ULANGAN 18 - Allah Wene Fano Wene Hupla Inane

It imam inangge aga logogin mene faget yagaisasikhe wene

¹ A'nogo yagaisasikhesik ekhe yagaisikhi logolik, ”It afuni Lewi mene mondogat andi re ineabu imam mene asuageluk menfisikhemo, it he kweang afuni Israel mene nen fena andoma helogoin lek. It andi re Allah faget iluk wogosi waga logogun mene inom, warogo fei waga logogun mene omanogo inom, ninggi logolik ineluk logogun.

² It ineisena Tuhan nen it inoba wene abok yagaisikhe higithogo, it faget he ineisena Tuhan Allah ebeat eiserogo were'ma re, it inagaila'lak fena inanggweang werek andi hakhogo logogun lek.

³ Ap misik ekhe wam sapi, domba ogo ekhe warogo Allah faget fugu halok he, wam enggi inom, elokhonggen inom, alabut inom andi re, it imam a'nogo inangge asuageluk wogisikhi logogun.

⁴ Gandum enggen inom, anggur amusu inom, zaitun amusu inom, domba esi inom attak-attak palhu mene andi re it inobaget fikhi logogun.

⁵ Hit afuni Israel mene hinanggele'ma nen he, it Lewi mene andi re ineabu imam mene hundik-handik hilingiti logouwageluk hineisena Tuhan Allah nen inayonggo fesikhe.

⁶ Hit afuni Israel mene logogun oba o kota andoma nen ekhe ap Lewi mene misik ekhe obalik At Tuhan nen wenagaisogo fikheba omanogo we'luk logogin anggikhe halok he,

⁷ it agaila'lak Lewi mene fena andoma logolik, Allah obaget hilingitarek a'nogo hakhogo aren ogo it imam en hilingitarek andem higithogo hilingiti logogin fano.

⁸ A'nogo hilingitunem, it imam fena nunggu mene wogisugunem helagarek a'nogo hakhogo, arogo a'nogo helikhi logogin. Nen, at eisok erokwe nen lakfei wagu mene andoma at helikhi logogin halok fano,” iluk yagaisasikhe.

Hilingiti logogun lek mene iluk ane huli fesikhe wene

⁹ At Musa nen a'nogo yagaisasikhesik ekhe yagaisikhi logolik, ”Hit ambi o kweang hineisena Tuhan Allah nen wokhisagain oba andoma mondok kwilambik halok he, afuni inunggulenu andoma inap werek mene nen inobabut we hesangge-pesangge hilingiri'lagwi mene andoma it inobabut waganogo hilingisu fuk.

¹⁰ Afuni hit mene nen he hinagainafuri ekhe warogo nolinafarek oba andoma nolinabuageluk wogisa fuk. Nen, ap misik ekhe heinogengge agik, enegengge heratu mene agik, ambol famengge werek mene iluk hilinglagik, athe,

¹¹ afuni wa'lagu mene inaheimengge inom mangosi lagik, hareise mene agik ugun mondok lego.

¹² Afuni inobabut mondok kwanirogo hilingitarek mene andi re At hineisena Tuhan Allah nen mondok abit anggili'lagoma re, afuni inunggulenu ariginik mene andi hit hinelokhoma nen mugusogo wulaginabi'lago andi.

¹³ Arigini'mo re hit hinendawinggenma nen hineisena Tuhan Allah oba tiphogo hilingiti logolik fogerati logoni.

Allah nen he, ”Ap ekhe An nane yagahisikhi logogin mene ayonggo fembik hinoba lakfei wesigin,” iluk wene warisasikhe wene.

¹⁴ At Musa nen a'nogo yagaisasikhesik, wene ekhe mel yagaisasikhe: ”Afuni inunggulenu o hit hobuk kwilambik logogun oba andoma welagaikharek mene inobabut he, afuni ekhe wene hobuk hilinglasigin mene faget inendawinggen wenggelogo wesarogo yi mene ti mene hilingitik, agarek hak hilingitunem esanggo hologo hilingitarek mene were'ma logoin andi. A'nogo meneat he, nineisena Tuhan Allah nen, hit a'nogo hilingisugun lek iluk wene palherek.

¹⁵ We, an nen At ane yagahisigirek andi hak yagahisikhi logouwagaluk, Aren ap ekhe unggulenu nit mene ayonggo fembik hinoba lakfei wesigin o. A'nogo hinoba lakfei waga halok, hiren At ane hologo hilingiti logoino o.

¹⁶ Attak hit hinebe tom Sinaiba andogorogo welagagip aremnogoba re, hit hinebe wa'lasu hinailo nen he, mel isigip anggigi: Nineisena Tuhan Allah ebe endu amulok lagagunem anggele'ma logolik ane yaganisugunem ninesanggo holhik, ebe nineilenggen higik, hobuk ugun mondok lego, iluk isigip andi.

¹⁷ A'nogo isigip andi nen Tuhan Allah an noba ikhi logolik he, iren aga andi re, eberogo mene aga o.

¹⁸ Andi nen he, ap it mene ekhe haren An nane yagaisegendek andi hak yagaisikhi logouwagaluk ayonggo fembik inoba lakfei wesigin o. A'nogo lakfei wesimbik, wene afuni andi yagaisikhi logouwagaluk An nenat yagasigin o. A'nogo yagasumo, aren wene An nen, yi'nogo yagaisano, ti'nogo yagaisano, iluk yagahesigin mene andi mondogat it afuni andi yagaisikhi logogin o.

¹⁹ Aren An nenu uluk, it yagaisugunem, sa nen at ane hologo hilingiti'lek halok, An nen wene inoba fikhi logogin o.

²⁰ A'nogo meneat he, ap An nane yagaisikherek mene An nen, yi'nogo ino, iluk yagati'le'maat ailo'lek wene endawimo anggaluk An nenu hombuk palogo yagaisugu halok he, ebe mondok wa'no o. Andi hak it ap An nane, yagaisikhi logou hak, iren, Nineisena ebe andi aro, iluk agarek mene ekhe enu uluk yagahisogoin halok he, inebe inoa'no aro, iluk isikhe andi.

²¹ A'nogo meneat he, hit hinendawimo nen he, At andi nineisena Tuhan nen lakfei wagama yaganisili'lago, igik, nen, Lakfei wagi'le'maat ili'lago, igik, ninggi'nogo nen futfogoin o, iluk anggikhi lagep he a.

²² Ap ekhe Allah ane yagaisikherek mene nen wene hobuk hilinglasigin mene faget nineisena Tuhan enu uluk yagaisagain meneat he, ebe hilinglagi'lek halok he, wene andi nineisena Tuhan nen yagatemo ikhe igin lego. We, at andi nen wene at onggwarek enu uluk igin andi nen he, hit at ebe hinailorogo logogun lego,” iluk yagaisasikhe.