ULANGAN 26 - Allah Wene Fano Wene Hupla Inane

Yi mene ti mene yakfuluk, ebe attak mene Allah faget fisikhi logouwagaluk yagaisasikhe wene

¹ At Musa nen a'nogo yagaisasikhesik wene ekhe mel yagaisasikhe: ”Hit hinebe nineisena Tuhan Allah nen o wokhisasikheba andoma arat lambik logolik he, yi'nogo hilingiti logoino:

² Sumburu, yi mene ti mene, awi yasugun mene mondogat ebe attak-attak tatik, enggen palhik ugun mene andi re, andogorogo suba kwalogo fuluk, o nineisena Tuhan Allah enu fogerati logogun oba onggwaregen wenagaisogo fakhagain oba andoma waluk laga logoino.

³ A'nogo waluk lagep halok he, hinebe lombogen ap Allah eisewerek mene o andi sambul yabu Allah faget hilingitunem inoba laluk he, yi'nogo yagaisikhi logoino: Nit ninebe nineisena Tuhan Allah nen o nit wo'nisagain mene faget, hombuk palogo it ap nit ninombalak wene warisasikheba a'nogo arat kwi wagi o, iluk Allah yagati lagi, iluk yagaisikhi logoino.

⁴ A'nogo yagaisugunem, it ap Allah eiseweregen he, hiren Allah faget fogoin mene su kwalek andi, hit hinenggiba nen wanimbik he, yi mene ti mene nineisena Tuhan Allah noleti logogun oba elokhoma andoma fikhi logouwago.

⁵ A'nogo fugunem he, hit hinebe lombogen, nineisena Tuhan Allah eilhanem yi'nogo yagati logogun: Allah Henupogot mene neisena. An nomba ebe o Aram mene yi, at awi o ekhema lagik-ekhema lagik hilingirik nikhi lagaikhesik, o Mesir fano logogun iluk againafuri woginarek lagaikhe andi. A'nogo lagaikhe andi, inebe we endebat lagaukwa meneat he, hobuk inunggulenu hokho agik, inomame hokho agik, inebe sik-pik igik, isukwa andi.

⁶ A'nogo hilinglagaukwama, hobuk afuni o Mesir mene nen nit weak mondok hilingninafi logolik, ninebe inamingmingengge higit hilingninobagaluk, yabu mondok hokhorogo hilingiti logouwagaluk inane ning-nanghogo yaganisikhi lagaukwa.

⁷ A'nogo hilingninafunem, ninombalak ineisena Tuhan Allah nen telninabinogen iluk ninane hokhorogo hayonggo fesugu andi. A'nogo yagahetugumo, haren ninane hesanggo holhigindik, yi enggin ti enggin hilingninafunem heilenggen nisigik, set kwil-kwalhogo hilingninafunem nisigik, inendawimo seramet ninobagaluk sebelogo ninobagauwogoluk ugunem nisigik, isigin andi.

⁸ A'nogo nisasigindik, homame mondok hokho mene a'nogoba o Mesir en telogo wo'ninarek wulibi wagagin andi. A'nogo wulibi wagagindik, afuni futfouwagaluk elalin hilingsu lek mene hilingitik, enegengge inailo asu hak mene hilingitik, ninaselei mene inailo asuageluk hilingirik wagagin andi.

⁹ A'nogo waga lagagindik he, o yoma wo'ninarek wagagindik, kweang muli fano yi mene ti mene mondok hokhorogo were'ma yoma wo'nisegen.

¹⁰ Andi nen he, hat Henupogot mene neisena. Kweang haren wo'nisegen mene a'nogoba nen yi mene ti mene enggen attak palhik, tatik, igi mene waluk wagi yoma o, neisena, iluk ikhi logoino. A'nogo ilugen, su kwalek andi nineisena Tuhan Allah eilhanem fuluk he, at fogerati logoino o.

¹¹ Fogerati logolik he, nineisena Tuhan Allah nen yi mene ti mene hit hinebe inom, hinagainafuri inom, ninggi logouwagaluk wokhisikhi logogin mene andi faget, at hai wati logoino o. A'nogo hilingitunem afuni Lewi mene inom, ap pok mene hit hinanggelekwe welagaikharek mene inom, yagaisikhi logolik, Ninomen yi'nogo hilingiti logouwok, iluk inendawimo kagalhi logoino.

¹² Tahun hit hinenggi wenati lagep mene a'nogo wenati logolik, tahun henaganek meneba, yi mene ti mene enggen palhik, tatik, ugun mene andi hinenggi wenagaisogo 10 ba asi laga halok, 9 nen hit aga logolik, ekhe misik 10 mene andi re nineisena Tuhan faget fisaluk he, ap Allah eisewerek mene inunggulenu Lewi mene inom, ap pok mene inom, yenggerugwi suarek mene inom, hemi sogwe mene inom, wogisikhi logoino. A'nogo wogisikhi logogun halok, hit hinawi kota logogun oba andoma mondogat it andi nen, Ninamburu yi mene ninamolo e, iluk anggogoin mene andi re, elogat helambik ninggi logogun o. A'nogo arat hilingitep halok he,

¹³ hinebe lombogen nineisena Tuhan yi'nogo yagati logoino: Neisena Henupogoren, Yi'nogo hilingiti logoino, ti'nogo hilingiti logoino, iluk komotninafigin hagat, an nen yi mene ti mene enggen palhik, ebe tatik, igi mene, nenggi wenagaisogo 10 asi laga mene, 9 an aga logolik, ekhe misik hat faget fagagin mene andi, endebat halok ekhe naiba figi'lek mondogat afuni Lewi mene inom, ap pok mene inom, yenggerugwi suarek mene inom, hemi sogwe mene inom, wogisigi o, neisena. Haren, Yi mene ti mene hinenggi wenagaisogo, 10 ba asi laga halok, 9 nen hit fakhaluk he, misik 10 mene andi re An faget nobagakhi logoino, iluk isigin hagat, wene andi nonggot a'luk ekhe sagalogo hilingiti'lek mondok higithogoat hilingiti o, neisena.

¹⁴ Yi mene ti mene hat faget figi mene andi, ware'ma fong wati logolik ekhe ninggi'lek, enda'ma waluk wulibi laluk, yugalek le'ma ekhe ninggi'legat, afuni ware'ma logolik noagaluk ekhe wogisigi'legat. Haren, Yi'nogo ti'nogo hilingi'no iluk mondogat yaganisasigin hagat hane hologo higithogo hilingiti o, neisena.

¹⁵ Hat honggwarek haiba pogoroba welagandek oba andoma nen nit hagainafuri Israel mene heilenggen nisigik, fanotninafik, ninaiba muli fanoma yi mene ti mene mondok hokhorogo were'ma yoma haren ninombalak wogisagaluk wene warisasigin higithogoat wo'nisegen mene yi fanotfigik, ikhi logoino o, iluk yagati logoino,” iluk yagaisasikhe.

Tuhan nen hinebe wenakhinafe iluk yagaisasikhe wene

¹⁶ A'nogo yagaisasikhesik ekhe yi'nogo yagaisasikhe: ”O yogondak yiba nineisena Tuhan Allah nen, Yi'nogo hilingiti logoino, ti'nogo hilingiti logoino, iluk mondogat yaganisasikhe mene andi, hiren hilingiti logouwagaluk yagahisikhe o. Andi nen he, hinendawinggen inom inobabut inom misigat a'luk, at oba lomborogo logolik wene andi hinaberali agi'lek mondogat hologo higithogo hilingiti logoino o.

¹⁷ O yogondak yibaat, Nineisena Tuhan he, Allah amu aro, iluk fakhogo egebo. A'nogo egepsik, Nit hat hane hologo logolik, haren, Yi'nogo hilingiti logoino, ti'nogo hilingiti logoino, iluk komo weneba yaganisegen mene andi mondogat hologo higithogo hilingiti logogun, iluk wene ware'ni o.

¹⁸ O yogondak yibaat, nineisena Tuhan nen, Hit hinebe yi'nogo hilinghinabigin, iluk wene wathisasikhe hak, hinebe at onggwarek againafuri mene asuagaluk wokhinafe o. A'nogo wokhinafesik, yi'nogo yagahisili'lago: An nen, Yi'nogo hilingiti logoino, ti'nogo hilingiti logoino, iluk komo weneba yagahisigi mene andi, mondogat hilingiti logoino, iluk yagahisikhe.

¹⁹ Nineisena Tuhan Allah nen afuni inunggulenu ekhe elalinafikhe mene andi, inunggulenu, we, endep elo'lek hangge werek kwelek, hirenek he, hinunggulenu hokho mene hilinghinabigin o. A'nogo hilinghinafunem, it afuni andi nen hit agaugwet hinafik, foget hinafik, ikhi logogun o. Nineisena Tuhan Allah nen wene wathisikhe hagat, hit hinebe at onggwarek againafuri mene hilinglasimbik logogun o,” iluk yagaisasikhe.