ROMA 9 - Allah Wene Fano Wene Hupla Inane

Allah nen afuni Israel mene wenaginafikhe wene

^1-3 An nerugwi nagaila'lak ninunggulenu misigat mene weak werek andi nen, nendawinggen weagat welagik, kwanirek welagik, ikhi lagi. Nendawimo nen he, ”Allah nen, an Kristus nemberek hundik welago mene andi kobokhogo heraknobagaluk, it inobali'mo homan nobagailebe, anggikhi lagi andiba, it woginabile,” iluk Kristus nemberek hundik logolik igi andi re, eberogoat igi. Nera nen igi lego. Allah Areagun nendawimo logolik, ”Wene andi re, eberogoat,” iluk yaganetik, nonggwarek nendawimo nen ogo re, ”Eberogoat igi,” iluk anggigik, igirek.

⁴ It afuni Israel mene, eberogoat Allah nen wenaginafikhe mene andi nen he, at againafuri asuageluk woginafik, at Ebe fogeratarek mene andi irat yagaisigik, wene warogo irat woginafik, wene komotninafikhe wene a'nogo irat wogisigik, ”An yi'nogo fogetnafi logoino,” iluk irat yagaisigik, ”Hobuk yi'nogo hilinghinabigin,” iluk abok irat yagaisigik, isikhe andi.

⁵ Nit ninombalak he, iren tagongge mene. At Kristus ebe nit afuni ta'lagorek hak ta'lagaikhe andi, it mene nen tatukwa mene re, ebe Allah mene aro. Yi mene ti mene mondogat he, a'ma hak meneat he, at enek he, abel ponggwe lego mene andi nen he, at enek fogerati logogun andi, ebe asuak, iluk u hak, ”Amin,” ikhi logouwok.

⁶ Allah nen it inoba abok yagaisasikhe mene andi faget, ”Ebe legaga,” iluk igi fuk. It Israel en tagongge mene andi inebe mondogat he Allah againafuri nek asuageluk wenaginafikhe mene fuk.

⁷ At Allah nen wene Abraham mel yagatikhe: ”Haren tagongge mene wialasugun, iluk yagahetigi a'nogo ebe re, hamlogo Ishak yi nen tagongge mene nen wialasugun mene nek faget yagahetigi o,” iluk yagatikhe andi nen he, Abraham en tagongge mene mondogat he, Allah againafuri iluk ugun fuk. Lego.

⁸ A'nogo isikhe andi ebe mel iluk isikhe. Inebe nen tagongge mene andi re, Allah againafuri iluk ugun fuk. We, Allah nen abok yagaisasikhe mene halok, at againafuri ugun o.

⁹ At Allah nen Abraham wene waretikhe andi wareti logolik he, mel yagatikhe: ”An hobuk hoba wesigin higithogoat wesigin o. Wagunem he, he Sara eak ap takhagain o,” iluk yagatikhe.

¹⁰ Mene re, wene andi nek fuk. At he Ribka eagwi re, ineisena Ishak ninambu misigat andi nen ap inebe pire taginafikhe.

¹¹ It ap inebe pire andi, inebe ta'lagi'lek inobabut fano hilingitik, weak hilingitik, igi'lek werek kwelek, at Allah endawimo nen anggaluk wendeberogo fisasikhe andi ebe asimbik logouwageluk,

¹² inagaisa Ripka wene mel yagatikhe: ”Hat heagwi taginabigin andi, attak ta'lasigin mene andi, ebe hobuk ta'lasigin mene awe a'ma logogin o,” iluk a'nogo abok yagatikhe. A'nogo yagatikhe andi re, iren yi mene ti mene ekhe hilingitukwaba wendeberinafikhe fuk. We, at Allah endawimo anggaluk wendeberogo fisasikhe andi.

¹³ Wene andi hangge ekhe mel isikheat: ”At Yakub andi nendawi. Meneat he, at Esau andi nabiro,” iluk isikhemo re, lisu palogo fesukwa.

¹⁴ Halok he, niren he, ninggi'nogo ugun. At Allah obabut weak hilingitikhe ugun nogo? Mondok lego. Allah obabut he, higit.

¹⁵ Aren he, Musa mel yagatikhe: ”An nenat he, nendawi mene halok nendawirinafik, nendawi hundik mene halok nendawi hundik agik, igin o,” iluk yagatikhe.

¹⁶ Allah nen a'nogo ikherek andi re, afuni inendawimo nen fano iluk anggaluk, iren ekhe ninghogo hilingitunemen, endawirinaferek lek. We, at Allah obabut fano nenat endawirinapluk inebe woginaferek andi.

¹⁷ At Allah nen kain Firaun mel yagatikhe: ”An nen yi fagerat menhobagagi o. Afuni nen an nomame inelu agik, nenu o yi awi ti awi yagaisilik lagik, uageluk menhobagagi o,” iluk yagatikhemo Allah ane lisu palek a'nogoba lisu palogo fesukwa.

¹⁸ At Allah nen, ”At yi nendawi,” iluk endawimo anggikherek mene halogat, endawiratik, nen, ”At andi endawinggen omamet fagain,” iluk endawimo anggikherek mene halogat endawinggen omamet figik, ikherek andi.

Allah a'mage afuni inoba figik, endawirinafik, ikherek wene

¹⁹ A'nogo hilingiterek andi nen, hat ekhe nen an mel yaganesigin anggikhi lagi: ”At Allah endawimo anggaluk hilingiterek mene andi, sa nen, Nabit, iluk legetfagain nogo. A'nogo legetfagain elo'lek meneat he, nenahalok wene ninoba fili'logo,” iluk ugun anggikhi lagi.

²⁰ Eige! Nagot yi. At Allah ane ugunem, haren at ane oak lagaligin nogo? Elo'lego. Afuni nen iwak temul mene hilingitunem kweang temul andi nen he, at hilingite mene andi yagati logolik: ”Haren an yi'nogo nenahalok hilingnafen,” iluk yagasigin nogo? Elo'lego.

²¹ Kweang temul andi misigat meneat he, at hilingite mene andi eiseweregatma re, ekhe fano pugunhogo hilingisogo figik, ekhe we yugunat faget hilingisogo figik, igin lek nogo? Igin aro.

²² Andi hak, at Allah endawimo anggikhi logolik he: ”Afuni an nen elalinafigi meneat he, it ekhe na'mage liabi'lagwi andi nen, weagerinabigeluk, na'mage lagaikhe mene andi, iren nobabut palhik, nomame werek mene andi inelu agik, uago,” iluk afe morogo welagarek.

²³ It andi faget a'nogo afe morogo logolik, nit faget mel anggili'logo: ”It ekhe nendawi mene fanorinabigeluk attak elalinafigi andi, fano mondok hilinginabigin mene inelu asuago,” iluk anggikherek.

²⁴ A'nogo anggikherek mene andi, nit afuni Yahudi mene nek wena'ninafikhesik ninayonggo fesikhe fuk. It endakwe mene ninomat wena'ninafikhesik inayonggo fesikhe aro.

²⁵ A'nogo iluk at Allah nen he, wene ekhe mel isikhe: ”Afuni welek mene an nagainafuri aro, iluk igik, inebe nendawirinafi'lek mene, nendawi aro, iluk igik, igin o.

²⁶ An nen he, afuni o ekhe mene faget he, Hit he, an nagainafuri lego, iluk isigi meneat he, hobuk it o andoma mene fagerat, O yoma an neluk welagirek mene nagainafuri o, iluk igin,” iluk isikhemo re, at Hosea nen lisu palogo fesikhe.

^27-28 Nen wene ekhe Allah nen he, mel isikhe: ”Afuni kweangma mene yoma wene weak-weak inoba mondok fagain andi nen he, afuni Israel en tagongge mene i nebe ial i unggutmo laut hokho yenggelek era'lukwe welagarek andi hangge werek. Meneat he, we, inebe endebat enek telinabigin o,” iluk isikhemo Yesaya nen lisu palogo fesikhe.

²⁹ A'nogo iluk Yesaya nenat wene ekhe attagat mel isikhe: ”Nineisena Tuhan Omame mene a'nogo nen he, iren tagongge mene ekhe herakfisigi'lek mondogat inoati logoilepma re, Sodom hangge agik, Gomora higit agik, ilo o,” iluk Yesaya nen lisu palogo fesikheat.

Afuni Israel mene nen inendawinggen Yesus oba himbiret figi'lek hilingiti lagaukwa wene

³⁰ Andi halok he, niren ninggi'nogo ugun? Mel ugun. It afuni endakwe mene nen wene inoba mene Allah nen korogo wokhaluk, inambotkwe inom hunogo inobagauwageluk hilingisugun mene ekhe ninghogo hilingiti'lek. Meneat he, inendawinggen Yesus oba himbiret fesukwama re, Allah nen wene inoba mene korogo wokhaluk, hobuk inambotkwe inom hunogo fisasikhe.

³¹ A'nogo meneat he, it afuni Israel mene nen, Allah nen wene inoba mene korogo wokhaluk, hobuk inambotkwe at inom hunogo ninobagagin wene hologo logouwogeluk walhasukwa meneat he, elo'lek agaikhe.

³² Nenahalok halogen a'nogo elo'lek agaikhe nogo? Andi re, inendawingen Yesus oba eberogoat himbiret figi'lek, we, inonggwarek inendawimo anggaluk hilingiti lagaukwa andi nen aro. Afuni ebekhalem laga logolik helep oba ineisok a'lip silukhogo waragarek andi hak, nong akhasukwa andi.

³³ Wene andi faget Allah nen he, mel isikhe: ”An o Sion andoma helep hangge ekhe figi yi hani! helep andiba afuni ineisok a'lip silukhogo waraluk, talorogo laga logogun o. Meneat he, hinebe lombok hinendawinggen at oba himbiret fogoin mene halok hinenggali hogoin mondok lego,” iluk isikhemo lisu palogo fesukwa.