TITUS 2 - Allah Wene Fano Wene Hupla Inane

Inaluendek inom, alage inom, inamingmingengge inom, ”Inobabut yi'nogo hilingiti logouwageluk, komorinafi logoino,” iluk yagatikhe wene

¹ It a'nogo werek meneat he, hat he, wene fanotninabi'logo wene andiat yagaisikhi logou higithogoat yagaisikhi logoino.

² It ap inaluendek mene andi, weak hilingisuageluk inendawimo kagali wagunem, tok wokhagarek hak wokhigik, inobabut he, inoba haro welagik, inendawimo menenei uanhogo ebetik, inendawinggen wurikhogo Allah oba himbiret fuluk, afuni ekhe inendawirogo welagik, yi mene ti mene faget inoba enggin hikhi logolik, inafe morogo welagik, ikhi logouwageluk komorinafi logoino.

³ Andi hagat he, it hemi inaluendek mene andi, afuni Allah awe a'ma logolik, inobabut higithogo hilingitarek hak, hilingiti logolik, afuni ekhe inabok weak palhi'legat, inogogwi kaindek inawe a'ma welagaikharek hak, i anggur enggen amusu amingmingengge hak logolik, inabit agi'lek nenggarek a'nogo ninggi'legat logolik, iren it ekhe fanorogo hilingiti logogun mene faget, yagaisikhi logouwageluk komorinafi logoino aro.

^4-5 A'nogo yagaisugunem, it afuni ekhe nen, wene Allah nen yaganisasikhe wene a'nogo abok weak ikhi logoinogo iluk, iren he, hemi tugum mene andi nen inaguni inom, ineagwi inom, inendawirogo logolik, inendawimo menenei uanhogo ebetik, ineil lomborogo welagik, oloba mene yi mene ti mene higithogo tegelogo hilingitik, inaguni inane hologo welagik, ikhi logouwageluk, yagaisikhi logouwagen he, komorinafi logoino aro.

⁶ Andi hagat he, it ap alage mene andi nen, yi mene ti mene faget inendawimo menenei uanhogo ebeti logouwageluk komorinafi logoino aro.

⁷ A'nogo komorinafunem, iren, hat hobabut wanhi logouwagen, yi mene ti mene faget hilingiti logolik hobabut higithogo hilingiti logoino. A'nogo hilingiti logolik, ”Wene yi esin mene,” iluk, higithogo eberogo wene nek yagaisikhi logoino.

⁸ A'nogo yagaisugunem, it ekhe wene andi inabit mene nen, ”It weak hilingita,” iluk, wene nit ninoba le'maat ugunem, inenggali asuageluk, ebe wene fanotninaferek wene a'nogo, weak ugun lek mene andiat, yagaisikhi logoino.

⁹ It inamingmingengge mene andi, inogogwi kaindegen yi mene ti mene faget ugunem, inendawimo fanorogo, inane onggo igi'lek inane hologoat hilingiti logolik,

¹⁰ inagarek mene yogot wanhi logogun lek. We, inobabut enegat futfisoageluk, yi mene ti mene faget humbunhogo higithogo hilingitunem, it afuni ekhe nen Allah telninaferek mene a'nogo abok ikhi logolik, ”At ane yaganisili'lagwi andi fano,” iluk, ikhi logouwageluk, inobabut a'nogo hilingiti logogun.

¹¹ It mondogaren a'nogo hilingiti logogun andi re, Allah obabut fano nen yi afuni ti afuni mondogat telinabigeluk ili'logo mene andi obabut enegat weinamet fesikhemo werek andi nen aro.

¹² Nit ninobabut attak Allah ebe ninobakhe nene herakfisikhi logolik he, ninendawimo nen yi mene ti mene kweangma mene namolo nek anggikhi lagagu mene andi herakfisaluk he, yogondak ya ninobabut ninendawimo menenei uanhogo ebeti logolik Allah faget higithogo hilingiti logouwageluk, at obabut fano andiba yaganisili'logo andi.

¹³ Nit yogondak he, ninoe Enupogot Yesus Kristus telninafikhe mene a'nogo inom nineisena Allah Ebe Hokho mene a'nogo inom afuni nen fogeratu kwelek, weinamhogo fanotninabi wesigin andi faget, ninendawimo ninagaiyek anggikhi logolik ebe nenangorogo welago.

¹⁴ Nit attak Allah ane herakfisaluk yi weak ti weak hilingiti lagagu andi nen ninenggi hele warek hak fetninarek were'ma, at Yesus Kristus nen he, ”It inebe an nonggwarek nagainafuri asimbik he, inobabut fano mene anggilukhogo hilingiti logouwagen, inebe hele fikhalogo inonggo paligeluk, an nebe wa'lasigin,” iluk isikhe.

¹⁵ Haren wene andiat yagaisugunem, it ekhe inendawimo nen sebelhobagainogo nen he, hane ninghogoat inendawimo kagalogo komorinafi logoino.