ROMA 8 - Allah Wene Fano Wene Hupla Inane

Allah Areagun inendawimo logolik inobabut hunogoat hilingitarek wene

¹ Yogondak nit Kristus Yesus ninom hundik welago mene halok Allah nen wene ninoba fuluk weagetninabigin lego.

² An attak he, weak hilingitaresik wurep oba inebe mondok wa'lagaikharek andi mene nen hele warogo hak fetnarek welagaikhe. A'nogo were'ma, hobuk Allah Areagun en Kristus Yesus ninom hunogo ninobagakhi logolik nineluget ninaferek mene a'nogo nen, hele fikhalogo nobagaikhemo welagi.

³ Attak he, Allah nen komotninafikhe wene a'nogo, nit afuni ninobabut lebelek andi nen he, fano hilingninabu elo'lek agaikhe. Elo'lek agaikhemo re, nit afuni ninobabut weak hilingitu were'ma, Allah onggwarek amlogo nit hangge hilingla'luk, nit weak hilingitorek mene andi wene oba fesikhesik sebelfisoageluk lakfei wagaikhemo sebelfisasikhe andi.

⁴ Attak he, nit higithogo hilingiti logouwageluk, wene Allah nen komotninafikhe meneat he, weak hilingiti lagagu andi. Weak hilingiti lagagusi'mo re, hobuk nit afuni inobabut wanhi'lek logolik Allah Areagun obabut waganogo higithogo hilingiti lago mene halok, aren isikhe hak hilingiti logouwageluk, weak hilingitarek andi arat sebelfisasikhe andi.

⁵ It ekhe nen afuni inobabut inetogat logolik hilingitarek mene inobabut wili'lagwi mene andi, inendawimo re wene afuni nen anggagarek meneat oba ebetarego. Nen, it ekhe nen Allah Areagun obabut wili'lagwi mene re, inendawimo wene Allah areagun nen anggikherek meneat oba ebetarego.

⁶ Afuni inobabut inetogat logolik hilingitarek mene oba ebeti logogun halok, wurep oba inebe mondok wa'lasugun andi. Meneat he, Allah Areagun inendawimo kagalhunem hilingitarek mene oba ebeti logogun halok, inendawinggen hambukhogo ineluk mondok logogun andi.

⁷ Afuni inobabut inetogat logolik hilingitarek mene a'nogo oba ebeti logolik, Allah awe a'ma kuluk ane hologo welagaikharek lek andi nen at inom weim palegat werego.

⁸ Afuni inobabut inetogat logolik hilingitarek mene andi hilingitoat logolik, Allah endawimo amolo anggikherek mene higithogo hilingisu elo'lek welagaikharek andi.

⁹ A'nogo meneat he, hit enek he, Allah Areagun eberogoat hinendawimo werek halok he, hinobabut afuni inobabut inetogat logolik hilingitarek hak hilingiti'lek. We, Allah Areagun obabut waganogo hilingiti lagep andi. Nen, sa nen Kristus Areagun endawimo lek halok he, at andi ebe Kristus mene lego.

¹⁰ A'nogo meneat he, hit Kristus hinendawimo werek halok he, hinobabut weak hilingiti lagep andi nen, hinebe hinagap mene yi wa'lasugun meneat he, Allah nen wene hinoba mene korogo wokhaluk hobuk hinambotkwe hinom hunogo hinobagasikhe andi nen, at Areagun en hinelugethinabigin andi.

¹¹ At Allah nen he, Kristus Yesus wa'lagaikhemo eluget fesikhemo re, at Areagun hinendawimo logolik he, hinebe hinagap wa'laga lagep mene yi hinelugethinabiginat. Andi re, at Areagun en Kristus ebe wa'lagaikhemo eluget fesikhe a'nogo hinendawimo welagarek andi nen hinelugethinabigin o.

¹² Nerugwi nagaila'lak. Niren hilingiti logogun menere yi: Andi re, ninobabut afuni inobabut inetogat logolik hilingitarek hak hilingiti logogun iluk igi fuk. Lego.

¹³ Hit hinobabut afuni inobabut higit hinetogat logolik hilingiti logogun halok, hinebe mondok wa'lasugun andi. Mene re, hinobabut a'nogo hilingisu hak hilinghinafunem, Allah Areagun ayonggo fuluk, at omameba watfisikhi logogun halok he, hineluk mondok logogun o.

^14-15 Allah nen Areagun wokhisikherek andi re, afuni inebe it ekhe inamingmingengge logolik inobabut inailorogo hilingitarek andi hak, hilinghinafi logouwageluk wokhisikherek fuk. We, at Allah onggwarek againafuri hilinghinapluk kulhinabuageluk wokhisikherek. Andi nen he, it afuni Allah Areagun en woginarek nikherek mene halok, inebe lombok he, inebe Allah againafuriat werego. A'nogo logolik ninebe Allah Areagun oba himbiret fuluk logolik he, mel ikhi lago: ”Neisena Allah, neisena Allah,” iluk ninane fakhogo ikhi lago andi.

¹⁶ A'nogo ikhi lago andi re, at Allah Areagun nenat, ”Hinebe Allah againafuri o,” iluk yaganisugunem, nit ninendawinggen oba nen ogorek andi.

¹⁷ Nit ninebe Allah againafuri halok he, at Kristus yi enggin ti enggin hasikhe hak, hogoin halok, Allah nen nit Kristus ninomat fogetninabigin andi nen he, Allah nen yi mene ti mene at againafuri wogisageluk abok yagaisasikhe mene andi, at Kristus ninomat wo'nisamo, eise logogun o.

Fanotninabigin wene

¹⁸ Nit o yogondak welago yaba re, yi enggin ti enggin hikhi lago andi, endebat hak. Mene re, hobuk, Allah nen ninebe hunogoat mene hilingninafunem fogetninabugun andi nek he, hokho aro. Halok, emberek walhamo re, emberek higit lek iluk, nendawimo anggikhi lagi o.

¹⁹ Pogot kweang yi mene ti mene Allah nen elalhikhe mene yoma nen he, ”Allah againafuri inebe hunogoat hilinginafunem sele'ma fogerinabugun andi mera hilinglasigin,” iluk, alik wari'lagwi.

²⁰ Pogot kweang yi mene ti mene mondogat abisak alemarogo logoigeluk anggasikhesik, alomat lagaikhesik welagarek fuk. At Allah nen he, ”Hobuk fanot feigeluk he, elama faget a'nogo logouwak,” iluk endawimo anggasikheba welagarego.

²¹ A'nogo werek meneat he, hobuk Allah nen fanot fagain oba weregaro. Andi sambul he, afuni hele warek weak were'ma, hele fikhalogo telinafarek hak, pogot kweang yi mene ti mene mondogat alomat fisikherek mene nen omameba ferinarek were'ma, Allah nen hele fikhalogo telogo fisagain o. A'nogo fisagain andi, at againafuri inebe hunogoat hilingisogo fisugunem fogerinabugun andi hak, pogot kweang yi mene ti mene a'nogoat hunogoat hilingisogo fisugunem fogerasugun aro.

²² Hemi nen, ineagwi taginabuogeluk inambot heinet weakhogo wati logolik inendawi ane agarek hak, pogot kweang yi mene ti mene Allah nen walhasikhe mene yoma mondogat o attagaren heinet wati logolik inendawi ane ili'lagwi aro.

²³ Pogot kweang yi mene ti mene andi nek heinet wati logolik, inendawi ane ili'lagwi fuk. Allah nen he, ”Hinebe an nagainafuri. Arat wokhinafi o,” iluk ninebe ninendawinggen ninagap mondogat fanotninabigin mene oan logolik, sumburu lilu nenggarek hak, at Areagun attagat wo'nisasikhe meneat he, ebe hobuk hilingninabigin mene andi nenangorogo logolik he, heinet wati logolik ninendawi ane ikhi lago.

²⁴ A'nogo hilingninabigin o, iluk anggugunem, Allah nen telninafikhemo welago. Mene re, sa hagen, ”Hobuk yi'nogo hilinglasigin,” iluk endawimo anggugu were'ma, ebe arat hilinglagunem eilenggen halugat he, hobuk endawimo angguguat logogin nogo? A'nogo ekhe welagaikharek lek andi nen he, niren, ”Hobuk yi'nogo hilinglasigin,” iluk anggikhi lago mene andi, ebe arat hilinglagunemen, nineilenggen hogo halok he, ninendawimo nen a'nogo ekhe anggikhi logogun mondok lego.

²⁵ Mene re, Ninendawimo nen, ”Hobuk eberogoat yi'nogo hilinglasigin o,” iluk anggikhi lago mene nineilenggen higi'lek logolik ninafe morogo nenangorogo welago.

²⁶ A'nogo nenangorogo logolik he, nit ninebe lebelek were'ma re, Allah Areagun en lebetnisili'logo. Nit samban oba Allah yagasuogeluk ninane ninggi'nogo u heat ninonggorat were'ma, Allah Areagun en afuni inaneba u elo'lek meneat he endawi aneba Allah yagari'logo.

²⁷ A'nogo ayonggo fugunem he, at Allah nen ninendawimo mondok kwelaknisikherek andi nen he, at onggwarek endawimo anggikherek mene higithogo, at Areagun en at againafuri faget ayonggo fugunem futfisikherek.

²⁸ At Allah endawimo anggaluk nit ninayonggo fesikhesik, nit at ebe ninendawi welago mene halok, at ninom logolik, yi mene ti mene fano asuageluk, hilingnisili'logo ninelu o.

²⁹ Attagat, at Allah nen nit ninebe elu logolik, at amlogo higit asuageluk wenagaisogo ninobagasikhe. At Yesus ebe manggusa mene, agoromi hokhorogoat at inom logouwageluk wena'ninafikhe andi.

³⁰ Attagat Allah nen ninebe wena'ninafikhe mene halok, ninayonggo fesikhe. A'nogo ninayonggo fesikhe mene halok, wene ninoba mene korogo wokhaluk, hobuk ninom ninambotkwe hunogo ninobagaikhemo welago. Ninebe a'nogo hunogo ninobagaikhe mene halok, at ebe fogeratu mondok welagaikharek mene andi hangge asuageluk wo'ninafikhe.

Allah nen ninebe endawit ninaferek wene

³¹ Wene mondogat andi faget, niren ninggi'nogo ugun. Allah nit werekwe aga halok, sa nen lebeleget ninabigin nogo? Elo'lego.

³² At onggwarek amlogo endawi agi'lek nit mondogat faget wa'lasuageluk lakfei wagaikhe. At obabut fano nen a'nogo wo'nisasikhesik he, yi mene ti mene oba loukhogo wo'nisagain lek nogo? Wo'nisagain aro.

³³ Allah nen ninebe wenagaisogo wo'ninafikhe mene halok, wene ninoba mene korogo wokhamo re, hobuk wene sa nen ninoba fagain nogo? Elo'lego.

³⁴ Nen, wene ninoba fembik he, sa nen weagetninabigin nogo. At Kristus Yesus wa'lagaikhemo Allah nen eluget fesikhemo re, pogoroba lagasikhesik, at era'lu enggi ebekwe kain logolik he, nit faget Allah ayonggo fugu werek.

³⁵ At Kristus ninebe endawi nen ninom hundik were'ma, sa nen minggilogo ninobagagin nogo? Yi enggin ti enggin hilingninafik, enggin mene ninoba figik umo, andi nen minggilogo ninobagagin nogo? Elo'lego. Afuni nen he, ”Hinebe Allah againafuri,” iluk weagetninabumo andi nen minggilogo ninobagagin nogo? Sumburu ouwak agik, ninasu yi mene ti mene ninelagaik agik umo, andi nen minggilogo ninobagagin nogo? Youk agik, ninebe ninoatik umo, andi nen minggilogo ninobagagin nogo? Elo'lego.

³⁶ Wene andi higithogo Allah aneba lisu palhi logolik, mel isukwa: ”Hat fagerat he, afuni nen linggene hundik, hubanggo hundik, ninoasuogeluk hilingninafu mondogat werego. Afuni nen domba wam wasuogeluk abok palharek andi hak, ninabok palhuat werego.” iluk lisu palogo fesukwama werek.

^37-39 A'nogo meneat he, Allah ninebe endawi nen ninoe Enupogot Kristus Yesus wo'nisasikhemo ebe wa'lagaikhe andiba ninom hundik were'ma ninebe wa'lasumo inom, nineluk logoumo inom, andi nen minggilogo ninobagagin elo'lego. Malaikat pogoroba yonggo nikhirek mene andi inom, pogoroba inomame werek mene ekhe andi inomen, minggilogo ninobagagin elo'lego. Yi mene ti mene yogondak hilinglagarek mene inom, hobuk hilinglasigin mene inom, andi nen minggilogo ninobagagin elo'lego. Nen, omame werek mene ekhe nen minggilogo ninobagagin elo'lego. Nen, Allah nen walhasikhe mene hunigat mene ekhe nen minggilogo ninobagagin elo'lego. At Allah nen ninebe endawitninafikhemo, Kristus Yesus hilingitikhe andiba, mondogat a'nogo weak hilingninafunem nit minggilogo ninobagagin elo'lego. We, afuni wulil tagalogo inoa'luk inomame agaikharek hak ninomame agorek iluk futfikhi lagi.