ULANGAN 24 - Allah Wene Fano Wene Hupla Inane

Hemi lologo herakfisaluk hobuk hilingiti logogun wene

¹ At Musa nen a'nogo yagaisasikhesik he wene ekhe yi'nogo yagaisasikhe: ”Ap ekhe nen, hele silerik mene ekhe ikhaluk arat waganek logolik, at hele andi weak inenggali asu mene ekhe hilingitemo iluk, elu a'luk, eilenggen yethaluk abiragu halok, at ap andi nen he, Hebe arat herakhobagagi, iluk surat palogo enggimo woge'luk, aiba nen mugusogo wulakfisamo,

² hele andi ap ekhe hunogoat mene wanigin.

³ A'nogo meneat he, ap hobuk mene andi enggi endebat waganek logombik, eilenggen kwekhugunemen abit agu halok aren he, Hebe arat herakhobagagi o, iluk surat palogo enggimo wogosumo were'ma nen, ap hobuk mene a'nogo ebe arat wa'laga halok he,

⁴ he andi ap attak mene andi nen hobuk wanigin mondok lek. We, he yi weak hilingisogo fikhemo an nen wanu lek iluk anggano. Meneat he, aren a'nogo anggigi'lek, he andi ebe hobuk wanigin halok, nineisena Tuhan Allah enu weagarogo fagain o. Ma re, hiren o hineisena Tuhan nen wokhisasikheba andoma nen hinobabut mondok weak a'nogo ekhe hilingiti logogun mondok lego,” iluk yagaisasikhe.

Yi wene ti wene hilingiti logolik wene melalek a'nogoba nek oba loukhogo hilingiti logouwagaluk yagaisasikhe wene

⁵ At Musa nen wene a'nogo yagaisasikhesik ekhe mel yagaisasikhe: ”Ap ekhe agwe ket ikhikhe halok, hiren he, Tentara hilinglame o, iluk kwelakfoumo weim yabi lagik, yabu ekhe hilingiti logouwageluk yagatik, ugun mondok lego. We, aren he, tahun misik logolik agwe endawimo fanorogo, yabu oloba mene tak hilingiti logouwagaluk herakfisogoin o.

⁶ Hiren hinangge yi mene ti mene ekhe elama faget afuni ekhe fisogo logouwagaluk wogisogoin mene wokhisoagaluk onggo palogo it afuni helep gandum enggen sagalharek mene andi wanugun mondok lego. Hit a'nogo wanugun halok he, ap andi againafuri inom helep andiba inamburu sagalogo ninggi logolik inebe ineluk logogun mene wanugun andi weago.

⁷ Nen, hit afuni Israel mene ekhe nen afuni hit mene ekhe inebe hinagainapluk he, amingmingengge hilingisogo fikhe halok hea, athe, afuni ekhe inoba onggo palhe halok hea, ap andi ebe mondok wa'no o. A'nogo hilingisugun halok, hobuk weak andi hangge hilingiti logogun mondok lego.

⁸ Nen, hit ekhe hinoumo henanggo inailo mene hinoba aga halok, it ap Allah eisewerek Lewi mene nen, yi'nogo hilingi'no, ti'nogo hilingi'no, iluk yagahisoagaluk yagaisigi mene iren yagahisugunem mondok higithogoat hilingiti logoino o.

⁹ Nit o Mesir en wulibi wagunem nineisena Tuhan Allah nen ou andi mene he Miriam oba fikhe mene a'nogo hinendawimo eberek logoino.

¹⁰ Nen, hiren hinangge yi mene ti mene afuni ekhe elama faget fisogo logouwageluk wogisegep mene wokhisoageluk halok he, it inaiba elonggoma kwila fugo,

¹¹ We, hit hinebe enda'ma nenangorogo were'ma, at onggwarek eranen waganogo wokhisa wulibi wesigin fano.

¹² A'nogo meneat he, ap andi ebe angge mondok lek elagaik halok he, at angge andi hinenggi hup aninurogo fisogo logogun mondok lego.

¹³ We, at angge andi hup fisogo nogo ikhi logouwagaluk, o hubagi'lek werek kwelek ambotkwe wogoti logoino. A'nogo wogoti logogun halok, aren hai wathinafunem he, nineisena Tuhan Allah agaiyek hit hinoba fikhi logogin o.

¹⁴ Nen, afuni inunggulenu hit Israel mene inom, ap pok hit hinaiba kota ekhe welagaikharek mene inom, inangge lek inelagaigen weakhogo welagaikharek mene inenggi onggo uang wogisoageluk yabu hilingitarek mene andi, inenggi onggo wogisigi'lek lalinafi logogubo.

¹⁵ We, hinenggi kamo igi'lek o ebe lombok, it inenggi onggo wogisugunem yi mene ti mene higit wanu were'ma yabu lebethisaga mene andi, o mo ubuk igi'lek werek kwelegat inenggi onggo wogisikhi logoino o. A'nogo meneat he, it inenggi onggo wogisigi'lek halok, hiren it inenggi onggo wogisoagaluk he, iren nineisena Enupogot kino yagatunem, Allah nen, Hit weak hilingitep, iluk wene hinoba fagain o.

¹⁶ Nen, inagainafuri weak hilingisugun oba inesugwi inagaisawi wene inoba fuluk inebe pinggi inoasugun lego. Nen, inesugwi inagaisawi weak hilingisugun oba inagainafuri wene inoba fuluk inebe pinggi inoasugun legaro. We, it inebe lombok weak hilingisugun halok inonggwarek inenggi elugun oba inebeat inoasugun o.

¹⁷ Nen, hiren ap pok mene inangge inom, yenggerugwi suarek mene inangge inom hinenggi abisak heligik, nen hemi sogwe mene inasu hobuk wogisogoin iluk aninurogo fisogo welagik ikhi logogun mondok lego.

¹⁸ Hit hinebe afuni Mesir mene nen inamingmingengge higit fethinarek welagaukwa a'nogo hinendawimo ebe'ni o. A'nogo were'ma, at hineisena Tuhan Allah nen wokhinarek wulibi wagaikhesik telhinafikhe andi nen he, hiren wene palek oba loukhogo hilingiti logogun mene komorogo wene afe halogo figi yi o.

¹⁹ Nen, hit yi mene ti mene yasugun mene ebe palogo waluk we'luk he, gandum enggen hele yelik herakfisogoin mene andi, hobuk wani logoin mondok lego. We, nineisena Tuhan Allah nen hit ekhe mene-ekhe mene hilingitunem fanot hinobagakhi logouwageluk, gandum enggen palek andi, afuni ap pok mene inom, yenggerugwi suarek mene inom, hemi sogwe mene inom, heloageluk herakfisikhi logoino o.

^20-21 Nen, e zaitun enggen inom, anggur enggen inom, palogo waluk waga logolik herakfisaluk wesugun mene andi, it afuni ap pok mene inom, yenggerugwi suarek mene inom, hemi sogwe mene inom, heloagen he, hit hobuk wani lagubo.

²² Hit hinebe afuni Mesir mene nen inamingmingengge higit fethinarek welagaukwa a'nogo hinendawimo ebe'ni o. A'nogo welagagip andi nen hiren wene palek oba louksek hilingiti logogun mene wene afe halogo figi yi o,” iluk yagaisasikhe.