RUT 4 - Allah Wene Fano Wene Hupla Inane

Ap Boas nen he Rut ebe wanhikhe wene

¹ At Boas a'nogo o kota kwi louwogeluk lagaikharek oba, leget pa'leget kwe ambe pale'ma, afuni andogotarek oba andoma lagaikhe. Lagaikhesik omanogo hurek were'ma nen he at Boas nen ap andi hun Elimelek werekwe mene a'nogo ebekhalem andoma lagunem hasikhe. Lagunem he Boas nen at a'nogo wolhikhi logolik, mel isikhe: ”Nagailak, hebe ya hu'lasime o,” isikhemo ap a'nogo wagaikhesik aremnogo hu'lasi wagaikhe.

² Andi nen he, at Boas ap o kota andi mene kaindek inebe 10 nen omanogo inom seberogo hu'lasuageluk yagaisasikhe. Yagaisasikhemo lambulhukwama,

³ at Boas nen ap at werekwe mene a'nogo mel yagatikhe: ”He Naomi o Moab en arat ambotkwe wagasik he, agun Elimelekh nit mene a'nogo anggweang mene onggo wanigeluk ili'logo o.

⁴ Ma re, wene andi faget hat helu asuagat anggikhi lagi o. Wene andi faget he, nit nemberegenat ugun welago. A'nogo meneat he, hat Elimelekh lak hinom misigat tago. Nen, an hobuk mene nen tagoma hilingi'mo re, haren kweang andi onggo paligin anggikhi lagen halok he, ap hurek werek mene yoma ineilhanem he, An onggo paligin, iluk fakhogo in o. A'nogo meneat he, habit halok, fakhogoat in o,” iluk yagatikhe. A'nogo yagatikhemo re, ap a'nogo nen he: ”Fano, an nen onggo paligin o,” iluk yagatikhe.

⁵ A'nogo yagatikhemo, at Boas nen he, mel yagatikhe: ”Fano. Kweang andi, he Naomi anggweang mene haren onggo paligin andi. A'nogo meneat he, kweang andi, Naomi eak ap wa'laga mene andi nen tago meneat inanggweang logogin. Andi nen he, he Rut aiba Moab mene Naomi eak agwe sogwe mene andi, harat wanin o,” iluk yagatikhe.

⁶ A'nogo yagatikhemo, at ap a'nogo nen he, ”Halok he, a'nogo hilinglasu ha'ma re, an he elo'lego. Yogondak, an nebe manggusa mene hak esin logolik, kweang andi onggo feigiluk ikhi lagi mene andi herakfisaluk wulibigin o. Kweang andi an nen taginabigin mene eise logogun lek andi nen he, an alomarogo onggo fou ha'ma re, an nabit. Hat onggo palin o,” iluk yagatikhe.

⁷ (It afuni Israel mene welagaukwa andem sambul he, it ekhe nen inangge yi mene ti mene it ekhe inoba onggo wanuogeluk he a? athe awasuogeluk he a, at onggo wanigin mene nen eisok sandal ugu mene nonggologo walugen at onggo paligin mene andi wogoti lagaikhe. Kweang faget, inangge yi mene ti mene faget, onggo wanhik, palhik, ikhi logolik, a'nogo hilingitu halok eberogoat, iluk eise werek aga lagaukwa.)

⁸ A'nogo hilingiti lagaukwa andi nen, at ap a'nogo nen eisok sandal ugu mene enggimo wanhikhesigen he, ”Harenat onggo palin o,” iluk Boas wogetikhe.

⁹ A'nogo wogotikhemo, at Boas nen he, inogogwi kaindek omanogo inom, afuni ekhe andoma welagaukwa mene inom, mel yagaisasikhe: ”Yi mene ti mene Naomi agun Elimelekh ebe inom, againafuri Kilyon, Mahlon inom, eise welagaukwa mene yogondak Naomi eise agasik werek mene andi, mondogat an onggo paligin andi, o yogondak yiba hit mondogat hineilhanem igi o.

¹⁰ Onggo a'nogo palhi logolik, he Rut aiba Moab mene at Mahlon agwe sogwe andi an wanigin aro. A'nogo wanigin meneat he, kweang andi it ap wa'lagaikha mene andi nen tago meneat eise logolik, inebe eise it meneat logolik he, inawi kota welagaikharek obaat logouwago. Ma re, o yogondak hit mondogat hinebe were'ma igi andi, hinendawimo eberek mondok logoino o,” iluk yagaisasikhe.

¹¹ A'nogo yagaisasikhemo, inogogwi kaindek omanogo inom, it ekhe leget pa'leget kwe ambe pale'ma andoma welagaukwa mene inom, inomen he, mel yagatukwa: ”Elok. Nit nineilhanem egendi'mo re, ninendawimo eberek logogun o. Nineisena Tuhan nen, he Rakhel inom, Lea inom fanorinafikhemo ineagwi Yakub againafuri hokhorogo taginafukwa andi hak, Aren hat hagwe andi fanotfoumo, eagwi hokhorogo taginabuagaro. Hat hebe afuni Efrata mene inanggele'ma henggi werek enek logolik, o Betlehem yoma nen inelu mondok logouwak.

¹² Hat hagainafuri nineisena Tuhan nen wokhesumo, at he tugum yi nen taginabigin andi, at he Tamar en Yehuda amlogo Peres tatikhemo, aren tagomangge mene welagaikharek andi hangge logouwago,” iluk yagatukwa.

Ap Boas nen ambisangma ta'larik lagaukwa wene

¹³ A'nogo yagatukwama, at Boas agwe Rut helasikhe. A'nogo helasikhesik emberek nogo isukwama, at nineisena Tuhan nen, he Rut fanotfesikhemo, eak a'ma agaikhesik eak ap takhasikhe.

¹⁴ A'nogo takhasikhemo, it hemi nen Naomi mel yagatukwa: ”Hat ha'logo nen hombalo ap mene hebe tegelhafi logogin mene takhete andi nen, nineisena Tuhan fogerati logouwogo. Hombalo andi nit afuni Israel mene ninanggele'ma yoma enuwerek logouwago.

¹⁵ Hat heagwi ap inebe 7 nen taginabilenma iren lebethiikhi logoilep andi endebat hak. A'nogo meneat he, ha'logo andi nen enek he, mondok hokhorogo endawithafesik, yogondak hombalo ap ekhe hat hendawinggen hambukhogo hebe yaman agunem tegelhafi logogin mene takhetesi'mo re, ha'logo andi esin mondogo,” iluk yagatukwa.

¹⁶ A'nogo yagatukwama, at he Naomi nen omalik a'nogo agoumo wanhikhesik he, hobuk ebe endawi logolik, tegelhi lagaikhe.

¹⁷ A'nogo tegelhu were'ma, it hemi Naomi inom inawi sili misi'mo mene nen omalik a'nogo enu Obed salhukwa. A'nogo salhukwasik, afuni mondogat mel yagaisikhi lagaukwa: ”Naomi eak ap mene ekhe werego,” iluk ikhi lagaukwa. Ma re, Isai eisena Obed andi. Nen, Daud eisena re, Isai andi.

Daud ambu-ombalak ta'larik wagaukwa wene

^18-22 Daud ambu-ombalak at Peres huli nen ta'larik wagaukwa re, inebe yi'nogo: Peres nen he, Hezron tatik, Hezron nen he, Ram tatik, Ram en he, Aminadab tatik, Aminadab en he, Nahason tatik, Nahason nen he, Salmon tatik, Salmon nen he, Boas tatik, Boas nen he, Obed tatik, Obed en he, Isai tatik, Isai nen he, Daud tatik, a'nogo ta'larik wagaukwa andi.