen fanot ninobagauwageluk yagati logolik warogo nolino, nolfuluk andoma nen hineisena Tuhan Allah eilhanem ninggi logolik hinagaiyegeti logoino.

⁸ Helep enegengge amusu watfogoin mene andoma bene re hiren Allah wene melalek werek mene andem higit-higit eil mondok weinamhogo fanorogo palfeino,” iluk yagaisasikhe.

⁹ A'nogo yagaisasikhesik at Musa nen nekhengge it ap imam hilingitarek mene Lewi inap omanogo inom logolik it afuni Israel mene inoba yagaisikhi logolik, ”Nori, nerugwi inom hiren futfuluk fanorogo hinesanggo holini o! Yogondak yi sambul he hit mondogat hineisena Tuhan Allah againafuri agebo.

¹⁰ A'nogo meneat he hiren hineisena Tuhan ane hologo nek hilingiti logolik, an nen yi'nogo ti nogo hilingiti logoino iluk yogondak yagahisigi mene andi mondogat higithogo hilingiti logoino,” iluk yagaisasikhe.

Afuni hologo hilingiti logogun lek mene inoba homan fisagain wene

¹¹ A'nogo yagaisasikhesik at Musa nen it afuni Israel mene omanogo yagaisikhi logolik,

¹² ”Hit i Yordan mondogat palogo wulibi lambik afuni yi inaiba fanotfisikhi logolik he, it ap Simeon inap inom, Lewi, Yehuda, Isaskhar inap inom, Yusuf Benyamin inap inom, inebe seberogo Tom Gerizim oba mendek logolik inane ugun o.

¹³ Nen inane homan fogoin sambul he it ap Ruben, Gad inap inom, Asyer, Zebulon inap inom, Dan, Naftali inap inom, inebe seberogo Tom Ebal ungguloba mendek werek kwelek inane ugun.

¹⁴ A'nogo mendek werek kwelek he it ap Lewi inaben he inane a'ma palek aple yire yi'nogo ugu kwelek he, it afuni Israel mene nen onggo, ’Amin!’ ugu mene andi re nit ninaneba re: Ebe asuak u hak. Ikhi logogun.

¹⁵ Ap Lewi inaben inane hokhoba ikhi logolik: ’Aben inanggembu e meneba inom, helep meneba inom logam oak meneba inom, wutfuluk hinak-hinak apne wanharek mene andoma; At Tuhan he tugwi kembu fogeratu mene andi faget he a'mage lagali lagoma re, ap andi homan ugu logouwak!’ ugunem. It afuni mondogaren: ’Amin!’ ikhi logogun.

¹⁶ ’Ap ekhe ineisugwi inagaisawi legeisogo fisigi'lek sebelfisili'lagwi mene andi re homan ugu logouwak,’ ugunem. ’Amin!’ ikhi logogun.

¹⁷ ’Ap ekhe nen agaila'lak ekhe inanggweang huli-huli werek mene higilik lagu halok he ap andi homan ugu logouwak,’ ugunem. ’Amin!’ ikhi logogun.

¹⁸ ’Afuni ineil puk mene weaget fisagarek mene andoma homan ugu logouwak,’ ugunem. ’Amin!’ ikhi logogun.

¹⁹ ’Ap pok mene inom, yenggerugwi suarek mene inom, hemi sogwe inom inangge telagarek mene andi re homan ugu logouwak,’ ugunem. ’Amin!’ ikhi logogun.

²⁰ ’Ap ekhe nen eisena agwe inom orouwe laguba eisena enu sebelogo fagainmo, ap andi homan ugu logouwak,’ ugunem. ’Amin!’ ikhi logogun.

²¹ ’Ap ekhe wam mene yi mene ti mene inom sebetarek mene andi re homan ugu logouwak,’ igunem. ’Amin!’ ikhi logogun.

²² ’Ap ekhe nen erei onggwarek amep mene inom weak hilingita halok ogo, ineisena misik inagaisa misik mene nen pabi lagaikha halok ogo ap andi homan ugu logouwak,’ ugunem. ’Amin!’ ikhi logogun.

²³ ’Ap ekhe nen he eyamalhe inom pabi lagaikha halok he ap andi haman ugu logouwak,’ ugunem. ’Amin!’ ikhi logogun.

²⁴ ’Ap ekhe nen ap linglongengge pinggi watu halok he ap andi homan ugu logouwak,’ ugunem. ’Amin!’ ikhi logogun.

²⁵ ’Ap ekhe weak hilingitikhe lek oba nen, it ekhe nen, afuni alek mene inoba ap andi wa'ne'no, iluk uang oba onggo paligin mene andi re homan ugu logouwak,’ ugunem. ’Amin!’ ikhi logogun.

²⁶ ’Ap ekhe nen obabut hilingituba Wene melalek inom yi'nogo ti'nogo hilingi'no iluk Allah nen ikherek mene a'nogo inom hilingite lek halok he homan ugu logouwak,’ ugunem. ’Amin!’ Ikhi logogun iluk yagaisasikhe.