TITUS 1 - Allah Wene Fano Wene Hupla Inane

Hai watikhe wene

¹ Titus namlogo e. An Paulus, Allah amingmingengge logolik, afuni aren wenaginafikhe mene inendawinggen at oba himbiret fuluk were'ma ago warinafik, nen, nit at awe a'ma logolik ebe wene yagaisikhi lago wene a'nogo furogo inelu asuageluk yagaisigik, uageluk Yesus Kristus nen nayonggo fesikhesik laknobagai wagaikhe mene a'nogo nen, wene yi lisu palogo hoba lakfei wagi andi.

² At Allah nen, yi mene ti mene oan elalhi'lek logolik, nit afuni faget mel isikhe: ”Afuni an nen elalinabimbik he, inebe ineluk mondok logouwageluk, fano hilinginabigin,” iluk, abok isikhe andi, ”Eranen ikherek lek,” iluk ninendawimo eberek logolik, ebe wene yagaisikhi lago andi.

³ Yogondak wene andi weinam asigin higithogoat weinam asuageluk, at Allah telninaferek mene a'nogo nen, ”Haren wene andi afuni yagaisikhi logoino,” iluk, nayonggo fesikhesik, noba fesikhe andiba ebe weinam ari'logo andi.

⁴ Titus namlogo e. Hendawinggen nit ninom higithogoat Allah oba himbiret fuluk welagen andiba, an nonggwarek namlogo harat agagin andi. Nineisena Allah inom, ninoe Kristus Yesus telninaferek mene inom, emberek inobabut fano a'nogo nen, fano mene wokhetik, hendawinggen hambugethafik, ikhi logouwago.

Afuni Allah againafuri ekhe kwelaginarek logouwageluk, inobabut palogo nen menfisogoin iluk yagatikhe wene

⁵ An nen hat o Kreta andoma hobagaluk wesigeluk ikhi logolik, wene yi'nogo hilingiti logoino, iluk hoba fesigi andi: ”Yi wene ti wene oan hilingiti'lek mene, halogo figik, o yi awi ti awi andoma afuni Allah againafuri ekhe kwelaginarek logouwageluk inogogwi lombok menfisigik, ikhi logoino,” iluk, yagahe'luk wagagi andi.

⁶ Afuni Allah againafuri ekhe kwelaginarek logouwageluk menfisogoin andi re, inobabut he, yi hangge mene menfisogoin. Afuni ekhe nen, ”At weak,” iluk wene oba fili'lagwi lek mene halok, agwe misigat waganek mene halok, againafuri inendawinggen Allah oba himbirik welagaikharek mene halok, it ekhe nen ikhi logolik, ”Ap yi againafuri komorinabi'logo lek hesanggeat hilingiri'lagwi andi ninabit,” iluk, abok pali'lagwi lek mene halok, menfisogoino.

⁷ Ap Allah againafuri ekhe kwelaginarek logolik he, Allah fagerat hilingiti logogin andi nen he, it ekhe nen wene oba fili'lagwi lek mene halok, menfisogoino. Aren he: ”It ekhe ugunem weak. An igi nek he, fano,” iluk, ikherek lek mene halok, a'mage horok eberi'logo lek mene halok, i anggur amusu ninggerek lek mene halok, obabut lagaksek welagarek lek mene halok, ”Uang yi mene ti mene an enek noba logoilep,” iluk, anggikherek lek mene halok,

⁸ ap pok inonggot mene wagunem aiba fanorogo woginaferek mene halok, fano hilingitarek andi mene nek amolo anggikherek mene halok, endawimo nen menenei uanhogo eberi'logo mene halok, obabut higithogo hilingiterek mene halok, ebe Allah faget tegelek welagarek mene halok, onggwaregen komorogo welagarek mene halok, menfisogoin o.

⁹ Wene afuni fanorinaferek wene yagaisikhi logolik fanorogo komorinafik, aren ebe wene ugunem, it ekhe nen, at ane sebelogo fugunem, aren inane elok sebelogo fisigik, elogat ikhi logouwageluk, wene niren yagatugumo eberogoat iluk wanhikhesik, obabut higithogoat ninghogo fisogo welagarek mene halok menfisogoin o.

¹⁰ It afuni ekhe hokhorogoat ebe wene hologo higithogo hilingiti'lek hilingiri'lagwi andi. A'nogo hilingiri'lagwi andi, inebe hokhokwe re, it Yahudi inagap inenggalimo mene palek mene, fano wene wanhukwasigenat he, hobuk ebe wene le'maat, we, tulemat afuni inawene mene ikhi logolik, it ekhe lalinabi'lagwi andi.

¹¹ A'nogo lalinafi logolik, yi mene ti mene inonggwaregen hunirogoin lek mene hunirouwogeluk yagaisogoin lek meneat yagaisikhi logolik, afuni hokhorogoat inagainafuri inomat lalinabi'lagwi andi, it inane andi sebelogo legetfisano.

¹² Ap o Kreta awi eisewerek mene misik ekhe endawinggen kagalek logolik wene yagaisikhi lagaikhe mene nen, wene mel isikhe: ”It afuni o Kreta mene yoma inobabut he, ineranen mondok ikhi logolik, wam maro mene obabut hangge. Yabu wanhi'lek logolik, an enek nele yi!”

¹³ iluk, at ane eberogoat isikhe. Andi nen, it andi inendawinggen Allah oba fanorogo himbirik logou hagat logouwageluk ninghogo komorinafi logoino.

¹⁴ It afuni Yahudi mene ineranen kagalogo suetninung wene pilingiri'lagwi mene inom, afuni ekhe nen, ebe wene herakfisaluk inendawimo nen kagalogo, ”Yi'nogo hilingiti logogun,” iluk komorinabi'lagwi mene andi inom, wene andi fisogo logoinogo iluk, ninghogoat komorinafi logoino.

¹⁵ Allah nen afuni ekhe inendawimo fanorinafe mene halok, it faget, yi mene ti mene wesa lek. Fano nego. A'nogo meneat he, it ekhe inendawinggen Allah oba himbiret figi'lek logolik, inendawimo anggili'lagwi mene inom, eberi'lagwi mene inom, weagat werek andi nen, yi mene ti mene faget fano lek. Weak enego.

¹⁶ It andi nen he, ”An Allah ebe nelu o,” iluk, inane fakhogo ikhi logoligat he, ”Ebe ninonggot,” iluk, u hak, komore'legat, Allah abit mene hilingiti logolik, yi mene ti mene fanorogo hilingisu re, elo'lek werek andi.