ULANGAN 1 - Allah Wene Fano Wene Hupla Inane

Wene ebe oan yagaisigi'lek logolik attak-attak lisu palhikhe wene

¹ Wene palek yi mondogat he, at Musa nen afuni Israel mene inom o leimo afuni le'ma o Yordan tonggwe andoma logolik yagaisasikhe mene lisu palek werek. O tonggwe andi re, i Yordan abel o mo liabi wagarek higit kota Paran liakhigik, nen kota Tofel inom, Laban inom, Hazerot inom, Di-Zahab inom, pelakhigik, tulem kota Suf horokhogo andoma.

² (O tom Sinaiba andoma nen he, o Kades-Barnea wesuogoluk o Edom kwe nen waga logolik he inenggi 11 nen nogo ilik wagaikharek.)

³ It afuni Israel mene o Mesir en wulibi wagaukwasik oba nen tahun 40 ba, tugi it inenggi wenati logolik 11 mene wenatarek oba, tanggal satu ba re, at Musa nen nineisena Tuhan en wene, ”Yi'nogo hilingi'no, ti'nogo hilingi'no,” iluk afuni Israel mene yagaisoageluk yagatikhe mene andi mondogat yagaisasikhe.

⁴ A'nogo yagaisasikhe andi re, at Musa nen ap kain enu Sihon, it afuni inunggulenu Amori mene inoe enupogot logolik o kota enu Hesybon welagaikhe mene andi inom, ap kain enu Og, o Basan tonggwe afuni o kota Asytarot mene inom, Edrei mene inom, inoe enupogot logolik ferinarek welagaikhe mene inom, emberegat mabenet fisasikhesik oba nen yagaisasikhe.

⁵ Musa nen wene a'nogo yagaisasikhe andi re, i Yordan abel mo liabi wagarek higit, afuni Moab mene inaiba higit andoma logolik, wene Tuhan nen, ”Yi'nogo hilingi'no, ti'nogo hilingi'no,” iluk komorinafik, yagaisigik, isikhe mene a'nogo eroba nen pilingisogo yagaisageluk isikhe.

⁶ A'nogo ikhi logolik mel yagaisasikhe: ”Nit ninebe tom Sinai awe a'ma were'ma nineisena Tuhan Allah nen mel yaganisasikhe anggigi: Hit o tom awe a'ma yoma hinenggi hokhorogoat welagep.

⁷ Halok, yogondak he, hinawi su mene meisalhigik waluk he, afuni inunggulenu Amori mene inaiba tom oba a'lima inom, o andoma era'lukwe yi awi ti awi mondogat inom, o Yordan tonggwe inom, tomkwe inom, sogoukwe inom, i ambutmo higit inom, Laut Tulem yenggelek esanggokwe inom, lano o. Lambik he, o Kanaan inom, o tom Libanon sebelik-sebelik pikhit i hokho mene Efrat huliba lano o.

⁸ An hineisena Tuhan nen hinombalak Abraham inom, Ishak inom, Yakub inom, yagaisikhi logolik, O andoma mondogat hit inom, hiren taginabugun mene inom wokhisagain, iluk wene arat warisasigimo. Ma re, o andoma sebeli kwino o, iluk yaganisasikhe anggigi,” iluk yagaisasikhe.

At Musa nen it inogogwi wene heirogo palinafu mene menfisasikhe wene

⁹ A'nogo yagaisasikhesik he, at Musa nen it afuni a'nogo yagaisikhi logolik, ”Nit ninebe tom Sinaiba aremnogo, an nen he hit melalhinabuageluk he mondok engginhogo hilingi'mo an namu nen hilingisu elo'lek iluk yagahisasigi a'nogo.

¹⁰ Hit hinebe hineisena Tuhan Allah nen hesagal pogoroba welagarek andoma hakhogo mondok hokho-bokhorogo hinobagasikhe.

¹¹ Hinobagasikhemo re Aren wene abok yagaisasikhe hakhogo hit hinebe sik-pikhogo mangot hinobagagik, hit hinunggulenu mene re hinangge yi mene ti mene mondogat hinenggim werek enek hilinghinafik ikhi logouwak.

¹² Ariginik oba nen he, an namu nen ninggi'nogo hit hinawene werek mene pilingisogo leget fisikhi logou hak?

¹³ Athe an nen hit hinogogwi wene melalhinafu mene menfisagen he hit hinunggulenu tomok en ap mene nek inobabut hebelek mene inom, inendawinggen kagalek mene halok inom, inendawinggen wenggelogo hilingsu hak mene inom, enek we miren hakhogo heragaisogo fisani o.

¹⁴ Iluk yagahisasigimo an nen a'nogo hilingi'ni iluk isigi mene a'nogo hiren fano anggaluk hilingitigip.

¹⁵ Andi oba nen hiren hinogogwi yagahisikhi logouwageluk ap inebe miren mene hakhogo inobabut hebelek mene inom, inendawinggen wenggelogo hilingisu hak mene inom, aremnogo re, it inebe 1.000 nen mene inom, it ekhe 100 nen mene inom, it ekhe 50 nen mene inom, ekhe 10 nen mene inomat inunggulenu lombok faget inogogwi logolik ferinarek logouwageluk menfisasigi. Nen, an nen ogo re, it fena inogogwi kaindek ferinarek logogun mene hinunggulenu mondogat faget menfisasigiat.

¹⁶ A'nogo menfisikhi logolik he, yi'nogo hilingiti: Hit hinangge le'ma nen wene minggil-manggal ari'lago aple andi futfeino. Futfuluk he wene hit-hit hinoba agu mene halok ogo, nen it afuni pok mene hit hinanggelekwe werek mene inoba agu halok ogo, wene heirogo tegeti logoguno, isigi.

¹⁷ Wene tegeti logolik afuni inebe mondogat inoba higithogo nek inawene ayo wurogo tegeti logoino, nen it ekhe fikhit engginhogo hilingfisikhi logolik, it ekhe fikhit serogo hilinginfisa fuk. Nen ap andi sa iluk elokhe penesu fugat, we hiren wene fanorogo ayo wurogo tegesugun mene andi re Allah nen yagahisikhi logogin enggere, hiren ap misik iluk ekhe hinailoti logou fuk. Nen wene andi ambi hiren tegetu aple enggin agu halok he, an nen ayo wurogo tegesuageluk noba waluk waga logogun.

¹⁸ Aremnogo huli nen he, wene hilingiti logogun mene faget iluk inom, hiren yi'nogo ti'nogo hilingiti logogun mene faget inom, mondogat milil-melalhogo yagahisasigi anggigi,” iluk yagaisasikhe.

Ap ineil penesi loageluk o Kades Barnea lakfisasikhe mene faget yagaisasikhe wene

¹⁹ A'nogo yagaisasikhesik ekhe yagaisikhi logolik, ”Andi nen at nineisena Tuhan Allah nen melalninobagaikhe higithogo nit o tom Sinai oba omanogo herakfuluk o lei mondok liare'kwe, kwe mondogat uankwe waga lagagusik, o tom oba it afuni Amori mene werek kwe nen wagagu. Andoma kwe nen waga lagagusik o Kades Barnea huli asi wagagu.

^20-21 Asi wagagusik, an nen yi'nogo yagahisasiigi a'nogo: yogondak he it afuni Amori mene were'ma tomkwe kweang nit nineisena Tuhan Allah nen wo'nisasikheba omanogo asi wago andi. Enggere yethani! Hinelokhoma kweang tonggo mondok liok layok se'ma a'li: Hinendawinggen firogo hinailosu fuk. Athe Tuhan nen yagahisikhe mene higithogo lambik kweang andoma eise asi kwino, iluk yagahisasigi.

²² A'nogo yagahisasigimo nen hiren an nambit wagagipsik yaganeti logolik, niren o Kota andoma ninggi'nogo nen kwi logoin? Nen ebekhe koma kwe nen logoin nogo, iluk attak-attak ineil penesi lambik nit yaganisa wesuagen, ap inebe miren mene hakhogo inayonggo fembik lakfisogoin, iluk yaganetigip.

²³ A'nogo yaganetigipmo hiren isigip mene a'nogo an nen anggasigisik he hit hinunggulenu welagep higithogo misiktek higik ap inebe 12 nen wenaginafigi.

²⁴ Wenaginafigimo iren tomkwe andoma lagaukwasik o Eskol tonggwe andoma huli ineil penerik lagaukwa.

²⁵ Ineil penfuluk it omanogo nekhengge inambotkwe wagaukwasik, nit ninambit waga logolik he, e enggen o andoma nen taganha mene waluk wagaukwasik he, o nineisena Tuhan Allah nen nit wo'nisagain oba andoma obabut hilingik aple faget mondogat muli fano mondok, nen enegengge re yi, iluk yaganisa wagaukwa anggigi.

²⁶ A'nogo yaganisa wagaikha oba nen he, hiren Tuhan nen yi'nogo hilingi'no iluk awene melalek ikhe mene a'nogo sagalogo fesigipsik logoin ninabit iluk hilingitigip.

²⁷ Hiren hinane mul-mul yi'nogo ikhi lagagip. Tuhan nen nit ninoba obaharo fikhi logolik, nit ninebe afuni Amori mene nen ninoasuageluk o Mesir en wo'ninarek wulibi wagasik it inenggiba ninobagai wagama o.

²⁸ Arigini'mo re, nit he nenahalok o andoma logoin ogo? Ap niren o andoma lak fisogo mene omanogo nen aleik kwe lagaisogo ninailo asuageluk yaganisikhi logolik he, afuni o andoma werek mene re nit ninom he higitsek lego, it he inomame mondok hokho logolik, inalong-pinalong inap werego, nen inawi kota inebe welagaikharekwe andoma re inaleget mondok omamerogo wokhigik pogot higithogo liabe'ma re, it inebe ogo re mondok hokhondek inoakhuse yatek-patek were'ma isogo, iluk isukwama hiren he nit he nenahalok o andoma kwi logoin? iluk isigip.

²⁹ A'nogo isigipmo re an nen ikhi logolik, afuni andoma faget hiren hinailo su fugo.

³⁰ O Mesir en inom, o leikwe nen inom, hilingitunem hineilenggen hasigip a'nogo hakhogo hineisena Tuhan Allah nen hit hinobaget nomamerogo hilingiti logolik wokhinarek laga logogin.

³¹ Ap ineisugwi nen inamlogomi inobakhe pukhogo woginafarek hakhogo Tuhan Allah hit hineisena a'nogo nen ebekwe uankwe andoma wagunem hinagap telogo wokhinarek wagaikhesik, o welagoba yoma huli asi wagagip aple a'nogo hiren ogo hineilenggen hasigibat.

³² An nen a'nogo iluk yagahisasigi oba nen ogore hiren hineisena Tuhan Allah oba hinendawinggen himbiret figi'legat welagagip.

³³ Hit hinebe hinawi sabu sale'ma logogiluk he, At ebe hinelokhoma waga laga. Aren hit kwe loageluk hubanggo re endu anggele'ma wokhinarek wagik, linggene re o hena anggulok anggele'ma wokhinarek wagik ikhi laga,” iluk yagaisa-sikhe.

Tuhan nen afuni Israel mene wene inoba fesikhe mene faget yagaisasikhe wene

³⁴ A'nogo yagaisasikhesik ekhe inom yagaisikhi logolik, hiren hinaneba enggin aple nek ugunem at Tuhan esanggo holhikhesik anini hokho mene agaikhesik ane hombuk palogo ikhi logolik,

³⁵ o kweang mondok muli fanoma it afuni yi inombawi inoba wokhisagain iluk abok yagaisasigiba andi re, it afuni mondok inanini weak mene yi re, ap we misik iluk ogo ekhe kwi logoin mondok lego.

³⁶ We hun Yefune amlogo Kalep enek he, an naiba nane holfuluk higithogo nek hilingiti laga andi nen arenek he kwi lagain. Nen at Kalep inom ap eisok erokwe inom enek he, kweang ineil penerik lagaukwa kwe andi wogisagain o, isikhe.

³⁷ Nen hiren hilingik oba nen, Tuhan anini an noba fikhesik an yaganeti logolik, ’Musa hat he, it hinom o andoma kwi lagain lego.’

³⁸ Oba nen he hat lebethabi'lago mene hun Nun amlogo Yosua andi nen enek he, afuni Israel mene yi woginarek kweang andiba kwi lagain enggere, endawinggen hambuget feino,’ iluk yaganetikhe.

³⁹ Andi nen at Tuhan nen nit ninebe mondogat ninoba yaganisikhi logolik, ’Hit hinagainafuri inebe yenggerek logolik weak fano penesu elo'lek anggikhi lagep mene inom, nen it faget hiren anggikhi logolik, it he nit ninaselei mene nen tela hak anggikhi lagep mene andi inom, it andi inobaat An nen kweang andi wogisamo iren helambik eise asimbik logogun.

⁴⁰ Oba nen hirenek he, o leimo nekhengge ebekwe i Teluk Akaba unggut hilingisi weri'lago kwe andi nen lani,’ iluk yaganisasikhe.

⁴¹ A'nogo yaganisasikhemo, hiren ikhi logolik, ’Musa, nit he mondogat weak hilingito, oba nen he, yogondak nineisena Tuhan Allah nen yaganisasikhe higithogo weim yabi kugun,’ iluk isigipsik hiren anggikhi logolik o tomkwe weim yabi kugun andi re, we serogo yabugun iluk anggasigipsik, hit hinebe lombogen fik-foukhogo hilingitigip a'nogo.

⁴² Oba nen he Tuhan nen an yaganeti logolik, ’An it ninom logogin le'ma re, it inaselei mene nen mabenet fisanogore it inamunek weim yabi loageluk haren obogerisa fuk,’ iluk yaganetikhe.

⁴³ Yaganetikhemo Tuhan nen an yaganetikhe higithogo yagahisasigi oba nen he, hiren nane hol fesigip lek andi. Holfesigip le'ma Tuhan awene melalek a'nogo sagalogo herak fisaluk hinawonok oba o tom oba lagagip a'nogo.

⁴⁴ A'nogo lagagipmo it afuni Amori mene o tomkwe andoma welagaikharek inap wulibi laga logolik hit hinom weim yafigip. It inebe esa re kin awi meisalfugunem wulibi wagarek hakhogo hilingik logolik, iren hit mukhinarek o Horma horokhogo huli hinobagai wagaukwasik, it o Edom mene were'ma tom oba omanogo nen hit mabenet hinobagasukwa.

⁴⁵ A'nogo mabenet hinobagasukwama, hit hinambotkwe wagagipsik he Tuhan oba nit lebetnisano iluk yaganetigip oba nen he, Aren hit fut hinobagagik hinane esanggo holhik hilingitikhe lek a'nogo,” iluk yagaisasikhe.

Tahun hokhorogo it o leimo welagaukwa mene faget tindelogo yagaisasikhe wene

⁴⁶ A'nogo yagaisasikhesik he ekhe yagaisikhi logolik, ”A'nogo hilingitigip andiba nit o Kades aninurogo welago andi.