ULANGAN 13 - Allah Wene Fano Wene Hupla Inane

^1-3 A'nogo yagaisasikhesik ekhe mel yagaisasikhe: ”Ap ekhe Allah ane yagaisikherek mene nen a, athe, abi singgi'lelhogo hikherek mene nen a, hilingisu lek mene elalinat ekhe hilinghisagain iluk, hiren tugwi kembu hinonggot mene amingmingengge hilingla'luk, fogerasuageluk anggikhi logolik yagahisagain mene andi, ebe arat hilinglasigin meneat he, hiren wene andi eberogoat ikhe iluk futfogoin mondok lego. It a'nogo hilingisugun andi re, nineisena Tuhan Allah nen he, An nagainafuri inendawinggen oba nenat An nebe inendawinggen hundik werega, athe inambeba nen ili'lagwi a, iluk hinobabut paligiluk he, it andi inayonggo fugunem a'nogo yagahisogoin andi o.

^4-5 It afuni inobabut mondok weak a'nogo hilingitarek mene andi nen he yi'nogo hilingitarego. Nineisena Tuhan nen, hit hinebe afuni Mesir mene nen inamingmingengge higit fethinarek were'ma, wokhinarek wulibi wagaikhe mene a'nogo, hiren, ninabit iluk kofologo herakfisaluk wulibuageluk lalhinabi'lagwi andi nen he, it inobabut mondok weak a'nogo hilingitarek mene andi legasuageluk inebe mondok inoa'no o. A'nogo meneat he, hit nineisena Tuhan Allah oba lombokhogo logolik, At murok laga logoino. At agaugwerati logolik, Aren, yi'nogo hilingiti logoino, ti'nogo hilingiti logoino, iluk komotninafikhe wene andi, mondogat hologo higithogo hilingiti logolik, Arenek fogerati logoino o.

^6-7 A'nogo were'ma, hinerugwi hinagaila'lagen he a, hinagainafuri aben he a, helime yenggerugwi nen he a, hinagagwi hinendawi mene nen he a, afuni ekhe hinom hundik mene nen he a, hinendawimo kagalogo, afuni inaiba horokhogo welagaikharek mene inom, yatma welagaikharek mene inom, it inandugwi kembu fogeratarek mene andi, hit hinonggorat, nen hit hinombawi inonggorat meneat he, hiren ekhe fogerasuageluk hinendawimo kagalhu halok he,

⁸ inane holugun legat. Nen, iren hinendawimo kagalhu kwelek hinafe morogo logogun legat. Nen, it andi inebe hinendawi logolik fethinarek logogun mondok legaro.

^9-10 It hinendawimo a'nogo kagalhi logogun mene andi helep oba mondok pinggiat inoa'no o. Inoati logolik, we, sa nen helep oba attak-attak fugethikhe halok, afuni mondogaren wasuago. It afuni andi nen nineisena Tuhan Allah afuni Mesir mene nen inamingmingengge higit fethinarek were'ma wokhinarek wulibi wagaikhe mene a'nogo herakfisaluk wulibuageluk miminghinabugun andi nen he, inebe herakfisigi'lek inoa'no o.

¹¹ A'nogo inoasumo re, afuni Israel mene mondogat inesanggo holimbik he, inailo a'luk, it ekhe nen weak mondok a'nogo hilingiti'lek logogun o,” iluk yagaisasikhe.

¹² Hobuk hit ambi o kweang At nineisena Tuhan Allah nen wokhisagain oba omanogo logolik holhugunemen,

¹³ afuni hit hinunggulenu mene kwanirogo hilingitarek mene omanogo nen, afuni o kota werek mene omanogo inoba allah amu mene ap-ap hilingisogo fuluk fogeratarek mene omanogo hiren ogo mondok hinonggorat mene a'nogo oba fogerasuageluk yagahisogoin aro.

¹⁴ A'nogo ugunem inane nen iluk waluk ugu mene holhaluk he ero mondok fanorogo pilingi'no. Pilingitunemen ambi kwanirek mene andi ebe aga halok,

¹⁵ afuni o kota sili andiba werek mene inebe inom, inanggo inom mondogat inoa'no. Nen it inawi sili andoma mondogat inom pin tagalogo fisano.

¹⁶ Afuni andoma inangge yi mene ti mene andoma mondogat he o kota silimo kaboget fisano. Kaboget fembik he, o kota inom, inangge yi mene ti mene inom mondogat he At Tuhan Allah faget warogo noletu mene hilingfuluk nole'no. A'nogo hilingfuluk abirengge andi re, o andi ulun folukhogo hilingfoumo logogin, nen olun andiba it ekhe hobuk wusugun legat.

¹⁷ Yi mene ti mene mondok homan oba werek mene andi re, hit hinonggwarek faget iluk ogo ekhe fakhogoin mondok lego, abirengge mondok pin tagalogo fisamo, At Tuhan a'mage hit hinoba logogin mene a'nogo leget fikhi logolik hit hinoba endawi hundik hilinghinafik, endawi sakhorek oba hilinghinafik, Aren hit hinombawi inunggulenu hokhot fisikhi logolik fanot fisasikhe hakhogo, hirogo a'nogoat hilinghinabigin.

¹⁸ A'nogo hilinghinabigin oba nen he, hiren an nen wene melalek yogondak yagahisigi mene yiba hologo hilingitik, At endawimo anggugu mene nek hilingitik, hilingitu halok enek he a'nogo hilinghinabigin,” iluk yagaisasikhe.