ULANGAN 17 - Allah Wene Fano Wene Hupla Inane

¹ Wam sapi, domba ogo agambut palek mene andi re At hineisena Tuhan Allah endawimo mondok abitsek enggere At obaget iluk fei wesu fuk.

² Hit hinesanggo holhugunemen ambi o kota misik oba ekhe, aben ogo, helime nen ogo Tuhan Allah elokhoma weak hilingiti logolik,

³ At awene melalek a'nogo inom sagalogo fuluk amu mene faget allah ap-ap hilingfuluk fogeratik, obaget hilingitik, hilingite halok inom, mo, tugi, hesagalenggen fogerate halok inom he,

⁴ hiren mondok fanorogo ayo wu'no. A'nogo ayo wusumo nen ambi kwanirek mene andi hit afuni Israel mene hinaggele'ma nen aga halok,

⁵ ap kwanirogo hilingite mene andi re o kota abel endakwe fikhit waluk wulibi laluk, helep oba ebe pinggi warogo feino.

⁶ A'nogo hilingisugun oba nen he, we at weak hilingite mene andi ap inebe pire mene nen ogo, inebe hokhorogo nen ogo, ineilenggen isaga halok inoa'no. We ap misigen eilenggen hikhe mene faget yi'nogo higi iluk ugu mene faget he, ap andi wasumo elo'lek.

⁷ Wati logolik he at eilenggen hagain agun andi nen tak helep oba watunem en, it afuni mondogat omanogo nen hobuk wati logogun. Hiren a'nogo hilingisugun oba nek he kwanirek mene weinam aga logogin mene a'nogo leget fikhi logogun andi.

⁸ Wene unggum ekhe weinam agunem it ap wene katokhogo lebegetu inap omanogo nen lebegetu aple enggin agu halok, nen wene andi ambi ap fetakhogo wate mene faget hea, anggomo kagalhesik ebe wate mene faget hea, inangge faget nili-hili ikhi logolik hea, inagap pal-pal lagu halok he, hit hinebe hineisena Tuhan Allah nen obalik wenagaisogo fikheba omanogo laluk,

⁹ hinawene andi it ap Lewi inap Allah elokhoma hilingitu mene omanogoba inom, andem oba ap wene katukhogo palherek mene yabu hilingiti logolik werek mene a'nogoba inom hinawene waluk lambik, iren lebegethisoageluk inenggiba feino.

¹⁰ Wene ebere iren sikhibet hisugunem hit he iren yi'nogo hilingisugun iluk yagahisugu mene andi nek furogo hilingiti logoino.

¹¹ Iren wene andi sikhiphogo wokhisaga halok, hiren it inane yagahisogoin mene andi ekhe herakfigi'lek mondogat higithogo hilingiti logoino.

¹² Ap sa nen ekhe it imam mene omanogo ogo, at wene katokhogo palherek agun yabu hilingiti logolik werek mene a'nogo ogo inane sagalhu halok he, ap andi oba wene fuluk ebe pinggi wa'no. A'nogo hilingisugun andiba re kwanirek mene hit Israel mene hinanggele'ma hilingiri'lagwi mene andi legasigin.

¹³ A'nogo hilingita ugunem afuni mondogaren inesanggo holimbik he, it inailo asumo ap ekhe nen a'nogo ambong serogo ekhe hilingisu elo'lek asigin.” iluk yagaisasikhe.

Ap raja menfikhi logolik hilingiti logogun wene

¹⁴ A'nogo yagaisasikhesik ekhe yagaisikhi logolik, ”Hit ambi kweang hineisena Tuhan Allah nen wokhisasikheba andoma sebeli kwimbik logolik, afuni inunggulenu hit logogun oba andoma hinera'lukwe maserogo welagaikharek mene inogogwi raja werek andoma higit, nirogo raja a'nogo ekhe logoilebe iluk hinendawimo anggogoin logou hak.

¹⁵ A'nogo hinendawimo anggikhi logolik halok he ap hiren hinoe raja ekhe heragaisogo menfogoin mene andi re at ebe hineisena Tuhan Allah nen ayonggo fikhe mene halok menfeino. Nen hit hinoe menfogoin mene andi re hit hinonggwarek hinunggulenu meneat heragaisogo menfisano, ap amu mene nen fethinarek logouwageluk menfisa fuk.

¹⁶ At raja halok he agoromi tentara sikhe fisogo mene faget wam kuda weim yaferek mene iluk hokhorogo fisogo logogin lek. At hineisena Tuhan Allah nen he afuni An nagainafuri yi o Mesir inambotkwe logoin lek iluk ikhemo re, it afuni yi o Mesir kuda hunisi loageluk ogo, athe kuda amu mene inom agamesi loageluk ogo, onggo pali lani iluk lakfisogoin mondok lek.

¹⁷ At raja logogin halok he aren Tuhan ambotma fuluk hilingiti logogin hanogo, agagwi hokhorogo logogun legat. At angge emas, perak inom oba enggi werek erikhi logogin legat.

¹⁸ Ap ekhe raja logouwageluk menfuluk halok he, ap andi buku Allah Awene melalek yi'nogo hilingi'no ti'nogo hilingi'no iluk buku ebe meneba nen lisu palogo it yabu imam logolik hilingitarek mene Lewi inap omanogo nen fisogo werek mene a'nogo misik ekhe wogeti logogun.

¹⁹ A'nogo wogetunem aren buku a'nogo era'lu were'ma, eisena Tuhan Allah a'nogo along werek iluk legeisogo figik, awene melalek buku andi elonggoma palek werek mene a'nogo tiphogo hilingitik, hilingitarek aple yanggulikhi logouwagen he at ebe eluk logogin huli andi buku andi hundik-hundik kwelakhikhi logogin.

²⁰ Aren a'nogo hilingiti logogin halok obabut sebelasimbik, an enek fano it afuni yoma sebelek hak anggigi'lek, Tuhan Awene melalek werek mene a'nogo obabut ninggi'nogo iluk ogore sagalogo figik lek hilingitik, hilingiti logogin. A'nogo hilingiti logolik at ebe inom aren tagomangge mene inom it inunggulenu mene a'nogo halinafu mondok logogun o,” iluk yagaisasikhe.