ULANGAN 22 - Allah Wene Fano Wene Hupla Inane

¹ Afuni hit hinunggulenu mene inanggo sapi, domba ogo ekhe longgo imbik were'ma hit hinom hineilenggen halugen he, hogolek fuk kanggo hilingisugun lek oba nen he, wam a'nogo waluk at onggwarek agun oba wogosi we'no.

² Nen at anggowarek agun a'nogo awiba yatma hilingik halok, athe hinonggot halok he, wam a'nogo waluk hit hinaiba lano. Waluk laluk were'ma nen at onggwarek agun a'nogo herarik wagu halok enek he onggwarek wogo'no.

³ Hiren wam keledai misik hera'luk halok inom, su labetu mene halok inom, athe we amungge it afuni hit mene inangge hera'luk halok ogo a'nogo nek hilingitunogo.

⁴ Wam keledai, sapi it hinori hit hinunggulenu misik mene inangge ebekhalem wengik werek halok, hiren hogo lek kanggo herakfisa fuk, athe wam andi legeisogo menfeino.

⁵ It hemi su aben labetarek hakhogo labetik, nen it aben su hemi nen labetarek hakhogo labetik hilingitu mene andi faget he, At hineisena Tuhan Allah nen abit anggikherek andi nen he, a'nogo hilingiti logou fuk.

⁶ Hiren sue awi e wilibik meneba ogo, kweangma ogo wuri'mo sue agaisa enggen oba ogo, elu were'ma ogo sebelek werek halok he, sebelimbik wanugun lek.

⁷ Hit hinangge yi mene ti mene hinenggim weregenek logolik hineluk uanhogo logobagaigen he, sue eak andoma re helogoin fanoba nen, sue agaisa nek he tarogo loageluk wulak fisogin fano.

⁸ Hit hinawi ket wuti logolik halok, o tum he aleget waganogo nen wu'no. A'nogo wusumo nen ap ekhe o tum oba nen pile waga logolik wasigin halok he wene hit hinoba asigin lek.

⁹ E anggur yabumo halok he anggur awiat ya'no, amu mene ekhe inom seberogo yasu fuk. Nen hiren a'nogo yasugun oba nen he amu mene andi enggen inom, e anggur andi enggen inom mangorogo palhep hanogo.

¹⁰ Wam sapi misik inom wam keledai misik inom yabu wilik laga logolik kweang mogolik lagarek meneba misi'mo kelinabu fuk.

¹¹ Su labeti logolik he, domba esi meneba ugu mene inom, yo linen meneba ugu mene inom misik sambul labesu fuk.

¹² Hit hinasu labetu mene wurep enggi palogo re yo ero misi'mo lalogo pot filik lagunogo.” Iluk yagaisasikhe.

Aben hemi woginafi logolik hilingiti logogun mene faget yagaisasikhe wene

¹³ A'nogo yagaisasikhesik ekhe yagaisikhi logolik,” Ap misik ekhe nen hele silerik mene ekhe helagain, oba nen hobugen hele a'nogo abit agunem,

¹⁴ aren eranen wene oba fikhi logolik, hele yire an ninom oan lombolninafi'le'ma re, ap ekhe inom sebethama o, arigini'mo re an he nabit iluk halok he,

¹⁵ it hele agaisa eisena nen su kain it ket lomborinafunem mep pikhe mene ebene yuguligengge a'nogo waluk, nit nina'logo ap oan wanhi'lek ap ekhe inom sebeti legengge welaga mene o, iluk su kain a'nogo enegengge waluk it ap inogogwi o kota wene katokhogo palharek mene inoba omanogo inugisa laga logogun.

¹⁶ A'nogo inugisikhi logolik, at hele eisena a'nogo nen he yi'nogo ikhi logogin, an he hele na'logo yi ap ari agwe asuageluk wogetiba nen he yogondak at ebe abiret fikhesik hilingiri'lago o.

¹⁷ A'nogo hilingitesik he aren ane eranen wene oba fikhi logolik, hele yi an wanhi huli re at ap inom nogoga lek mene iluk enegengge ekhe welaga lek iluk ikhe. Oba nen he enegengge an na'logo andem sambul ap inom sebeti'le'ma we werek kwelek wogetinggere su kain yi hele yi helikhe sambul talogo nogoga mene amep yi hani!” ikhi logogin.

¹⁸ A'nogo ugunem afuni it o kota werek mene inogogwi omanogo nen ap a'nogo wole'luk yei wati logogun.

¹⁹ Yei wa'luk he aren a'nogo ikhe mene onggo iluk uang perak mene 100 nen fugunem, aren afuni Israel mene inenu sebelogo fikhemo o, iluk uang a'nogo at eamal wogeti logogin. A'nogo hilingfuluk hele a'nogo re at ap a'nogo nen mondok-mondok waganek logolik, inom minggilik werek kwelek enek ineluk logogun.

²⁰ Oba nen he, ap a'nogo ane oba fu'mo to'mot hili'lago mene a'nogo, eberogoat agwe a'nogo helikhe huli at oba ap inom sebeti'legengge welaga iluk enegengge ekhe welaga lek halok,

²¹ hele a'nogo agaisa eisena inaiba solombonma omanogo woginarek laluk, at hele andi agun oan heligi'legengge eisena aiba logoligen ap inom sebetama, aren afuni Israel mene inenu sebelogo fikhe iluk it aben enek o kota andi werek mene nen helep oba tung tungenggerogo wasumo ebe pinggi wa'lasigin. Hiren at oba wene fogoin andiba weak mene a'nogo lek hilingisogo fogoin andi.

²² Ap misik ekhe nen ogo ap amu mene agwe inom hilingitunem isaga halok he, iren hilingisugun onggo inebe pirenet pinggi inoasugun. Hiren a'nogo hilingisugun andiba re weak mene a'nogo leget fisogoin andi.

²³ Hele ekhe ap agap onggot mene agun ekhe inom helagain iluk lombolek werek mene, ap ekhe amu mene inom o kota andoma ambi agaikhasik inom pailak hilingita halok,

²⁴ a'nogo hilingita mene andi faget he it inebe o kota abel endakwe fikhit woginarek wulibi laluk helep oba tung tungenggerogo inoasumo inebe pinggi wa'lasugun. Hele andi re at ebe o kota elonggoma ap a'nogo nen hilingitunem aremnogo ane kwerik lele'ma nen he afuni nen ane holilep oba nen ane kwete lek andiba ebe pinggi wata andi. Nen at ap andi re, aren ap amu mene nen hele andi helagain iluk lombolek were'ma inom pailak hilingita iluk wasugun. It inebe pirenet a'nogo inoasugun andiba re weak mene a'nogo lek hilingisogo fogoin andi.

²⁵ A'nogo meneat he, hele ekhe agun helagain iluk ap misik inom lombolek were'ma ap amu mene ekhe omameba hele andi inom pailak hilingitu mene andi awene re amu werek. Andi faget he hele andi nabit ilik lagu kwelek hilingite andi nen ap andi nek ebe pinggi wasugun.

²⁶ Nen at hele andi re abo andiba weak yi'nogo ti'nogo ekhe hilingiti'lema re, aren hilingite onggo iluk wene oba fuluk wasugun lek. Wene andi obabut he ap ekhe nen ap amu mene ekheba yei harogo laga logolik pinggi inoatarek hak hilingite andi nego.

²⁷ Ap andi nen hele andi inom pailak hilingite andi re yabumo nen hilingite, nen at hele andi ane kweteba nen he, ap amu mene nen ekhe lebetha lagaikha lek.

²⁸ Ap misik ekhe nen hele silerik mene aben lombolek lek mene ekhe inom pailak hilingitunem isaga halok,

²⁹ a'nogo hilingite mene andi faget he, ap andi nen hele a'nogo eisenaba onggo uang perak 50 nen wogosigin. A'nogo woge'luk he hele andi ap omameba inom pailak hilingitama iluk at agweap eraluk herakfigi'lek waganek logolik inom mondok logogun.

³⁰ Ap ekhe nen eisena agwe inom hilingisugun halok eisena enu sebelogo fagain andi nen he, a'nogo hilingisugun mondok lek.” Iluk yagaisasikhe.