RUT 2 - Allah Wene Fano Wene Hupla Inane

He Rut a'nogo ap Boas eabumo yabu hilingiti lagaikhe wene

¹ At he Naomi agun Elimelekh werekwe mene ap ekhe ebe kain enggi werek mene enu Boas welagaikhe.

² A'nogo were'ma inenggi ekhe sambul at he Rut en Naomi mel yagatikhe: ”Nagaisa. An he yabukwe afuni nen jelai enggen palhunem inenggimo nen pili'lago mene andoma andogesi lagain nen iluk yagaheti o. An nendawimo nen he aben andi mene hilingisuageluk herak nobagagun anggikhi lagi,” iluk yagatikhe. A'nogo yagatikhemo oan Naomi nen he, ”Io, neak, fano. Lan,” iluk yagatikhe.

³ Andi yagatikhemo, at he Rut a'nogo afuni ekhe mene ineabumo lagain ha'ma nen he, ap Boas eabumoat lagaikhesik, afuni jelai enggen palik lagunem inombo'ne laga logolik andogorik lagaikhe.

⁴ A'nogo andogorik lagunem, welagi'le'maat, at Boas o Betlehem en lagaikhesik afuni jelai enggen palhi lagaukwa mene omanogo hai warinafi logolik, ”Tuhan nen fethinarek logouwago,” iluk yagaisasikhemo, iren he, ”Harogo, Tuhan nen fanothafi logouwagaro,” iluk yagatukwa.

⁵ A'nogo yagatukwama, at Boas nen he, afuni jelai enggen palhi lagaukwa mene inoe mene a'nogoba mel yagatikhe: ”He ari sa,” iluk heinok wokhasikhe.

⁶ A'nogo heinok wokhasikhemo, aren he, ”He ari re, aiba Moab mene, o kerat ya he Naomi emberek o Moab en wagaikha mene.

⁷ Aren he, An hit jelai enggen palik lagunem hinombo'ne laga logolik enggen ekhe pugunem andogorilik lagain, iluk an kino yaganetesik, ohealegen pikhit andogorik mondok laga lagasik, yogondagat o sabu wuri'mo set endebat warili'logo ari o,” iluk yagatikhe.

^8-9 A'nogo yagatikhemo, at Boas nen he, he Rut mel yagatikhe: ”Nerei e, hesanggo holino. jelai enggen afuni ekhe ineabukwe andogosi lagun o. We, hemi an neabumo yoma enggen palik lagunem heilenggen tukhumhogo isaluk he, inombo'ne mondok laga logolik andogorikhi logoino o. Iren jelai enggen komakwe palik lagu halok, haren it kofologo fisigi'lek inombo'ne mondok laga logoino o. An nen he, ap jelai enggen pali'lagwi mene andi yagaisikhi logolik: He andi lalhubo, iluk arat yagaisigimo. Halok, hat i nele aga halok he, i it ap andi nen iwak helep mene hilingitarek mene elema hinago mene ekhe hinakhesuagen kino yagaisikhi logoino o,” iluk yagatikhe.

¹⁰ A'nogo yagatikhemo, at Rut esanggo holhikhesik he, eindep awi yagaisogo Boas awe a'ma wagaikhesik hai wati logolik mel yagatikhe: ”An nebe pok meneat he, haren an hendawitnafik, heilenggen wo'nafik ikhi logogin andi ninggi'nogo nen,” iluk yagatikhe.

¹¹ A'nogo yagatikhemo, at Boas nen he, mel yagatikhe: ”Haren he, hagun ebe wa'lagaikhesik oba nen hoan Naomi faget hilingiti lagen mene andoma habok an arat nesanggo holhi o. Hat nit yoma ninebe honggot meneat he, ninom yoma logouwogeluk, heisena hagaisa inom, haiba hebe ta'lagagin oba inom, herakfisaluk wagen andi, an nesanggo arat holhirik nelu agama o.

¹² Hat nit afuni Israel mene nineisena Tuhan Allah nen awe a'ma fetharek logouwagaluk wagen andi nen, Aren he, haren yi mene ti mene faget fano hilingiti lagen mene andi mondogat onggo wokhesigin mene andi helagain higit obaat wokhesuago,” iluk yagatikhe.

¹³ A'nogo yagatikhemo, at Rut en he, ”An he, hemi ekhe hat heabu hilingitarek mene yoma hangge lek meneat he, agaukhogo fano yaganetenma re, nendawinggen fano aga o, noe,” iluk yagatikhe.

¹⁴ A'nogo yagatikhemo, sumburu nogoin oba arat asi wagaikhemo, at Boas nen Rut mel yagatikhe: ”Misi'mo sumburu amusu yugulogo nouwogen eme o,” iluk yagatikhemo, at Rut sumburu it jelai enggen palhi lagaukwa mene omanogo inom misi'mo hu'lagaukwasik nasukwa. A'nogo nunggunem, at Boas nen jelai enggen endu enggen oba werago mene at Rut wogotikheat. A'nogo wogotikhemo sumburu alabut ninghogo nasikhesik, ekhe tindelogo fesikheat.

^15-16 A'nogo nasikhesik, at Rut jelai enggen hobuk andogosi lagaikheat. A'nogo lagaikhemo, at Boas nen he, it agoromi jelai enggen palhi lagaukwa mene omanogo mel yagaisasikhe: ”At Rut en jelai enggen hit hele yelogo lakfogoin kwe andoma nen pugu mene helikhe halok he, at enggali asinogo nen he, wenagetubo. Hit jelai enggen hele yelhigik lakfikhi logolik he, hineranen ekhe at andogoroageluk pelakfisikhi logoino o,” iluk yagaisasikhe.

¹⁷ A'nogo yagaisasikhemo, at Rut a'nogo jelai enggen yabukwe andogorik lagunemen he, o hu'mo agaikhe. A'nogo andogotikhesik, enggen ibiligeluk sagalhikhe mene re, enggen enggin he huli 10 kilo hangge mene ibilhikhe.

¹⁸ A'nogo ibilhikhesik, waluk ambotkwe o kota wagaikhesik he, jelai enggen hokhorogo andogotikhe mene omanogo inom, sumburu nasikhesik tindelogo fesikhe mene omanogo inom, oan Naomi wogosi wagaikhe.

¹⁹ A'nogo wogosi wagaikhemo, at Naomi nen he, mel yagatikhe: ”Yoma mondogat he, hat koma nen andogoten. O yogondak ap sa eabumo andogoten. Ap ekhe hat oba liok ikhesik fano wokhete mene andi Allah nen fanotfouwago,” iluk yagatikhe. A'nogo yagatikhemo, at Rut en he, ”Ap enu Boas eabukwe mene andogoti o,” iluk yagatikhe.

²⁰ A'nogo yagatikhemo, at Naomi nen he, ”Neak. Ap andi re, nit ninebe misigat tago mene o,” iluk yagatikhe. A'nogo yagatikhesik ekhe mel yagatikhe: ”Aren nit ninebe wo'ninapluk, nit faget yi mene ti mene wo'nisa higit obaat hilingite o. Tuhan nen, Yi'nogo hilinghinabigin, iluk wene watnisikherek higithogoat afuni arat wa'lagaukwa mene inom, ineluk werek mene inom, leberisikherek mene a'nogo nen ap andi fanotfikhi logouwago,” iluk yagatikhe.

²¹ A'nogo yagatikhemo, at Rut en ekhe mel yagatikheat: ”Nagaisa, ap andi nen he, An nagoromi jelai enggen palik lagu kwelek, haren enggen pigin mene andogorugu mondok logombik huli enggen arat felelenghogo palugun oba logogin o, iluk yaganete aro,” iluk yagatikhe.

²² A'nogo yagatikhemo, at Naomi nen he: ”Neak. Hat he, afuni ekhe ineabukwe andogosi lagain halok, afuni nen lalhabinogo nen he, lagi'lek hemi at Boas eabumo jelai enggen palhunem hinom mondok palik laga logolik andogoti logoino o,” iluk yagatikhe.

²³ A'nogo yagatikhe andi nen he, at Rut hemi Boas eabukwe gandum enggen palhunem inombo'ne nikhi logolik, jelai enggen andogoti lagaikhesik, enggen mondogat arat palhukwama nek he kamo isikhe. A'nogo palhi logolik he, enggen attak-attak eroba palhukwaba nen pikhit, wurep kobokhogo palhukwa huli andoma re, Rut inom mondok enek palhukwa. A'nogo palhi logolik inom, palhukwasik oba inom, at ebe oan Naomi inom mondok welagaukwa.