ULANGAN 20 - Allah Wene Fano Wene Hupla Inane

Weim yafi logolik hilingiti logogun mene faget, yagaisasikkhe wene

¹ At Musa nen a'nogo yagaisasikhesik ekhe yagaisikhi logolik: ”Hirambi it hinaselei mene inom weim yabi laga logolik halok he it hinaselei mene andoma inanggo kuda hokhorogo werek mene faget inom, kereta ap amboloba lagaluk weim yabik lagaikharek mene hokhorogo werek mene faget inom, it inagoromi tentara sikhe fisogo mene esa hit hinebe maben sek kwelek it hokhorgo wane mene andi faget hinailot inabu fuk. Hit hineisena Tuhan Allah o Mesir en hele fikhalogo wilak hinabi wagaikhe mene a'nogo nen enek lebethinafi logogin.

² Nen hit hinebe weim oan yabi lagi lek logolik he ap nabi misik ekhe menlasi we'luk he yi'nogo yagaisikhi logogin:

³ ’Yago nori Israel hinap hinesanggo holini, yogondak he hit weim kwelabi kugun enggere, hinendawinggen endebagik, hinailo agik, hinendawi suk-sak igik hilingisu fuk.

⁴ Hit hineisena Tuhan Allah At hit hinom laga logolik lebethinafi logogin, Aren enek hit hinalong asuageluk hilinghinobagagin,’ iluk yagahisikhi logogun.

⁵ A'nogo yagaisugunem, it sikhe fisogo mene inogogwi lego mene perwira andoma nen inane yi'nogo yagaisikhi logogun, ’Ap ekhe o ket wutepsik oan o eil warek lek engge welagep mene ekhe werega? Werek halok he at weim yabi lagunemen aben wasumo aiba ap amu mene kwimbik logogun enggere at aiba ambotkwe lagokhogo lagain fano.

⁶ Hat ekhe heabumo anggur awi ket yatendik he enggen oan palhi'lek mene ekhe welagen a? Welagen halok he hat weim yabi lagunemen aben hoasumo hagayo anggur agai ap amu mene nen nogoin andi re elo'lek, enggere hat haiba hambotkwe sugulogo lagain halok fano.

⁷ Ap hit hinanggele'ma nen ekhe hagwe helagain iluk lombolek welagen mene ekhe welagen a? Welagen halok he, hat weim yabi lagunemen hoasumo, ap amu mene nen hagwe aphogo lombolek welagen mene a'nogo helagain andi re elo'lek enggere kamo igin fano.’ Iluk yaga isogoin.

⁸ It sikhe fisogo mene inogogwi andi nen he wene yi'nogo ekhe inom yagaisogoin, ’Ap hit hinaggele'ma nen ik-ik hilingitu mene inom, hinailo mene inom ekhe welageba? Werek halok he at andi nen it ori fenakwe ko-ap kwelaginabigin enggere at awiba ambotkwe lagain fano,’ Iluk yaga hisogoin.

⁹ It sikhe fago mene inogogwi a'nogo nen a'nogo it inagoromi tentara omanogo yagaisaluk he ap esa logalek aremnogo hilingik higithogo inogogwi melalinafu mene iluk inenggi tum pilinghigik yagaisilik logoin.

¹⁰ Hiren lage o kota misik oba pin kwi logoin anggikhi logolik halok he attak he it afuni o andoma werek mene a'nogo nen nit hit hina'ma ago iluk ugun a, lega, iluk nenanggot isogoin.

¹¹ A'nogo nenangot isugunemen it omanogo nen inaiba kwe sou yagarek mene a'nogo hurogo nit hit hina'ma ago iluk ugu halok he, it inebe mondogat hit hinamingmingengge a'luk logolik yabu hinane ninghogo yagaisugu kwelek hilingitu logogun.

¹² Oba nen he afuni o sili andi werek mene omanogo inamururu a'luk, nit it ina'ma asugun andi re ninabit, nirogo weim yabugun ninamolo anggugu halok he, hiren o kota andi haningisi lano.

¹³ Haningisogo fei lagunemen, it hineisena Tuhan Allah nen o kota a'nogo sebeli ku aple hilingfugu halok he, hit kuluk afuni o andi werek mene ap mene nek mondogat inoa'no.

¹⁴ Oba nen he hemi inom, ineagwi inom, inanggo inom, yi mene ti mene o kota andiba welagarek mene andoma re hit helano. It hinaselei mene nen inangge mondogat andoma re At hineisena Tuhan Allah nen hit hinenggimo wokhisugunem hiren hinendawimo anggogoin higithogo helikhi logogun fano.

¹⁵ O kota o hit welagep oba andoma nen yat-yat werek mene andomaba re a'nogo hilingfisikhi logogun.

¹⁶ Oba nen he o kota andi lage kweang hit hineisena Tuhan Allah nen wokhisasikheba andoma werek halok he, afuni werek mene re mun felelenghogo inoa'no.

¹⁷ At hineisena Tuhan Allah nen melalhinafe hakhogo, hiren afuni Het inap inom, Amori inap inom, Kanaan, Feris, Hewi inap inom, Yebus inap inom, mondok felelenghogo inoa'no.

¹⁸ It afuni andoma nen he amu mene faget allah ap-ap hilingfuluk apne wili'lagwi mene mondok hebak nafe mene a'nogo faget hilingitu aple yanggulinabumo, hit hineisena Tuhan Allah eilhanem weakhogo hinobagai nogo inebe mondok inoa'no.

¹⁹ Hiren o kota misik walingisogo sebeli kwimbik andoma aninurogo logolik halok he e enggen ugu werek mene re musu fuk. E andi re hit hinaselei mene fuk enggere enggen enek nogoin fano, oba nen he e ebe wilibik mene re weagerogo fou fuk.

²⁰ E amu mene re hiren musimbik he o walingisogo e pelarik lagaluk o kota a'nogo mondogat pin talogo kugun.” iluk yagaisasikhe.