ULANGAN 21 - Allah Wene Fano Wene Hupla Inane

Ap watunem wene higithogo tegesu lek hak hilinglagunem hilingiti logouwageluk yagaisasikhe wene

¹ A'nogo yagaisasikhesik ekhe yagaisikhi logolik, ”O At hineisena Tuhan Allah nen wokhisikheba andoma nen, ap ti nen wate inonggotse'ma nen ap warek ekhe yabumo hera'luk halok he,

² it hinogogwi kaindek ferinarek mene inom, it unggum pilingisogo tegetarek inap inom omanogo nen he obalik ap wateba aremnogo nen o kota ba re uan a horoga iluk ilirengge waleti logogun.

³ A'nogo ilirengge walet hugunemen it ap o horokhogo werek mene a'nogo inogogwi nen sapi ket kotorek mene yabu oan hilingiterek lek mene misik halok ekhe heraisogo fogoin.

⁴ A'nogo heragaisogo fuluk, sapi a'nogo waluk he i firitok igi'lek lagu mondok welagare'ma, kweang yabu waganogo yatarek lek oba enggama waluk laluk andemen sapi a'nogo alonggop tekhogo wa'no.

⁵ A'nogo hilingitunem andi re it imam Lewi inap andi re At Allah obaget hilingitik, At enuba afuni fanorinafik ikhi logouwageluk were'ma re, wene ap ina'mageba hilingitu mene faget he irenat tegeti logogunmo, it ogo o andoma laga logogun.

⁶ A'nogo hilingfuluk it afuni inogogwi kaindek o kota horokhogo mene omanogo sapi andi amboroba nen inenggi sobalhi logolik,

⁷ inane yi'nogo ikhi logogun, ’Ap andi re nit ninenggiba nen wati'lek, nen nineilenggen nen ogo higi'legat.

⁸ Nineisena Tuhan, afuni Israel mene hat hagainafuri o Mesir en hele fikhalogo wilaginabi wagagin mene omanogo ninaweak honggoraphogo ninobagain o. Ap weak hilingite lek oba nen warek mene andi faget iren hilingisuak he iluk hobakhe ligik herakninobagagun o, neisena,’ ikhi logogun.

⁹ At hineisena Tuhan nen a'nogo hilingisugun anggugu mene a'nogo higithogo hilingitu halok he, ap warek mene andi faget he iren enek hilingisuageluk anggagain lek andi,” iluk yagaisasikhe.

Hemi weim ambisangma nen palinapluk hilingiti logogun mene iluk yagaisasikhe wene

¹⁰ A'nogo yagaisasikhesik ekhe yagaisikhi logolik, ”Hit weim yabi lagunemen At hineisena Tuhan Allah nen hit hinalongap hinobagagunem afuni sikhe ambisangma nen fakfisaluk halok,

¹¹ it seninafu mene andoma nen hemi inelokhe mondok fano mene ekhe hit hinendawinggen nunggunem helogoin anggaluk halok,

¹² he a'nogo helaluk hinaiba waga logogun. A'nogo waluk wagunem he a'nogo aren esi palhik, unggul hogolhik, enggia'lip palhik,

¹³ asu amu mene laberigik, ikhi logogin. A'nogo hilingfuluk at a'nogo eisena, agaisa wa'lagu mene omanogo faget tugi misik inukhogo fong wati logolik oloba logogin. A'nogo hilingitunem enek he hiren at ebe helikhi logogun.

¹⁴ A'nogo helaluk hinom were'ma nen hobuk at ebe abit agu halok he at ebe selekhogo loageluk yaga'no. Nen at ebere hat homameba hinom sebetepma re hit hinamingmingengge hakhogo hilingfigik, onggo paligik hilingisu fuk.” Iluk yagaisasikhe.

Omalik manggusa mene inalolegengge wogisikhi logolik hilingiti logogun mene iluk yagaisasikhe wene

¹⁵ A'nogo yagaisasikhesik ekhe yagaisikhi logolik, ”Ap misik ekhe nen agagwi inebe pire woginare'ma nen, hemi inebe pirenet inomalik ap engge nek taginabugun, oba nen he omalik attak-attak takhogoin mene andi re at agwe endawi hundik mene a'nogo eak lek halok,

¹⁶ ap a'nogo nen angge alolegengge ninggi'nogo at againafuri tago andoma sumburisagain nogo, nen aren ogore alolegengge omalik manggusa mene a'nogo nen hela mene oba nen he, at agwe endawi hundik mene omalik tago mene a'nogoba wogosinogo.

¹⁷ At alolegengge mondogat andoma omalik andi at agwe endawi hundik mene a'nogo nen tagongge lek kwelegat he, altap pirebaat ekhe inom seberogo omalik manggusa mene andiba wogosugun. Omalik manggusa mene angge andi re at eisena nenat ane tekhogo imbik, wene melalek oba werek higithogo omalik andi angge asuageluk abirengge wogosigin,” iluk yagaisasikhe.

Omalik inobabut kwanirogo hilingitarek mene inoba hilingiti logogun wene

¹⁸ A'nogo yagaisasikhesik ekhe yagaisikhi logolik, ”Hinomalik ap engge ekhe endawinggen omamerek logolik, eisena agaisaba yei enek liafu weregen agaisa eisena nen unggum wogosugun oba nen holhu legat halok,

¹⁹ it agaisa eisena nen omalik a'nogo waluk it afuni inogogwi o kota ba werek mene inoba obaget wene katokhogo paluageluk waluk waga logogun.

²⁰ Waluk wagunem iren ap inogogwi o kota werek inap omanogo inoba ikhi logolik he, ’Nit ninomalik yi re endawinggen omamerek logolik nit ninoba yei liagaisogo nek hilingiti logolik, nit ninane mondok holhi legengge hilingitik, nen aren uang mondok legabetik, lugulugwi palhik. hilingitu nen waluk wagoo,”

²¹ iluk a'nogo yagaisugunem, it afuni ap mene nek o kota andi werek mene omanogo nen omalik a'nogo helep oba tunghogo wasumo ebe pinggi wa'lasigin. A'nogo hilingisugun andiba re hiren weak mene andi lek hilingisogo foumo, it afuni Israel mene mondogaren inesanggo holimbik he inailo nek asigin,” iluk yagaisasikhe.

Wene melalek fena amu mene yagaisasikhe wene

²² A'nogo yagaisasikhesik eke yagaisikhi logolik, ”Ap ekhe weak hilingitunem unggum oba fugunem wa'lasumo nen ebe warek a'nogo e mendek meneba porogo fogoin halok,

²³ ebe warek engge andiet herakfisamo hup inukhogo logoinogo, we linggene a'nogo sambulat enek sali lano. Ap warek eba logogin mene andiba re At Allah nen hit hinawi hinebe welagep kwe homan fagain enggere, o at hineisena Tuhan Allah nen wokhisikheba andoma weagerogo fegep hanogo re ap warek andi weak-weak salino.