ULANGAN 16 - Allah Wene Fano Wene Hupla Inane

Linggene Paskah faget ebetu sambul hilingiti logogun mene faget yagaisasikhe wene

¹ A'nogo yagaisasikhesik ekhe yagaisikhi logolik, ”Linggene Paskah faget ebeti logolik, hineisena Tuhan Allah legeisogo fikhi logolik he tugi Abib andiba hilingiti logoino. Tugi andiba re hit o hubanggo o Mesir en lologo wulakhinabi wagaikhenggere.

² Hiren hineisena Tuhan Allah legeisogo fikhi logolik iluk linggene Paskah ebetu sambul andi re obalik At hineisena Tuhan nen wenagaisogo fuguba omanogo laluk, hinanggo sapi, domba, kambing halok misik ekhe linggene Paskah faget fogo mene iluk wati logogun.

³ Wam linggene Paskah faget iluk watu mene andi re roti fiterek lek meneba weragongge inom ninggi logogun. Hit o Mesir herakfuluk hale'legengge wulibi waga logolik hilingitigip higithogo roti fiterek lek meneba werago mene andi re, linggene sabiren oba logolik ninggi logogun. Hit hinebe hineluk logolik o Mesir enggin-fenggin hikhi lagagip oba omanogo herak fisaluk wulibi wagagip sambul a'nogo faget ebethikhi logobagorigen he, roti enu enggin-fenggin andi ninggi logoino.

⁴ Hinenggi sabiren andem oba logolik he, o hit logogun kwe andoma mondogaren ap misik ekhe nen roti fiterek mene iluk ogo hinailokwe ekhe fisogo logogun mondok lek. A'nogo logolik hinenggi higit-higit sabiren andi re, wam hinenggi misik sambul faget watu mene halok he hinenggi andibaat ekhe figi'lek mondogat ninggi logoino.

^5-6 Wam linggene Paskah oba andi ebeti logolik watu mene faget halok he, o kweang hit hinebe logogun oba iluk wokhisikheba andoma nen he wati logogun lek, we At hineisena Tuhan Allah nen obuluk wenagaisogo fikheba andoma nen wati logogun. Wene andi mene re hit o Mesir herakfuluk wulibi waga logolik hilingitep hakhogo, hiren mo ubuk ilagu kwelek andem hilingiti logogun.

⁷ Wam andoma isakfuluk, obalik At hineisena Tuhan Allah nen wenagaisogo fikheba omanogo nen naluk he, hubet weirogo hinawilokwe pugulhi logogun.

⁸ Hinenggi falfaligen wela'luk ambolkwe andem oba re hiren roti fiterek lek meneba werago naluk he, hinenggi sabit mene andi re hineisena Tuhan Allah fogerasuogeluk kabogeti logogun, nen andi sambul he yabu ekhe hilingisu fuk.” iluk yagaisasikhe.

Enggen ugu Palhi logolik seni isati logogun mene faget yagaisasikhe wene

⁹ A'nogo yagaisasikhesik wene ekhe yagaisikhi logolik, ”Hit hinenggi attak gandum Enggen Palugun sambul andi nen hundik hinenggi minggu sabiren wena'no.

¹⁰ Wena'luk he hiren hineisena Tuhan Allah legeisogo fikhi logolik, linggene Enggen ugu Palhi logogun oba iluk ebeti logoino. Linggene andi sambul he, hiren yi mene ti mene enggen ugu hinenggimo aga logogin mene higithogo hineisena Tuhan obaget fei waga logoino.

¹¹ Hit hineisena Tuhan Allah elokhoma obalik Aren wenagaisogo fuguba omanogo laluk, hit hinagainafuri inom, hinamingmingengge inom, it afuni Lewi mene inom, afuni hit hinambok mene inom, omalik suarek mene inom, hemi sogwe hit hinawi kota kwe andoma werek mene inom seberogo hinagaiyegeti logoino.

¹² Attak hirogo afuni Mesir mene inamingmingengge higit welagagip aple a'nogo hinonggot agep hanogore, hiren At awene melalek mondogat andi tiphogo fifurogo hilingiti logoino.” iluk yagaisasikhe.

Linggene O Sabu faget ebeti logolik hilingiti logogun wene

¹³ A'nogo yagaisasikhesik ekhe yagaisikhi logolik, ”Hiren gandum enggen lologo kabogetik, anggur amusu perelogo hinatik, hilingiti logolik andi re, Linggene O Sabu faget mene andi hinenggi sabiren logolik kabogeti logoino.

¹⁴ A'nogo kabogeti logolik, hit hinagainafuri inom, hinamingmingengge inom, afuni Lewi mene inom, ap pok mene inom, yenggerugwi suarek mene inom, hemi sogwe mene hit hinawi kota ba werek mene inom, seberogo hinagaiyegeti logogun.

¹⁵ Linggene sabiren andem oba re, hiren hineisena Tuhan Allah legeisogo fikhi logolik, obalik Aren wenagaisogo fagain oba omanogo nen linggene andi ebeti logogun. Hiren, nit nineisena Tuhan Allah nen nineabu hilingiti lago mene omanogo fanot figik, ninanggweang oba fanot figik, hilingninobagaikhe o, iluk hinagaiyegeti logoino.

¹⁶ Hit afuni Israel mene nen ap mene nek mondogat he tahun misik hinenggi henagan oba obalik At hineisena Tuhan Allah nen wenagaisogo fikheba omanogo At ebe fogerasugun iluk waga logogun. Waga logogun mene andi re, ekhe Linggene Paskah faget a'nogo ebetu sambul, ekhe Linggene Enggen Palek a'nogo ebetu sambul, nen ekhe re Linggene O Sabu a'nogo faget ebetu sambul waga logolik, ap inebe lombogen obaget fugu mene iluk,

¹⁷ At hineisena Tuhan Allah nen wokhisagain mene higithogo nen hiren hinendawinggenma nen hilingisugun anggaluk waluk waga logogun.” iluk yagaisasikhe.

Wene heirogo palhi logogun mene faget yagaisasikhe wene

¹⁸ A'nogo yagaisasikhesik at Musa nen ekhe inom yagaisikhi logolik, ”Hit hinaiba o kota ebe lombok At hineisena Tuhan Allah nen wokhisikheba andoma afuni wene heirogo pilingiti logouwageluk it ap wene katokhogo palharek inap inom, fena yabu amu mene faget hilingitarek inap inom menfisogoin.

¹⁹ A'nogo menfisamo, iren we inendawimo nen anggaluk enek wene tegetik, fena fikhit inebepikhit aga logolik fena fikhit weaget fisigik hilingiti logogun lek. Afuni nen inenggi a'makwe helaluk nenggarek mene andi re ineilenggen puget fisagare'ma re, ap inendawinggen wenggelek mene inom, wene higithogo agarek mene inom oba nen ogo re, a'nogo heluguba wene heirogo palhi'legengge inenggi a'makwe helikhi logogun andi elo'lek.

²⁰ Hit hineisena Tuhan Allah nen o kweang wokhisikheba andoma hinaiba fanoma andoma femhogo logoubagaigen he hiren higithogo nek hilingiti logoino.

²¹ Hiren hineisena Tuhan Allah obaget warogo nolhuba iluk obalik wuti logolik halok he, hinagaisa Asyera faget e mene menogo fuluk inanggembu ilirenggerek mene andire era'lu horokhogo andoma fou fuk.

²² Nen At hineisena Tuhan Allah nen he a'nogo hilingitu mene andi faget he endawimo abit anggili'lagoma re, hiren kembu fogeratuba iluk ekhe e meneba menogo fogoin lek.