TITUS 3 - Allah Wene Fano Wene Hupla Inane

”Allah againafuri inobabut higithogo hilingiti logouwageluk, komorinafi logoino,” iluk yagatikhe wene

¹ Allah againafuri haren ferinarek welagen mene andoma nen, inogogwi pemerintah mene kaindek inawe a'ma were'ma, iren yi mene ti mene higithogo hilingisuageluk ugunem, ”Io,” iluk inane hologo hilingiti logouwageluk komorinafi logoino.

² It Allah againafuri andi nen he, afuni ekhe inabok weak palhi'legat, inane puk weak wenagisigi'legat, it ekhe nen inobabut enegat futfisoageluk afuni mondogat faget inobabut enago liokhogoat hilingiti logouwageluk komorinafi logoinoaro.

³ It a'nogo hilingiti logogun andi re, nit attak ninendawinggen lek ninobabut kembu hak, komore'legat nong-honghogo hilingiti logolik he, afuni inogogwi kaindek inawe a'ma welagaikharek hak, inoba aigage lagagik, inendawimo nen yi mene ti mene ninamolo anggigik, agarek andi mene awe a'ma hak welagagu. A'nogo logolik, it ekhe weagerinafik, wene palhik, it ekhe nit inabiretninobagagik, niren it ninabiret fisigik, ikhi lagagu.

⁴ A'nogo ikhi lagagu meneat he, at Allah nen ninebe telninaferek mene a'nogo obabut fano nen, nit afuni endawitninafikhe mene andi enegat weinam agaikhemo ebe futfesugu andi.

⁵ A'nogo weinam agaikhesik, Allah Areagun en ninendawimo sobalogo ninebe ket mene ta'ninafik, ninobabut hunogoat hilingninafik, isikhe andi re, nit ninonggwaregen ninobabut higithogo hilingiti lagaguba hilingninafikhe fuk. We, ninebe arenat endawitninafikhesik telninafikhe andi.

⁶ Allah nen Areagun wo'nisasikhe andi ebe re, Yesus Kristus ninebe telninaferek mene a'nogo nenat hokhorogo ninoba pelakfei wagaikhe andi.

⁷ At Yesus obabut fano nen wene ninoba mene korogo wokhaluk, Allah ninom ninambotkwe hunogo ninobagasikhemo, nit ninendawimo nen he, ”Nineluk mondok logoguno,” iluk anggikhi lago andi higithogo eiseweregat asuageluk Allah Areagun wo'nisasikhe iluk,

⁸ igi andi eberogo aro. Haren it ekhe inendawinggen Allah oba himbirik werek mene nen, afuni ekhe faget fanorogo leberisagarek andi mene esinet fuluk anggilukhogo hilingiti logoumo, afuni mondogat faget fano mondok, iluk, a'nogo hilingiti logouwageluk, ninghogo komorinafi logoinogeluk, an nendawimo anggigi mene yagaheti andi.

⁹ Mene re, afuni inendawinggen legen wene palharek andi inom, inebe ta'larik wagaukwa mene eroba nen pilingitarek andi inom, Allah nen komotninafikhe wene a'nogo faget, wene palharesik afuni inom weak agaikharek andi inom, mondogat andiba fano asigin le'ma, we, tulemat ili'lagwi iluk, haren herakfisikhi logoino.

¹⁰ It ekhe nen, Allah againafuri mene it-it inom weak asuageluk, hilingiri'lagwi mene andi, attak komorinabimbik he, hobuk komorinabino aro. A'nogo komorinabigin mene, inesanggo holugun lek halok, hinom hundik logou fugo.

¹¹ It afuni inobabut a'nogo hilingiri'lagwi mene andi re, afuni kwe nong agaikharek hak, nong akhaluk inobabut weak hilingiri'lagwi andiba, haren, ”Inonggwaregen wene inoba fakhili'lagwi,” iluk inobabut enegat palhi lagen andi.

Wene wurep kobokhogo, ”Yi'nogo hilingi'no,” iluk yagaisigik, hai warinafik, isikhe wene

¹² An o weak werek kwelek, o Nikopolis andoma wesimbik logogin iluk, nendawimo anggigi andi nen, at Aretemas he a, Tikhikus he a, hoba lakfei wagi halok, hat hebe weak-weagat noba wesigeluk homamerogo walhikhi logoino.

¹³ Nen, at Zenas wene Allah nen komotninafikhe wene a'nogo mondok elu mene a'nogo inom, Apolos inom, it inangge yi mene ti mene ebe khalem lagunem legasinogoluk helaluk loagen haren ekhe wogisambik lakfisano.

¹⁴ Afuni nit Allah againafuri mene ekhe, e enggen fano mene iti'lek welagarek hak, it andi fano mene eise agi'lek tulemat alemarogo logoinogo iluk, it ekhe yi mene ti mene legen nong a'luk were'ma, it inonggwarek fano hilingiti logolik leberisikhi logouwogeluk, andi mene esinet fuluk yanggulhi logouwago.

¹⁵ It Allah againafuri an ninom yoma welagorek mene inebe mondogaren hai wathafa o. Nen, haren he, Allah againafuri inendawinggen at oba eberogoat himbiret fuluk, ninebe inendawi mene andoma, ”Paulus nen hai wathinafe,” iluk, yagaisano aro. Allah obabut fano a'nogo nen hit mondogat fethinarek logouwago.