ULANGAN 14 - Allah Wene Fano Wene Hupla Inane

Tahun sabit meneba inoba palegengge werek mene faget hilingiti logogun wene

¹ Ekhe yagaisikhi logolik, ”Hit he hineisena Tuhan Allah againafuri welagep. A'nogo fong wati logolik halok he afuni wa'lagunem iren fong wati logolik, afuni inuggulenu amu mene nen hilingitarek hakhogo hinagap oba ekhe palfigik, hinesi hinelokhe fikhit hogologo palhik, hilingiti logogun mondok lego.

² Hit he hineisena Tuhan Allah onggwarek angge mene hilingik welagep. Nen afuni inunggulenu lombok o kweangma welagaikharek mene oma nen he At Allah nen hit enek he, At againafuri asuageluk penogo hinobagaikhe o.” iluk yagaisasikhe.

Paik sue, yi mene ti mene nenggarek mene inom, nenggarek lek mene inom faget yagaisasikhe wene

³ A'nogo yagaisasikhesik ekhe yagaisikhi logolik, ”Hineisena Tuhan Allah nen yi re wesa mene iluk yagaisugu kwelek he na fugo.

⁴ Nen hiren hinanggo ninggi logogun mene enu re yi: sapi, domba, kambing,

⁵ rusa inom, domba kambing maro mene inom, wam enu kijang inom,

⁶ yi wam ti wam eisok a'lip pelangsek mene inom, nunggu mene engga mene luk hemelogo ninggerek mene inom andi nek he ninggi logogun.

⁷ Hit he yi mene ti mene eisok segelet pelangsek lek mene inom, nunggu mene luk hemelogo ninggerek lek mene inom ninggi logogun lek. Unta inom, kelinci inom, paik marmot inom, paik andem he nunggungge nalugen luk hemelogo ninggerek meneba nen he eisok a'lip pelangsek le'mare saliogengge mene logogin.

⁸ Wam he ninggi logogun lek. Wam eisok a'lip pelangsek oba nen he nunggu mene luk hemelogo ninggerek lek hilingi'more ninggi logogun lek. Ebe ogo ninggi logogun legat, warek filiba ogo senhogoin legat.

⁹ Hiren ikan amurul werek mene inom, afunggu werek mene inom andoma ninggi logogun fano.

¹⁰ Yi mene ti mene iba welagarek oba nen amurul inom, afunggu inom lek halok he wesa mene hilingi'mo ninggi logou fuk.

¹¹ Yi rue ti rue wesa werek lek mene halok he hit ninggi logogun.

^12-18 Oba nen he sue fena ninggi logogun mene lek enu re yi: Sue rajawali inom, siomayo inom, sue findi-findi hak mene amu-amu arue inom, sue nasar inom, sue gagak inom, sue unta inom, camar inom, blekok inom, sue walu enu amu-amu mene inom, sue undan inom, kasa inom, kundik inom andoma re ninggi logogun mondok lek.

¹⁹ Eluk-elugengge ogolabi werek mene andi re wesa mene hilingi'mo ninggi logogun lek.

²⁰ Yi mene ti mene ogolabi wulibik mene andoma re wesa lek mene hilingi'more ninggi logogun fano.

²¹ Hit he At hineisena Tuhan Allah obaget mondok horek mene welagepma re, sue, paik yi mene ti mene amu wa'lagu mene andi re hit ninggi logogun lek, oba nen he it ap pok mene hit hinaggelekwe werek mene noageluk wogisigik, nen it pok mene inoba onggo hunirigik ikhi logogun fano. Wam domba eak halok inom kambing eak halok inom he onggwarek agaisa eilak amusu meneba isati logogun mondok lek,” iluk yagaisasikhe.

Sepuluh mene Tuhan faget fikhi logogun wene

²² A'nogo yagaisasikhesik, ekhe yagaisikhi logolik,” Yi tahun ti tahun hundik-hundik hit hinanggweang oba nen enggen ikhinaferek mene a'nogo sogo mene hit aga logolik nomolo mene halok he enogo fikhi logogun.

²³ A'nogo fuluk At hineisena Tuhan Allah elokhoma obalik At obaget fuguba iluk tegelogo fagarek oba omanogo nen hinangge gandum enggen inom, anggur amusu inom, zaitun amusu inom, hinanggo sapi, domba, kambing oba nen eak attak tasigin mene inom, nen nomolo mene iluk enogo fugu mene a'nogo inom ninggi logogun fano. Hiren a'nogo hilingiti logogun oba re hineisena Tuhan Allah esinet fikhi logolik hundik-handik fogerati logoino.

²⁴ Obalik At hineisena Tuhan nen wenagaisogo fuguba andi ambi hit hinaiba nen yathogo hilingi'mo nen, hit hinanggweang oba enggen ugu hineisena Tuhan Allah nen wokhisikhe mene fogoin mene andoma waluk la elo'lek agu halok he,

²⁵ hit hinanggweang oba nen enggen ugu andi fena onggo huni'luk he we uang enek obalik At hineisena Tuhan Allah nen wenagaisogo fikheba andoma waluk laga logoino.

²⁶ Waluk laluk he, andoma nen hinauang a'nogoba hiren ti mene ninamolo hinendawimo anggugu higithogo, sapi, domba, kambing halok ogo, anggur amusu halok ogo, i omame enduk arik weak mene halok ogo, onggo palaluk he, andoma At hineisena Tuhan Allah elokhoma nen hit inom, hinagainafuri inom, seberogo ninggi logolik hinagaiyegeti logogun.

²⁷ It afuni Lewi mene andi re kweang it mene o hit hinawi kota hinanggelekwe andoma ekhe werek legengge a'nogo re, it inoba hinonggot agi'lek eberisikhi logoino.

²⁸ Tahun pire hilingfuluk ekhe henaganek mene ambisangma re, hiren hinanggweang oba nen enggen ugu palhu mene andoma nomolo mene iluk fikhi logogun mene andoma re, hit inawi kota-kota omanogo kabogesi waga logogun.

²⁹ Kabogesi wagunem, nunggu mene andi re it afuni Lewi mene it inanggweang le'ma it faget inom, afuni pok mene faget inom, omalik suarek mene inom, hemi sogwe hit hinawi kota andoma werek mene faget inom fisugunem, iren inendawimo anggikhi logogun higithogo hela waga logogun. Nen hiren a'nogo hilingiti logogun halok he, At hineisena Tuhan Allah nen hiren ekhe mene ekhe mene hilingitunem Aren fanoabet hinobagakhi logogin.” iluk yagaisasikhe.