ULANGAN 15 - Allah Wene Fano Wene Hupla Inane

Tahun sabit meneba hilingiti logogun mene faget yagaisasikhe wene

¹ A'nogo yagaisasikhesik ekhe yi'nogo yagaisasikhe, ”Tahun sabit meneba wurep kobokhogo re hiren inoba palegengge werek mene omanogo mondogat leget fisikhi logogun.

² Inoba palegengge andi faget fisikhi logolik hilingiti logogun mene re yi'nogo: It afuni Israel mene ekhe nen it inagaila'lak Israel mene ekhe inoba inauang hobuk nekhengge wo'ne'nogen iluk wogisaluk halok he, At nineisena Tuhan nen ane tekhogo ikhi logolik he palegengge andi re leget fogoin iluk ikhemo re, hiren wo'nisani iluk hinane ninghogo yagaisa fuk, we lek hilingisogo herakfogoin fano.

³ Hiren it afuni pok mene inoba hobuk wo'ne'nogen iluk wogisambik halok enek he nekhengge nombalegegge wo'nom iluk yagaisogoin fanoba nen he, it inagaila'lak hit hinunggulenu mene inoba halok enek he a'nogo yagaisa fuk.

⁴ Hit hineisena Tuhan Allah nen o kweang wokhisagain oba andoma kwi lamo hinoba fanot hinobagagunem he, afuni hit mene hinanggele'ma nen ap inenggi lek mene ekhe logogun mondok lek,

⁵ oba nen he hiren At hineisena Tuhan Allah ane hologo hilingitik, an nen yi'nogo hilingi'no ti'nogo hilingi'no iluk yogondak wene yagahisikhi lagi mene yi mondok ibi-eberogo futfuluk hilingitu halok enek he a'nogo hinobagakhi logogin.

⁶ At hineisena Tuhan Allah nen fanot hinobagakhi logogin iluk abok wene yagahisikhe hakhogo re fanot hinobagagunem, hiren hinauang hokhorogo afuni inunggulenu amu mene inoba palegengge hakhogo wogisikhi logogun oba nen he, hiren it inoba palegengge hakhogo ekhe wo'nisani iluk ikhi logogun lek. Afuni inunggulenu hokhorogo hit hinawea'ma logogun oba nen he, hit afuni amu mene inawea'ma ekhe logogun lek.

⁷ Hit hinebe o kweang At hineisena Tuhan Allah nen wokhisagain oba omanogo mondo'ma kwi lambik logolik, o kota misik oba omanogo nen ap hit hinunggulenu mene ekhe enggi lek elagaik mene werek halok he, hiren hinonggwarek faget enek leget fakhikhi logolik at a'nogo kwelakhigi'legengge hinobakhe nigik hilingitep hanogo,

⁸ athe hiren hinendawi fano a'luk aren, an hobuk oak wokhesigin iluk kino igin mene aremnogo higithogo wogosugun fano.

⁹ Hiren wenggelu weak mene andi hinendawimo kumo tahun oak wogisagarek oba a'nogo arat horok agama iluk ombalegengge a'nogo oak wogetu aple herak fisogoin andi re fuk. Hiren ap a'nogo ombalegengge wo'nom iluk kino ikhe mene wogosugun lek halok he ap andi nen hineisena Tuhan oba a'nogo hilingita iluk eluet foumo, hit afuni yi kwanirogo hilingitarek mene iluk anggogoin andi re weak.

¹⁰ Hiren ap a'nogoba hinendawi fano nen wogosigin fano anggaluk wogetu halok he, At hineisena Tuhan Allah nen hiren yi yabu ti yabu hilingitunem fanot hinobagakhi logogin.

¹¹ Hit afuni Israel mene hinanggele'ma re, afuni inenggi lek inelagaik mene it ekhe nen lebetnisoageluk hinoba lagu halok he, an nen hit hinendawinggen sakhorek oba leberisikhi logobagaigeluk melalhinafi o.” iluk yagaisasikhe.

Afuni inamingmingengge mene inoba hilingfisikhi logogun wene

¹² A'nogo yagaisasikhesik ekhe yagaisikhi logolik, ”Afuni Israel mene nen ekhe aben ogo helime nen ogo, an inamingmingengge logogin iluk hit hinoba ebe onggo palhikhe halok, at andi ebe tahun falfaligen andem he hat heabu hilingitu logogin, oba nen he tahun sabit mene halok he lologo wulak fisano.

¹³ At hinamingmingengge lologo wulak fisogoin mene a'nogo we enggimo legengge loageluk obogisikhi logogun lek.

¹⁴ We hinendawinggen sakhorek oba hineisena Tuhan Allah nen hit wokhisikherek mene, kambing, domba, halok ogo, anggur, gandum halok ogo ekhe wogo'no.

¹⁵ Hit ogore attak o Mesir afuni inamingmingengge were'ma nen At hineisena Tuhan Allah nen lologo wulak hinobagai wagaikhe a'nogo ebet hano. Andiba re an nen wene melalek yi hit hinoba yagahisikhi lagi.

¹⁶ Oba nen he at hinamingmingengge a'nogo hat inom, hat heisok erokwe mene inom inendawi hundik anggikhi logolik lagu aple abiren hinom logogin anggugu halok he,

¹⁷ at a'nogo waluk o solombonma wulipluk he esanggo mangge wat foumo, at ebe hit hinamingmingengge mondo'ma hinom logogin. Andi higithogo hinamingmingengge helime mene halok ogo a'nogo hilingfisikhi logogun.

¹⁸ Nen hiren hinamingmingengge misik lologo wulak fisikhi logolik halok he aren hit faget yabu engginhogo tahun falfaligen hinom logolik onggo we minggilogo nek wogetu kwelek hilingiti laga, athe it ap gaji lego mene inom he higitsek lek, we aren yabu hokhorogo hilingiti laga andi nen hinendawinggen weak asu fuk. Wene melalek yi tiphogo hilingiti logogun halok he, At hineisena Tuhan Allah nen hinoba fanot hinobagakhi logogin o.” iluk yagaisasikhe.

Wam sapi, domba, kambing eak attak ta'lagunem hilingiti logogun wene

¹⁹ Andi isikhesik hobuk yagaisikhi logolik, ”Wam sapi, domba, kambing, eak ai mene attak-attak tatu mene andi re At hineisena Tuhan Allah obaget fikhi logoino. Wam sapi re yabu hilingisuageluk oroa'ma kweang habulherek mene heleba perelogo homakfuluk hilingitarek mene a'nogo re hilingisu fuk, nen domba andi ogo esi palu fugat.

²⁰ Yi tahun ti tahun hundik-hundik he hit inom hit hinagainafuri inom, wam andi eino At hineisena Tuhan Allah nen obalik wenagaisogo fikheba omanogo nen ninggi logogin fano.

²¹ Andiba nen he wam a'nogo ambi agap palek logolik, eisok holurogo, eil humunogo, athe agapma amu mene ekhe hokhorogo hilingik halok he, wam andi At hineisena Tuhan Allah faget iluk waluk fei waga logogun lek.

²² No rusa inom kijang inom hit hinailoba nen ninggi lagep hakhogo afuni emerek mene inom, emerek lek mene inom andoma hiren ninggi logogun fano.

²³ Amep enek he ninggi logogun lek, oba nen he i hakhogo kweangma kweisal isikhi logogun fano.” iluk yagaisasikhe.