ULANGAN 23 - Allah Wene Fano Wene Hupla Inane

Afuni Allah againafuri inom seberek lek mene faget isikhe wene

¹ A'nogo yagaisasikhesik ekhe yagaisikhi logolik, ”Ap inouwali waganek mene inom nen ebe palek mene inom he, At Tuhan againafuri mene logogun lek.

² Ap hesanggemalik eisena agaisa inom lombolek lek mene nen ta'lagu mene halok he, aren tagomangge mene nen ta'larik laga logombik 10 huliba taginabugun mene andoma re Tuhan againafuri asugun lek.

³ Afuni Moab mene inom Amon mene inom, nen iren tagomangge mene taginabik laga logombik huli 10 nen taginabugun halok ogore Tuhan againafuri mene logogun legat.

⁴ It andi re hit o Mesir en wulibi wagagipsik ebekhalem wagunem iren i inom, sumburu inom wokhisasukwa lek. A'nogo hilingitukwasik oba nen ogore, iren hun Bileam Beor amlogo awi kota Petor o Mesopotamia mene a'nogoba hit homan hinobagauwageluk onggo palhukwaat andi.

⁵ A'nogo hilingitukwaba nen he, At hineisena Tuhan Allah re Bileam ane ikhe mene andi esanggo holhikhe fuk. Oba nen Aren he hit hinobaget endawi hundik hilinghinafi logolik homan hinobagagu mene a'nogo hebekhogore hinenggi werek hilinghinobagakhi lagaikhe andi.

⁶ Hit hineluk logolik inom, nen logogun huli andoma inom ogore it afuni andi inunggulenu lombok logogun mene andoma leberisigik, inenggi werek hilinginafik u fuk.

⁷ It afuni Edom mene re hit hinagaila'lak hilingi'mo re, hiren it andi faget sebelek hak angga fuk. Nen it afuni Mesir mene faget ogore attak hit o andoma welagagip andi nen he, it faget sebelek hak iluk angga fugat.

⁸ It ta'lagaikha huli henaganek mene erembul fikhit ta'larik logoin mene andi re, An hineisena Tuhan Allah nagainafuri asugun fano,” iluk yagaisasikhe.

It ap sikhe fisogo mene inawi sabu wurogo nogoguba pugunhogo logouwageluk yagaisasikhe wene

⁹ A'nogo yagaisasikhesik ekhe yagaisikhi logolik, ”Hit weim yafi logolik, hinawi elokhe emetfegep hanogoluk yi aple ti aple hilingisuogeluk ogalhi logoino.

¹⁰ Ap ekhe hubanggo nogogunemen amusu wulibi wesigin oba ebe emetlagu halok he, at andi o sabu wuri'mo omanogo herakfuluk enda'ma wulibi laluk logogin.

¹¹ O hu'mo agu halok enek he, aren kume waraluk o mo ubuk ugunemen nekhengge o sabu wuri'mo kwi waga logogin.

¹² Hiren he o sabu wuri'mo nen endakwe fikhit andoma inamisema laguba obalik ekhe seleget fikhi logoino.

¹³ Seleget fogunem andoma louwogeluk halok he sige misik ekhe inamisema laluk kweang habulogo salhu mene faget waluk laga logogun.

¹⁴ At hineisena Tuhan Allah nen hit hinebe hinawi sabu wuri'mo omanogo awe a'ma fethinarek were'ma, it hinaselei mene inelokhoma hit hinebe hinalonget hinobagakhi logogin. Andi nen he hit hinawi sabu wurikwe andoma mondogat fanorogo pugunhogo logoino. Nen a'nogo logogun lek halok he hit hinanggele'ma andoma obabut weak mene ekhe were'ma, At hineisena Tuhan Allah hit hinebe herak hinobagaluk laga logoinogo o,” iluk yagaisasikhe.

Wene melalek amu mene ekhe inom yagaisasikhe wene

¹⁵ A'nogo yagaisasikhesik ekhe inom yagaisikhi logolik, ”Ap inamingmingengge misik ekhe eisena aiba nen wulibi laluk, hit hinambit hina'nobagani iluk wagu halok he, at oba haiba lan, iluk yagasu fuk.

¹⁶ At o hit hinawi kota andoma anggele'ma misik ekhe at onggwarek endawimo anggagain higithogo were'ma, hiren at oba weak-beakhogo ekhe hilingisugun lek.

¹⁷ Hit afuni Israel mene ap ogo, hemi ogo tugwi kembu awi wuri'mo andoma laluk, hambenan hilingisi la fugat.

¹⁸ At hineisena Tuhan Allah re, it afuni nen tugwi kembu awi wurikwe andoma laluk, hesangge hilingitarek mene inom, nen hesangge hilingirik nikhi logolik saburik mene inom andoma mondogat he abit anggili'lagoma re, uang hambenan hilingitu meneba saburik mene halok he, At Tuhan Allah awi wuri'mo an nen yi'nogo wogeti logogin iluk, waluk waga logogun mondok lek.

^19-20 Nen hiren hinauang ap pok mene inoba palegengge hakhogo wogisaluk halok he, hiren ekhe inom mangorogo nonggwarek wo'nom iluk yagaisikhi logogun. Meneat he hinauang halok ogo, su labetu mene halok ogo, nunggungge halok ogo, it hinagaila'lak hit hinawi kota misik mene inoba palegengge hakhogo wogisaluk halok he, aren obali'mo fagain iluk wanhu mene andi re ekhe inom mangorogo legengge onggwarek mene nek higithogo wogeti logogun. Wene melalek andi higithogo nek hilingiti logogun halok he, At hineisana Tuhan Allah nen o hit hinawi logogun oba andoma yi wene ti weneilingitunem hinoba fanot hinobagagunem fano mondok logogun.

²¹ Nen hiren, hineisena Tuhan Allah eilhanem yi'nogo hilingisigin iluk wene ware'luk halok he, yi'nogo nen, athe ti'nogo nen, iluk sugulhi logou fuk. At hineisena Tuhan Allah re hiren wene waresugun mene andi onggoragi'lek eberek mondok logogin. Nen hit higithogo hilingisugun lek andi nen weak hilingisugun andi.

²² Nen hiren a'nogo hilingisugun iluk Tuhan oba wene ware'luk halok he andi re hiren weak hilingisugun lek.

²³ Oba nen he, hiren hinendawimo hinagaiyek oba a'nogo hilingisugun iluk hineisena Tuhan Allah eilhanem uluk halok he, hiren tiphogo nek hilingiti logogun.

²⁴ Hiren ambi it hinagaila'lak ekhe inagayo anggur awi yagokwe laga logolik halok he, inagayo enggen andoma hit hinendawimo anggogoin higithogo taganogo nogoin fanoba nen he, hinasu si ugu hangge meneba taganogo kwala fuk.

²⁵ Hit ambi it hinagaila'lagen inangge gandum erokwe laga logolik halok he, hiren enggen hinenggi nen palugun mene andoma nogoin fanoba nen he, karok sabit oba halok he palugun mondok lego.” Iluk yagaisasikhe.