ULANGAN 25 - Allah Wene Fano Wene Hupla Inane

^1-2 A'nogo yagaisasikhesik he ekhe mel yagaisasikhe: ”Hit afuni Israel mene inebe pire, at ekhe nen wene at ekhe oba figik, at ekhe nen at ekhe oba figik ikhi logolik, ap wene inoba figik kotik agarek mene inoba lagunem, iren pilinget fuluk he, at ekhe weak hilingiti'lek, iluk wene oba koti logolik, at ekhe hak weak eberogoat hilingitemo, iluk wene oba fuluk, iren he, helokhe sogoum weinglame o, iluk yei at weak hilingisigin higithogoat inenggi wenagaisogo wati logogun.

³ Yei a'nogo wasugun meneat he, afuni at mene yenggele'ma ineilhanem enggali warogo yei inenggi hokhorogo huli 40 oba nen ekhe inom wasugun lek.

⁴ Wam sapi eisogen gandum agap lilibuk warogo enggen ibiluagaluk fuluk he, enggen ekhe at nanogo iluk ambe hele te'mekhogo homasugun mondok lego. We, ekhe at noagaluk herakfikhi logoino o,” iluk yagaisasikhe.

Ap oe agot mene ekhe wa'lagu halok hilingisugun wene

⁵ At Musa nen a'nogo yagaisasikhesik ekhe mel yagaisasikhe: ”Ap ekhe agot emberek misi'mo were'ma, oe a'nogo obulu'mo ap ekhe figi'lek ebe wa'lagu halok, agwe sogwe andi re, it ap ekhe at inom ero misigat lek, we, hunogoat mene wanugun mondok lego. We, ap wa'lasigin mene andi agot a'nogoat wanuago.

⁶ A'nogo wanimbik he, at amlogo ap manggusa tasigin mene andi, at oe wa'lasigin mene andi nen tagongge mene unggulenu re, afuni Israel meneat logouwagaluk, Ap wa'laga mene a'nogo nen tate mene, iluk anggikhi logogun.

⁷ A'nogo meneat he, ap agot andi nen, he oe nen sogwe fikhe mene andi wanigin abit halok he, he andi kaindek o kota andoma mene inoba lambik he, mel yagaisogoin: An nagun agoren he, an nebe wo'nabimbik, at oe obali'mo omalik ekhe tasumo aren tagongge mene unggulenu afuni Israel meneat logouwagaluk, an wo'nabu meneat he abiren heraknobagaikhemo wagi o,

⁸ iluk ikhe halok, it ap kaindek o kota mene a'nogo nen he, ap wa'laga mene agot a'nogo woletunem wagunem he, komoti logogun. Komosugun meneat he, Lego. Wanigin nabit aro, iluk ninghogoat ikhe halok,

⁹ he at oe agwe sogwe a'nogo agun agot oba horokhogo lambik, ap kaindek o kota mene omanogo ineilhanemat ap a'nogo eisok sandal ugu mene nonggol fuluk he, elokhonggen oba wesi suphogo lakfikhi logolik, mel yagasugun: Ap ekhe oe obali'mo tasu abiren nabit ikhe halok he, yi'nogo hilingitorego, iluk, komoti logogun.

¹⁰ A'nogo komosimbik oba nen afuni Israel mene nen ap andi againafuri inom faget ikhi logolik he, Ap asandal laberek mene nonggologo lakfisikhe mene againafuri mene yi, iluk ikhi logouwago,” iluk yagaisasikhe.

Wene melalek ekhe amu mene faget isikhe wene

¹¹ A'nogo yagaisasikhesik ekhe yagaisikhi logolik, ”Ap pire mene yei yafunem at misik ekhe agwe nen agun ilirogo aselei mene a'nogo agap enggalimo mene enggi nen kwanithugu halok he,

¹² he andi inendawi anggigi'lek enggi tegisikhi logoino.

^13-14 Hiren enggin walhagarek meneba inom, higirethigik kwelafarek meneba inom hineranhogo hilingiti logolik afuni lalinafi lagep hanogo.

¹⁵ Hiren enggin walhagarek meneba inom, higithogo kwelafarek meneba inom eberogo higithogo nek hilingiti logogun halok he, o hinanggweang hineisena Tuhan Allah nen wokhisasikheba omanogo hineluk ekhe inom uanhogo logogun.

¹⁶ At hineisena Tuhan Allah re afuni lalogo hilingitarek mene andi re abit anggikherek,” iluk yagaisasikhe.

Afuni Amalek mene inoa'no iluk yagaisasikhe wene

¹⁷ A'nogo yagaisasikhesik ekhe yagaisikhi logolik he, ”Hit o Mesir en wulibi wagagipsik ebekhalem wagunem, it afuni Amalek mene andi nen hilinghinafukwa mene a'nogo wenggel hano.

¹⁸ Hit hinomame lek agaikhesik hinoak maben agaikhemo wagu kwelek, iren hineisena Tuhan Allah oba inailo anggigi'lek hit hinambot fikhiren pin waga logolik, it hinombo'ne esa mondok hokho mene lagaukwa mene omanogo nen hit hinebe mondogat inoatukwa a'nogo.

¹⁹ A'nogo hilingitukwama enggere, hit ambi hineisena Tuhan Allah nen o kweang andoma mondok-mondok wokhisamo nen, hit hinebe hit hinaselei mene it logogun oba hinabel fena-fena maserogo werek mene andomaba inoba hinailo legengge logolik halok he, hiren afuni Amalek mene andi re mondok felelenghogo inoasumo afuni nen ekhe ebet isikhi logogun lek a'naga, hinonggot agi'lek eberek logoino,” iluk yagaisasikhe.